Read Maltese Bible with DC – IL-BIBBJA IL-KOTBA MQADDSA BIN SIRAK 46 Bible Online

BIN SIRAK 46 - Maltese Bible with DC – IL-BIBBJA IL-KOTBA MQADDSA bible

BIN SIRAK 46

¹Ġożwè Qawwi fit-taqbid kien Ġożwè bin Nun, u suċċessur ta’ Mosè bħala profeta. Dan ismu miegħu: kien feddej kbir tal-magħżulin ta’ Alla, biex jitħallas mill-għedewwa li qamu għalihom, u hekk jagħti wirtu lil Iżrael.

²Kemm kien ta’ ġieħ meta rafa’ jdejh u venven ix-xabla kontra l-ibliet!

³Min qatt waqaf hekk qablu? Għax hu mexxa l-gwerer tal-Mulej.

⁴Ma kienx b’idu li waqqaf ix-xemx, u jum wieħed twal daqs tnejn?

⁵Sejjaħ lill-Għoli, is-Setgħan, waqt li għafas fuqu l-għadu minn kull naħa, u l-Mulej ta’ kobor bla qjies wieġbu b’xita ta’ silġ li niżlet b’saħħa kbira.

⁶Ġieb gwerra fuq dak il-ġens u fin-niżla xejjen lil dawk li waqfulu, biex il-ġnus jagħrfu l-ħila tiegħu fit-taqbid, għax kien jiġġieled taħt il-ħarsien tal-Mulej. Kaleb

⁷Għax hu mexa wara l-Qawwi, u fi żmien Mosè għamel att ta’ ħniena, hu u Kaleb bin Ġefunni, meta waqfu lill-ġemgħa u ma ħallewhiex tidneb, u sikktu tgergir malizzjuż.

⁸U dawn it-tnejn biss inħelsu minn sitt mitt elf li kienu miegħu, biex idaħħlu lil Iżrael f’wirtu, fl-art li tnixxi ħalib u għasel.

⁹U l-Mulej ta saħħa lil Kaleb, li baqgħet għandu sa xjuħitu, biex jitla’ f’naħa għolja tal-art, li nislu ħadha f’idejh b’wirt,

¹⁰biex hekk jaraw l-ulied kollha ta’ Iżrael kemm hu sewwa li wieħed jimxi wara l-Mulej. L-Imħallfin

¹¹L-imħallfin ukoll, kull wieħed b’ismu, li qalbhom ma kinitx waqgħet fiż-żina, u li ma tbegħdux mill-Mulej: tkun imbierka t-tifkira tagħhom!

¹²Jalla għadamhom jieħu r-ruħ minn fejn qiegħed, u isimhom jiġġedded u jissebbaħ f’uliedhom. Samwel

¹³Samwel kien maħbub mill-Mulej tiegħu; bħala l-profeta tal-Mulej waqqaf is-saltna, u bid-dilka ħatar mexxejja fuq il-poplu tiegħu.

¹⁴Għamel ħaqq mill-ġemgħa bil-Liġi tal-Mulej, u l-Mulej ħa ħsieb Ġakobb.

¹⁵Bil-fedeltà tiegħu deher li kien tabilħaqq profeta, u minn kliemu kont tara li kien ta’ min joqgħod fuqu.

¹⁶Sejjaħ lill-Mulej, il-Qawwi, meta l-għedewwa tiegħu kienu qed irossu fuqu minn kull naħa, bl-offerta ta’ ħaruf tal-ħalib.

¹⁷U l-Mulej riegħed mis-smewwiet, u samma’ leħnu f’ħoss kbir;

¹⁸u ġieb fix-xejn il-mexxejja ta’ Tir u l-kapijiet tal-Filistin.

¹⁹U qabel ma wasallu żmien il-mistrieħ ta’ dejjem, xehed quddiem il-Mulej u l-midluk tiegħu: “Ebda ġid, lanqas biss qorq, qatt ma ħadt lil ħadd.” U l-ebda bniedem ma qam jixlih.

²⁰Saħansitra wara li miet ħabbar, u wera lis-sultan it-tmiem tiegħu, u mill-art għolla leħnu bil-profezija biex iħassar ħażen il-poplu.