Read Maltese Bible with DC – IL-BIBBJA IL-KOTBA MQADDSA BIN SIRAK 31 Bible Online

BIN SIRAK 31 - Maltese Bible with DC – IL-BIBBJA IL-KOTBA MQADDSA bible

BIN SIRAK 31

¹L-għana In-nuqqas ta’ rqad minħabba l-għana jherri l-ġisem, u t-tħassib tiegħu jtajjar in-ngħas.

²It-tħassib biex tgħix ma jħallikx torqod, bħal marda kiefra jtellfek in-ngħas.

³L-għani jitħabat biex ikattar ġidu, u meta jistrieħ, jitpaxxa bih.

⁴Il-fqir jitħabat biex ikollu biex jgħix, u jekk jistrieħ jiġi fil-bżonn.

⁵Min iħobb id-deheb ma jibqax fis-sewwa, u min jiġri wara l-flus joħroġ barra minn triqtu.

⁶Ħafna ħadu tisbita minħabba d-deheb, u ħabbtu wiċċhom mat-telfien tagħhom.

⁷Hu xkiel għal dawk li huma mogħmija bih, u kull iblah isir ilsir tiegħu.

⁸Hieni l-għani li jinstab mingħajr ħtija, u li ma jiġrix wara d-deheb.

⁹Min hu dan biex infaħħruh, għax fost niesu għamel ħwejjeġ tal-għaġeb.

¹⁰Min kien imġarrab minnu, u baqa’ bla ħtija? Għandu biex jiftaħar. Min jista’ jaqbeż il-limiti u ma jaqbiżhomx, jew jista’ jagħmel il-ħażen u ma jagħmlux?

¹¹Ġidu jkun fis-sod, u l-opri ta’ ħnientu xxandarhom il-ġemgħa. Il-pranzijiet

¹²Qiegħed bilqiegħda ma’ mejda għal xi ikla kbira? Tħallix il-kilba għaliha tegħlbek, u tgħidx: “Hemm bil-ħala fuqha.”

¹³Ftakar li mhux sew tħares b’għajn kollha kilba. X’inħoloq b’kilba akbar mill-għajn? Għalhekk tnixxi dmugħ minn kull wiċċ.

¹⁴Jekk ħaddieħor jitfa’ ħarstu fuq xi ħaġa, toħroġx idek għaliha, u trossx fuqu biex taħtaf mill-platt.

¹⁵Kun af li dak li tħoss int iħossu għajrek, u f’kulma tagħmel aħsibha sewwa.

¹⁶Kul bħan-nies dak li jitqiegħed quddiemek; tomogħdux bil-ħatfa, biex ma jmaqdrukx.

¹⁷Kun l-ewwel li tieqaf kif titlob l-imġiba tajba, u tkunx wieħed li qatt ma jixba’, biex ma trigħexx lil xi ħadd.

¹⁸U jekk qiegħed bilqiegħda qalb ħafna nies, tmiddx idek qabilhom.

¹⁹Biżżejjed il-ftit għal bniedem imrobbi sewwa! Fuq soddtu ma jaqtax nifsu.

²⁰Raqda tajba fuq stonku ħafif; tqum kmieni, u tħossok f’sikktek. Nuqqas ta’ rqad, tqalligħ, u brim ta’ msaren, ibati bihom iż-żaqqieq.

²¹U jekk kont imġiegħel tiekol ħafna, qum u mur aqla’, ħa tistrieħ[45].

²²Isma’ minni, ibni, u twarrabnix, għax fl-aħħar tiġi fi kliemi; kulma tagħmel, agħmlu bil-qjies, u ebda marda qatt ma tilħqek.

²³In-nies ifaħħru ’l min hu jdejh miftuħa fl-ikel, ix-xhieda tagħhom hi minnha.

²⁴In-nies imaqdru lil min hu jdejh magħluqa fl-ikel, ix-xeħħa tiegħu hi flokha. L-inbid

²⁵Tagħmilhiex ta’ raġel b’saħħtu bl-inbid fih, għax l-inbid wassal ħafna għat-telfien.

²⁶Il-forġa tistħarreġ l-ebusija tal-azzar, hekk l-inbid iġarrab il-qlub fit-tilwim tal-kburin.

²⁷L-inbid hu daqs il-ħajja għall-bnedmin, jekk tixorbu bil-qjies tiegħu. X’inhi ħajja nieqsa mill-inbid? Għalhekk kien maħluq, biex iferraħ lill-bnedmin.

²⁸Hena tal-qalb u ferħ fir-ruħ meta l-inbid jinxtorob bil-qjies u f’waqtu.

²⁹Imrar ir-ruħ meta l-inbid bl-adoċċ jinxtorob, waqt tinbix u tfixkil.

³⁰Is-sokor iżid l-herra tal-iblah hekk li jinfixel, idgħajjiflu ħiltu u jimlieh bil-ġrieħi.

³¹Fil-laqgħa fejn jinxtorob l-inbid teħodhiex mal-ġar tiegħek, u tkasbrux fix-xalar tiegħu. U ċanfira ma tgħidhilux, u ddejqux b’xi talba tiegħek.