Read Maltese Bible with DC – IL-BIBBJA IL-KOTBA MQADDSA BIN SIRAK 34 Bible Online

BIN SIRAK 34 - Maltese Bible with DC – IL-BIBBJA IL-KOTBA MQADDSA bible

BIN SIRAK 34

¹Il-ħolm Tamiet fiergħa u qarrieqa ssibhom għand bniedem bla moħħ, u bil-ħolm il-boloh itellgħu l-ġwienaħ.

²Bħal wieħed jipprova jaqbad id-dellijiet jew jiġri wara r-riħ, hekk hu min jagħti kas tal-ħolm.

³Dan biswit dak: hekk hi dehra fil-ħolm; quddiem wiċċ xbieha ta’ wiċċ.

⁴X’jiġi msoffi b’ħaġa mniġġsa? U x’jiġi ppruvat veru b’ħaġa qarrieqa?

⁵Tbassir, teħbir, u ħolm kollhom frugħa, bħal thewdin il-moħħ ta’ mara fil-ħlas.

⁶Jekk mhumiex mibgħuta mill-Għoli bħallikieku qed iżurek, lanqas biss m’għandek taħseb fuqhom.

⁷Il-ħolm qarraq b’ħafna, u dawk li ttamaw fih stennew ta’ xejn.

⁸Mingħajr dal-qerq isseħħ il-Liġi, u l-milja tal-għerf qiegħda fuq fomm sinċier. L-ivvjaġġar

⁹Bniedem li jivvjaġġa, u min hu ta’ esperjenza, jaf x’għandu jgħid.

¹⁰Ftit jaf min ma ġarrabx; imma min ġera jitkellem ta’ wieħed li jifhem.

¹¹Rajt ħafna fil-vjaġġi tiegħi, u fhimt iktar milli nista’ ngħid bil-kliem.

¹²Ħafna drabi rajt il-mewt, imma ħlistha minħabba l-esperjenza.

¹³L-ispirtu ta’ dawk li jibżgħu mill-Mulej jibqa’ ħaj, għax it-tama tagħhom qiegħda f’dak li jsalvahom.

¹⁴Min għandu l-biża’ tal-Mulej minn xejn ma jibża’; u ma jaqtax qalbu, għax il-Mulej it-tama tiegħu.

¹⁵Hieni min jibża’ mill-Mulej! Fuq min se joqgħod? U fuq min se jserraħ?

¹⁶Għajnejn il-Mulej fuq dawk li jħobbuh; hu ta’ qawwa biex tistkenn warajh, u ta’ saħħa biex isserraħ fuqu, jagħtik kenn mir-riħ sħun u mis-sħana ta’ nofsinhar, iħarsek mit-tfixkil u jgħinek biex ma taqax,

¹⁷jerfgħek fl-ispirtu u jdawwallek għajnejk, jagħtik il-fejqan, il-ħajja, u l-barka. Is-sagrifiċċji

¹⁸Jekk xi ħadd joffri b’sagrifiċċju mill-qligħ inġust tiegħu l-offerta tkun daħka fil-wiċċ, u l-għotjiet ta’ min ma jħarisx il-Liġi ma jogħġbux il-Mulej.

¹⁹Ma jogħġbux lill-Għoli l-offerti ta’ dawk li ma jibżgħux minnu, u ma jitħallasx għad-dnubiet b’kotra ta’ sagrifiċċji.

²⁰Bħal min joqtol iben quddiem għajnejn missieru, hekk hu min joffri sagrifiċċju minn ħwejjeġ il-fqir.

²¹Il-ħobż ta’ min hu fil-bżonn hu l-għajxien tal-fqir, u min jeħodhulu hu bniedem imċappas bid-demm.

²²Joqtol il-proxxmu min jeħodlu l-għajxien tiegħu, u jċarċar id-demm min iżomm ħlas il-lavrant.

²³Wieħed jibni u ieħor iħott; x’se jieħdu aktar minn tbatija?

²⁴Wieħed jitlob u ieħor jisħet; leħen min se jisma’ s-Sid?

²⁵Min jinħasel wara li jkun mess ġisem mejjet u mbagħad jerġa’ jmissu, xi jkun ħa bil-ħasil tiegħu?

²⁶Hekk il-bniedem li jsum għal dnubietu u jerġa’ jmur jagħmel l-istess; min se jagħti widen għat-talba tiegħu? Xi jkun ħa billi jkun ċekken lilu nnifsu?