Read Maltese Bible with DC – IL-BIBBJA IL-KOTBA MQADDSA BIN SIRAK 32 Bible Online

BIN SIRAK 32 - Maltese Bible with DC – IL-BIBBJA IL-KOTBA MQADDSA bible

BIN SIRAK 32

¹Il-pranzijiet Qegħduk f’ras il-mejda? Tintefaħx! Kun magħhom bħallikieku wieħed minnhom; aħseb fihom u wara oqgħod bilqiegħda.

²U meta tkun ħsibt għal kollox inxteħet bilqiegħda, ħa tifraħ magħhom, u għall-imġiba tajba tiegħek tikseb kuruna.

³Tkellem, int li int ixjeħ, għax jixraqlek; imma tkellem bl-għaqal u twaqqafx id-daqq.

⁴Fejn hemm ix-xalar, tintilifx fil-kliem; u toqgħodx tilgħabha tal-għaref barra minn ħinu.

⁵Bħal siġill b’rubin ingastat fid-deheb, hekk hu kunċert tal-mużika waqt xi festa tal-inbid.

⁶Bħal siġill bi żmerald tad-deheb, hekk hu d-daqq tal-mużika ma’ nbid ħelu.

⁷Tkellem, żagħżugħ, jekk għandhom bżonnok, l-aktar darbtejn jekk tkun mitlub.

⁸Tkellem fil-qosor, u għid ħafna fi ftit kliem, kun bħal wieħed li jaf imma fl-istess ħin iżomm is-skiet.

⁹Fost il-kbarat toqgħodx tintrefa’, u toqgħodx tpaċpaċ waqt li ħaddieħor ikun jitkellem.

¹⁰Qabel ir-ragħda tasal ħafifa l-berqa, qabel il-modestja tiġi l-grazzja.

¹¹Qum meta jkun sar il-ħin u tkunx l-aħħar wieħed, iġri lura lejn darek bla tnikkir.

¹²Hemmhekk ixxala u agħmel dak li għandek f’rasek, u tidnibx bi kliem kburi.

¹³U ta’ dan bierek ’il min ħalqek, u qed ixebbgħek bil-ġid tiegħu. Il-biża’ ta’ Alla

¹⁴Min jibża’ mill-Mulej jilqa’ twiddibu, u dawk li jbakkru biex ifittxuh isibu r-rieda tajba tiegħu.

¹⁵Min ifittex il-Liġi, jimtela biha, imma min juri wiċċ b’ieħor jitfixkel fiha.

¹⁶Dawk li jibżgħu mill-Mulej isirilhom il-ħaqq, u l-għemejjel tajba tagħhom jiddu bħad-dawl.

¹⁷Bniedem midneb ċanfira ma jagħtix kasha, u jgħawweġ il-Liġi skont kapriċċih.

¹⁸Bniedem bis-sens ma jwarrab ebda ħsieb; imma l-insolenti u l-imkabbar ma jċedix bil-biża’.

¹⁹Tagħmel xejn[46] mingħajr ħsieb, u mbagħad ma jkollokx għalfejn jisgħob bik.

²⁰Timxix fi triq kollha tfixkil, u ma titfixkilx darbtejn fiż-żrar.

²¹M’għandux ikollok fiduċja żejda fi triq watja,

²²u oqgħod għassa għal mogħdijietek.

²³Oqgħod għassa fuqek innifsek f’kulma tagħmel, għax dan hu l-ħarsien tal-kmandamenti.

²⁴Min joqgħod għal-Liġi jagħti kas tal-kmandamenti, u min jafda fil-Mulej ma jitlef xejn.