Read Maltese Bible with DC – IL-BIBBJA IL-KOTBA MQADDSA BIN SIRAK 44 Bible Online

BIN SIRAK 44 - Maltese Bible with DC – IL-BIBBJA IL-KOTBA MQADDSA bible

BIN SIRAK 44

¹Sebħ Alla fl-istorja Infaħħru issa lil nies ta’ ġieħ, u lil missirijietna nisel wara ieħor.

²Il-Mulej ħejja għalihom glorja kbira, u wera l-kobor tiegħu minn dejjem.

³Uħud kienu jaħkmu f’saltniethom, u kienu nies li kellhom isem għal qawwiethom. Uħud kienu jagħtu parir għax kienu jifhmu, u kienu jħabbru bi profezija.

⁴Uħud kienu jmexxu l-poplu bil-parir tagħhom; u għax kienu jifhmu fi trawwim il-poplu, kienu jgħidu kliem għaref f’tagħlimhom.

⁵Uħud kienu jikkomponu l-mużika, u ħallew versi bil-kitba tagħhom.

⁶Uħud kienu nies għonja mogħnija b’saħħa, jgħixu fis-sliem fi djarhom.

⁷Dawn kollha kienu mweġġħin fi żmienhom, u f’jiemhom kienu jiftaħru bihom.

⁸Uħud minnhom ħallew isem warajhom, u hekk tingħad foħrithom.

⁹Imma hemm uħud li m’għandhomx tifkira, u għebu bħalkieku qatt ma għexu, u saru bħalkieku qatt ma kienu, u hekk ukoll uliedhom warajhom.

¹⁰Imma dawn huma n-nies ta’ ħniena, li l-għemejjel tajba tagħhom ma jintesewx.

¹¹Għand uliedhom jibqa’ l-ġid li kellhom.

¹²Nisilhom joqgħod għall-patt, u minħabba fihom uliedhom ukoll.

¹³Nisilhom jibqa’ għal dejjem, u sebħhom ma jitħassarx.

¹⁴L-iġsma tagħhom midfuna fis-sliem, imma isimhom jibqa’ ħaj minn nisel għal ieħor.

¹⁵L-għerf tagħhom jitkellem fuqu l-poplu, u tifħirhom ixxandru l-ġemgħa. Ħenok

¹⁶Ħenok[52] kien jogħġob lill-Mulej u l-Mulej ħadu, kien eżempju ta’ ndiema għall-ġenerazzjonijiet kollha. Noè

¹⁷Noè nstab ġust għalkollox, fi żmien l-għadab deher għall-oħrajn: bis-saħħa tiegħu baqa’ fdal fuq l-art meta ġie d-dilluvju.

¹⁸Saru miegħu pattijiet għal dejjem biex ħadd mill-ħajjin ma jerġa’ jinqered f’dilluvju. Abraham

¹⁹Abraham, missier kbir ta’ kotra ġnus, ma nstabx ieħor bħalu fil-ġieħ.

²⁰Kien iħares il-Liġi tal-Għoli u daħal miegħu f’patt; wettaq il-patt f’ġismu, meta ġarrbu Alla baqa’ fidil lejh.

²¹Għalhekk il-Mulej wiegħdu b’ġurament li b’nislu jitbierku l-ġnus, li jkattru daqs it-trab tal-art, u jgħolli nislu m’ogħla l-kwiekeb, u jagħtihom b’wirt minn baħar sa baħar, u mix-xmara[53] sa truf l-art. Iżakk u Ġakobb

²²U lil Iżakk wiegħdu hekk ukoll minħabba f’Abraham missieru.

²³Il-barka tal-bnedmin kollha u l-patt serraħhom fuq ras Ġakobb. Wettqu bil-barkiet tiegħu, u tah l-art b’wirtu; u qasamha għalih f’partijiet u tahom b’sehemhom lit-tnax-il tribù.