Read Maltese Bible with DC – IL-BIBBJA IL-KOTBA MQADDSA BIN SIRAK 47 Bible Online

BIN SIRAK 47 - Maltese Bible with DC – IL-BIBBJA IL-KOTBA MQADDSA bible

BIN SIRAK 47

¹David Warajh qam Natan jipprofetizza fi żmien David.

²Bħalma jingħażel il-grass mis-sagrifiċċju tas-sliem, hekk ukoll intgħażel David minn ulied Iżrael.

³Kien jilgħab bl-iljuni bħalkieku gidjien, u bl-orsijiet bħalkieku ħrief mill-merħla.

⁴F’żgħożitu ma qatilx ġgant u neħħa għajb minn fuq il-poplu meta rafa’ idu b’ċagħka fl-iżbandola u tafa’ fl-art il-kburija ta’ Gulija?

⁵Għax sejjaħ lill-Mulej, lill-Għoli, u tah is-saħħa t’idu l-leminija biex joqtol bniedem ta’ ħila għall-ġlied, ħa jgħolli l-qawwa tal-poplu tiegħu.

⁶Hekk tawh glorja għall-għaxart elef, u faħħruh huma u jbierku l-Mulej meta tawh il-kuruna ta’ glorja.

⁷Għax qered l-għedewwa ta’ madwaru, u ġieb fix-xejn il-Filistin li kienu kontrih, u farrak il-qawwa tagħhom sal-lum.

⁸F’kulma għamel radd ħajr lill-Qaddis, lill-Għoli, bi kliem ta’ glorja, u għanna b’qalbu kollha, u ħabb lil Dak li għamlu.

⁹U qiegħed għannejja quddiem l-artal biex iħollu leħenhom b’melodija ħelwa.

¹⁰Il-festi tahom il-ġmiel tagħhom, u sebbaħhom għall-aħħar iż-żminijiet, biex hekk jingħata t-tifħir lill-isem qaddis ta’ Alla, sa minn filgħodu jidwi l-għana fit-tempju.

¹¹Il-Mulej neħħielu dnubietu, u għollielu għal dejjem qawwietu, u għamel miegħu patt tas-slaten, u tah tron ta’ glorja f’Iżrael. Salamun

¹²Warajh qam iben għaref u bis-saħħa tiegħu għammar fil-wisa’.

¹³Salamun kien isaltan f’jiem ta’ sliem; lilu l-Mulej tah mistrieħ minn kull naħa, biex jibnilu dar għal ismu, u jħejjilu tempju għal dejjem.

¹⁴Kemm sirt għaref f’żgħożitek! U bħal xmara kont tfur bid-dehen!

¹⁵B’moħħok imraħt fl-art, imlejtha bi qwiel ta’ ħsieb tqil.

¹⁶Ismek wasal sa gżejjer imbiegħda, u kont maħbub għas-sliem tiegħek.

¹⁷Għall-għanjiet, il-qwiel, il-parabboli, u t-tifsiriet tiegħek, stagħġbu bik l-artijiet.

¹⁸F’isem il-Mulej Alla, li jsejħulu Alla ta’ Iżrael, ġmajt deheb daqskieku landa, u mtlejt bil-fidda daqskieku ċomb.

¹⁹Imma mbagħad imteddejt maġenb in-nisa, u sfajt maħkum mill-ġibdiet ta’ ġismek.

²⁰Tebbajt ġieħek u niġġist nislek; ġibt għadab fuq uliedek, u tnikktu minħabba bluhatek:

²¹saltnatek inqasmet tnejn, u minn Efrajm ħarġet saltna li ma qagħditx għalik.

²²Imma l-Mulej ma jwarrabx ħnientu; lanqas iħalli xi kelma tiegħu tisfa fix-xejn; ma jeqridx ulied il-magħżul tiegħu, u lanqas ma jneħħi ulied dak li ħabbu; u ħalla fdal lil Ġakobb, u għal David għerq minn nislu. Reħobogħam

²³U Salamun mar jistrieħ ma’ missirijietu, u ħalla warajh wieħed minn uliedu, kollu bluha u nieqes mill-għaqal u mid-dehen fost il-poplu, Reħobogħam, li bi mġibtu qajjem il-poplu kontrih. Ġerobogħam

²⁴Imbagħad, Ġerobogħam bin Nebat, li waqqa ’l Iżrael fid-dnub, u qiegħed lil Efrajm fit-triq tad-dnub; dnubiethom kotru għall-aħħar hekk li keċċewhom minn arthom.

²⁵Fittxew kull xorta ta’ ħażen sakemm ġie fuqhom ħlashom.