Read Maltese Bible with DC – IL-BIBBJA IL-KOTBA MQADDSA BIN SIRAK 48 Bible Online

BIN SIRAK 48 - Maltese Bible with DC – IL-BIBBJA IL-KOTBA MQADDSA bible

BIN SIRAK 48

¹Elija Imbagħad qam qisu nar Elija, il-profeta, u kelmtu kienet taqbad bħal ħuġġieġa.

²Hu ġieb fuqhom il-ġuħ, u fil-ħeġġa tiegħu ċekkinhom fl-għadd.

³B’kelmet il-Mulej għalaq is-smewwiet, u tliet darbiet niżżel ukoll in-nar.

⁴Kemm kont imsebbaħ, Elija, f’għeġubijietek! U min jista’ jiftaħar daqsek?

⁵Qajjimt mejjet mill-mewt, minn Art l-Imwiet b’kelmet l-Għoli.

⁶Tfajt mal-art slaten sa ntilfu u nies ta’ ġieħ mis-sodda tagħhom.

⁷Smajt ċanfira fis-Sinaj, u f’Ħoreb sentenza ta’ kastig.

⁸Dlikt slaten biex jitħallsu u profeti biex jilħqu warajk.

⁹Kont meħud f’riefnu tan-nar f’karru bi żwiemel tan-nar.

¹⁰Int, li kien miktub għalik, li kellek iċċanfar għal żmien, biex tberred għadab Alla qabel ma jħeġġeġ, biex iddawwar qalb il-missier lejn ibnu, u biex terġa’ tqajjem tribujiet Ġakobb.

¹¹Imberkin dawk li jarawk u dawk li raqdu fl-imħabba; għax żgur li aħna wkoll ikollna l-ħajja. Eliżew

¹²Kien Elija li nħataf minn riefnu u Eliżew imtela bl-ispirtu tiegħu. Fi żmienu ma kienx jirtogħod quddiem il-kapijiet, u ħadd ma ħakem fuqu.

¹³Xejn ma kien tqil wisq għalih, sa wara mewtu baqa’ profeta f’qabru.

¹⁴F’ħajtu għamel għeġubijiet, u f’mewtu l-għemejjel tiegħu kienu tal-għaġeb. Infedeltà u kastig

¹⁵Madankollu l-poplu ma nidimx, u ma reġax lura minn dnubietu, sakemm ma ġiex itturufnat minn artu, u mxerred mal-art kollha.

¹⁶U kien fadal poplu ta’ ftit nies, imma b’mexxej mid-dar ta’ David. Uħud minnhom għamlu dak li jogħġob lill-Mulej, imma oħrajn kattru dnubiethom. Ħeżekija

¹⁷Ħeżekija saħħaħ beltu, u daħħal l-ilma fil-qalba tagħha; ħaffer bil-ħadid fil-blat, u bena ġwiebi għall-ilma.

¹⁸F’jiemu tala’ Sanħerib, u bagħat lil Rabsaki, u rafa’ dejh fuq Sijon, u fi kburitu qagħad jiftaħar.

¹⁹Imbagħad bdew jirtogħdu qlubhom u idejhom, u qabadhom uġigħ bħal ta’ mara fil-ħlas.

²⁰U sejħu lill-Mulej li hu tal-ħniena, u meddew idejhom lejh. U l-Qaddis malajr semagħhom mis-sema, u fdiehom b’id Isaija.

²¹Laqat il-kamp tal-Assiri, u qeridhom l-anġlu tiegħu. Isaija

²²Għax Ħeżekija għamel dak li jogħġob lill-Mulej, u żamm sħiħ fi triq David missieru, kif ordnalu Isaija l-profeta, li kien kbir u ta’ min jorbot fuqu għad-dehriet li kellu.

²³F’jiemu mxiet lura x-xemx, u tawwal ħajjet is-sultan.

²⁴Bis-saħħa tal-ispirtu ra l-ħwejjeġ tal-aħħar, u sabbar lill-imnikktin ta’ Sijon.

²⁵Wera x’għandu jiġri sa tmiem iż-żmien, u ħwejjeġ moħbija qabel ma ġraw.