Read Maltese Bible with DC – IL-BIBBJA IL-KOTBA MQADDSA BIN SIRAK 4 Bible Online

BIN SIRAK 4 - Maltese Bible with DC – IL-BIBBJA IL-KOTBA MQADDSA bible

BIN SIRAK 4

¹Ibni, iċċaħħadx lill-fqir mill-għajxien tiegħu, u l-bniedem fil-bżonn li jħares lejk tħallihx jistenna għal xejn.

²Lil min hu bil-ġuħ tnikkitx, u tkiddx lill-bniedem fil-bżonn.

³Qalb mikduda tkomplix tkiddha, u ’l min hu fil-bżonn tħallihx jistenna l-għotja tiegħek.

⁴Tiċħadx lil tallab fil-għaks, u ddawwarx wiċċek mill-fqir.

⁵Iddawwarx wiċċek minn wieħed fil-bżonn, u tagħti ’l ħadd l-okkażjoni li jisħtek;

⁶għax jekk wieħed jisħtek bl-imrar f’qalbu, it-talba tiegħu jismagħha l-Ħallieq tiegħu.

⁷Agħmel li tkun maħbub mill-ġemgħa, u baxxi rasek quddiem min hu kbir.

⁸Agħti widen lill-fqir, u roddlu bil-ħlewwa t-tislima.

⁹Min ma jsirx ħaqq miegħu eħilsu minn idejn l-inġusti, u taqtax qalbek meta tiġi biex tagħmel il-ħaqq.

¹⁰Kun missier għall-iltiema, u għal ommhom bħar-raġel tagħha, u ssir bħal iben l-Għoli, u jkun iħobbok iktar minn ommok. L-għerf għalliem

¹¹L-għerf jgħolli lil uliedu[5], u jieħu ħsieb dawk li jfittxuh.

¹²Min iħobbu, iħobb il-ħajja, u dawk li jbakkru għalih jimtlew bl-hena.

¹³Min jieħdu taħt idejh jiret il-glorja, u kull fejn imur, ibierku l-Mulej.

¹⁴Dawk li jaqduh, iservu l-Qaddis, u dawk li jħobbuh, iħobbhom il-Mulej.

¹⁵Min jisma’ minnu jagħmel ħaqq mill-ġnus, u min idur lejh jgħix f’daru b’moħħ mistrieħ.

¹⁶Jekk jafda fl-għerf, jiksbu, u l-għerf jibqa’ f’idejn nislu.

¹⁷Għax għall-ewwel jimxi miegħu f’mogħdijiet mgħawġa, iġib fuqu biża’ u nuqqas ta’ kuraġġ, jipprova fuqu d-dixxiplina tiegħu sa ma jnissillu l-fiduċja fih, u jġarrbu bl-ordnijiet tiegħu.

¹⁸Imbagħad jerġa’ dritt għal għandu u jferrħu, u jurih il-ħwejjeġ moħbija tiegħu.

¹⁹Jekk joħroġ mit-triq iħallih waħdu, u jagħtih f’idejn it-telfien tiegħu. Il-mistħija u r-rispett uman

²⁰Agħti kas taż-żmien u għasses għall-ħażen, u ġġibx għajb fuqek innifsek;

²¹għax hemm għajb li jġib miegħu d-dnub, u għajb li hu glorja u grazzja.

²²Tħarisx lejn l-uċuħ bi ħsara għalik innifsek, u tistħix hekk li tintilef.

²³Trażżanx kliemek meta hu meħtieġ,

²⁴għax l-għerf jingħaraf mill-kliem, u t-tagħlim minn dak li jgħid l-ilsien.

²⁵Tgħid xejn bil-maqlub tas-sewwa, u istħi għan-nuqqas ta’ tagħlim li għandek.

²⁶Tistħix tistqarr dnubietek, u teħodhiex mal-ilmijiet ta’ xmara.

²⁷Toqgħodx taħt bniedem iblah; u żżommx ma’ wieħed setgħani.

²⁸Issielet sal-mewt għas-sewwa, u l-Mulej Alla jissielet għalik.

²⁹Tkunx ħafif f’ilsienek, u tqil u bla ħeġġa fl-għemejjel tiegħek.

³⁰Tkunx qisek iljun f’darek, jew tfittex mal-qaddejja tiegħek.

³¹Tmiddx idek biex taqla’ u tiġbidhiex meta tiġi biex trodd.