Read Maltese Bible with DC – IL-BIBBJA IL-KOTBA MQADDSA BIN SIRAK 36 Bible Online

BIN SIRAK 36 - Maltese Bible with DC – IL-BIBBJA IL-KOTBA MQADDSA bible

BIN SIRAK 36

¹Talba għall-ħelsien u l-qawmien ta’ Iżrael Ikollok ħniena minna, Sidna, Alla tal-ħolqien kollu, u ħares lejna, u niżżel fuq il-ġnus kollha l-biża’ tiegħek.

²Erfa’ idek fuq il-ġnus, il-barranin, ħa jaraw il-qawwa tiegħek.

³Bħalma quddiemhom urejt qdusitek bina, hekk ukoll quddiemna uri l-kobor tiegħek bihom.

⁴U jagħrfuk bħalma għarafniek aħna, li m’hemmx Alla ħliefek, Mulej.

⁵Uri sinjali ġodda u erġa’ agħmel għeġubijiet, agħti glorja lil idek u lil driegħek il-lemini.

⁶Qanqal l-għadab tiegħek, u żvoga l-korla tiegħek, eqred lil min jeħodha miegħek, u ġib fix-xejn lill-għadu tiegħek.

⁷Qassar iż-żmien u ftakar fil-ħalfa, ħa jixxandru għeġubijietek.

⁸Min ħelisha, ħa jinfena b’nar għadbek, u dawk li jagħmlu ħsara lill-poplu tiegħek ħa jintilfu.

⁹Farrak l-irjus tal-mexxejja tal-għedewwa, dawk li jgħidu: “M’hawnx għalina!”

¹⁰Iġma’ t-tribujiet kollha ta’ Ġakobb, u agħtihom wirthom bħalma għamilt fil-bidu.

¹¹Ikollok ħniena, Mulej, mill-poplu li jsejħulu b’ismek, minn Iżrael, li int għaddejtu b’ibnek il-kbir.

¹²Ħa tiġik ħasra mill-belt qaddisa tiegħek, Ġerusalemm, il-post tal-mistrieħ tiegħek.

¹³Imla ’l Sijon bl-għana ta’ tifħirek, u t-tempju tiegħek bil-glorja tiegħek.

¹⁴Ixhed għal dawk li int ħlaqt fil-bidu, u temm il-profeziji li ngħataw f’ismek.

¹⁵Agħti ħlashom lil dawk li jittamaw fik, u hekk jitwemmnu l-profeti tiegħek.

¹⁶Agħti widen, Mulej, għat-talba tal-qaddejja tiegħek, skont il-barka ta’ Aron fuq il-poplu tiegħek.

¹⁷U kull min hu fuq l-art jagħraf li int il-Mulej, o Alla ta’ dejjem. L-għażla bejn ħaġa u oħra

¹⁸Fl-istonku jintefa’ kull xorta ta’ ikel, imma hemm ikel itjeb minn ieħor.

¹⁹Bħalma l-ħalq itiegħem laħam l-annimali, hekk ukoll min jilħaqlu moħħu jintebaħ bi kliem qarrieq.

²⁰Min hu qalbu mħassra hu kaġun ta’ niket, imma l-bniedem imġarrab jaf kif għandu jħallsu. L-għażla

²¹Mara tilqa’ ’l kull raġel, imma xi bniet huma aħjar minn oħrajn.

²²Is-sbuħija ta’ mara tnissel hena fuq wiċċ dak li jkun, u tisboq kulma jixtieq bniedem.

²³U jekk il-kliem ta’ fommha hu ħelu u ħlejju, żewġha m’hawnx bħalu fost il-bnedmin.

²⁴Min jikseb mara jsib fortuna, għajnuna taqbel għal miegħu u kolonna biex iserraħ fuqha.

²⁵Fejn m’hemmx ħajt, dak li għandek jeħduhulek; u fejn m’hemmx mara r-raġel imdejjaq, jiġġerra ’l hemm u ’l hawn.

²⁶Għax min se jafda f’ħalliel ħafif, li jaqbeż bil-ġiri minn belt għal oħra.

²⁷Hekk ukoll bniedem li m’għandux bejta, u jorqod fejn jilħqu l-lejl.