Read Maltese Bible with DC – IL-BIBBJA IL-KOTBA MQADDSA BIN SIRAK 45 Bible Online

BIN SIRAK 45 - Maltese Bible with DC – IL-BIBBJA IL-KOTBA MQADDSA bible

BIN SIRAK 45

¹Mosè U ħareġ minnu raġel qalbu tajba, li sab grazzja f’għajnejn il-bnedmin kollha; kien maħbub minn Alla u mill-bnedmin, Mosè, imbierka t-tifkira tiegħu.

²Tah glorja daqs dik tal-qaddisin, u kobor li jbażża’ l-għedewwa tiegħu.

³Għall-kelma tiegħu għamel l-għeġubijiet u tah glorja quddiem is-slaten; tah il-kmandamenti għall-poplu tiegħu u wrieh xi ħaġa mill-glorja tiegħu.

⁴Qaddsu għax kien fidil u umli, għażlu minn fost il-bnedmin kollha.

⁵Semmagħlu leħnu, u daħħlu fid-dalma, u wiċċ imb wiċċ[54] tah il-kmandamenti, il-Liġi tal-ħajja u l-għerf, biex jgħallem lil Ġakobb l-ordnijiet tal-patt, u d-digrieti tiegħu lil Iżrael. Aron

⁶Qajjem lil Aron, qaddis bħal Mosè, ħuh, mit-tribù ta’ Levi.

⁷Għamel miegħu patt għal dejjem, u tah is-setgħa ta’ qassis fuq il-poplu; żejnu b’ilbies mill-isbaħ, u xeddlu libsa ta’ glorja.

⁸Libbsu b’ġieħ perfett, u wettqu b’simboli ta’ setgħa: il-qalziet tal-għażel, il-libsa twila u l-efod.

⁹U dawru dawramejt bir-rummien, b’ħafna qniepen tad-deheb madwaru, biex isemmgħu d-daqq tagħhom mal-mixi tiegħu, biex jagħmlu ħoss jinstama’ fit-tempju, bħala tifkira għal ulied il-poplu tiegħu.

¹⁰Libbsu b’libsa sagra, bid-deheb, kulur il-vjola u l-porpra, xogħol tas-sengħa, bil-pettoral tal-ħaqq, l-Urim u t-Tummim, maljatura tal-iskarlatt, xogħol ta’ bniedem tas-sengħa;

¹¹b’ħaġar prezzjuż imnaqqax bħal siġill, imqiegħed fuq id-deheb, xogħol min jaħdem il-ħaġar, b’kitba mnaqqxa b’tifkira tal-għadd tat-tribujiet ta’ Iżrael;

¹²b’kuruna tad-deheb fuq it-turbant tiegħu, minquxa bis-siġill tal-konsagrazzjoni, oġġett ta’ stima ta’ min jiftaħar bih, xogħol ta’ ħila, tiżjin li l-għajnejn jitgħaxxqu bih.

¹³Fiż-żminijiet ta’ qablu ma kienx hemm ħwejjeġ sbieħ bħal dawn, u qatt ħadd ma libishom ħlief uliedu biss u nislu għal dejjem.

¹⁴Is-sagrifiċċji tiegħu jinħarqu għalkollox, darbtejn kuljum għal dejjem.

¹⁵Mosè kkonsagrah u dilku biż-żejt imqaddes; dan kien għalih patt għal dejjem u għal nislu sakemm idumu s-smewwiet, biex jaqdi lill-Mulej u jservi ta’ qassis, u jbierek il-poplu tiegħu f’ismu.

¹⁶Għażlu minn fost il-ħajjin kollha biex joffri sagrifiċċju lill-Mulej, inċens u sagrifiċċju jfuħ b’tifkira, biex ipatti f’isem il-poplu.

¹⁷Bil-kmandamenti tiegħu tah setgħa fl-ordnijiet u d-digrieti biex jgħallem lil Ġakobb il-Liġi, biex idawwal lil Iżrael bil-Liġi tiegħu.

¹⁸Oħrajn qamu kontrih u ġiethom l-għira għalih fid-deżert, in-nies ta’ madwar Datan u Abiram u l-ġemgħa ta’ Koraħ, bil-qilla u l-għadab.

¹⁹Dan rah il-Mulej u ma għoġbux, u bil-qilla ta’ għadbu temmhom f’salt wieħed, u għamel għeġubijiet kontrihom, u kielhom in-nar iħeġġeġ tiegħu.

²⁰U żied il-glorja ta’ Aron u tah il-wirt; tah b’sehmu l-aqwa frott tal-bikri, ħejjielu l-ewwel ħobż bix-xaba’.

²¹Għax jieklu s-sagrifiċċji tal-Mulej, li l-Mulej ta lilu u lil nislu.

²²Imma ma wiret xejn minn art il-poplu, u fost il-poplu m’għandux sehem, għax il-Mulej hu sehmu u wirtu. Fineħas

²³Fineħas bin Elgħażar hu t-tielet wieħed fil-glorja għall-ħeġġa tiegħu fil-biża’ tal-Mulej; hu żamm sħiħ waqt li l-poplu ħareġ minn triqtu, meta ruħu kienet ħerqana fi tjubitha; u ħallas għal Iżrael.

²⁴Minħabba f’hekk sar miegħu patt ta’ sliem, li jkun imexxi s-santwarju u l-poplu tiegħu, biex hu u nislu jkollhom il-ġieħ tas-saċerdozju għal dejjem.

²⁵U l-patt ma’ David bin Ġesse, mit-tribù ta’ Ġuda, kien li wirt is-sultan jgħaddi biss minn iben għal iben, imma wirt Aron jgħaddi għand nislu kollu.

²⁶Jagħtikom il-Mulej l-għerf f’qalbkom biex tagħmlu ħaqq mill-poplu tiegħu bil-ġustizzja, biex ma jgħibx it-tajjeb tiegħu, u l-glorja tiegħu tibqa’ għall-ġenerazzjonijiet tiegħu.