Read Maltese Bible with DC – IL-BIBBJA IL-KOTBA MQADDSA BIN SIRAK 50 Bible Online

BIN SIRAK 50 - Maltese Bible with DC – IL-BIBBJA IL-KOTBA MQADDSA bible

BIN SIRAK 50

¹Xmun il-qassis il-kbir Kien il-qassis il-kbir Xmun bin Onija[55], li tul ħajtu sewwa t-tempju, u f’jiemu saħħaħ is-santwarju.

²Hu qiegħed is-sisien tal-ħajt għoli u dobblu, l-ilqugħ għolja li jdawru t-tempju.

³F’jiemu tħaffret ġiebja għall-ilma, vaska kbira fid-dawra tagħha qisha baħar.

⁴Ħaseb biex isalva l-poplu tiegħu mill-waqgħa u saħħaħ il-belt biex tilqa’ għal assedju.

⁵Kemm kien ikun imsebbaħ bil-poplu madwaru, meta kien joħroġ mis-santwarju minn wara l-purtiera!

⁶Bħall-kewkba ta’ filgħodu qalb is-sħab, bħall-qamar fil-jiem meta jkun mimli;

⁷bħax-xemx tiddi fuq it-tempju tal-għoli, u bħall-qawsalla tilma fi sħab jiddi;

⁸bħal ward fil-jiem tar-rebbiegħa, bħal ġilji ħdejn nixxiegħa ilma, bħal żarġuna ta’ inċens fiċ-ċensier;

⁹bħal nar u inċens fiċ-ċensier; bħal oġġett tad-deheb battut imżejjen b’kull xorta ta’ ħaġar prezzjuż;

¹⁰bħal siġra taż-żebbuġ li ħarġet il-frott, u bħal siġra taċ-ċipress għolja sas-sħab.

¹¹Meta kien jitfa’ fuqu l-ilbies tal-glorja, u kien ikun imlibbes sabiħ għall-aħħar, meta kien jitla’ l-artal imqaddes, u kien jimla bil-glorja l-bitħa tat-tempju,

¹²meta kien jilqa’ l-ishma minn idejn il-qassisin, wieqaf maġenb il-qiegħa tan-nar tal-artal, b’ħutu madwaru bħal kuruna, kien ikun qisu ċedru żgħir tal-Libanu, u huma madwaru bħalkieku siġar tal-palm;

¹³meta wlied Aron kollha fil-glorja tagħhom, bl-offerti tal-Mulej f’idejhom, weqfin quddiem il-ġemgħa kollha ta’ Iżrael,

¹⁴hu u jtemm ir-rit tal-liturġija fuq l-artal, u kien iħejji bl-ordni l-offerta tal-Għoli li jista’ kollox;

¹⁵kien imidd idejh lejn il-bieqja, u jferragħ minnha meraq tal-għeneb, kien isawbu man-naħa t’isfel tal-artal; riħa tfuħ lill-Ogħla, is-sultan ta’ kulħadd;

¹⁶imbagħad ulied Aron kienu jgħajtu, u kienu jdoqqu trumbetti tal-metall battut, u kienu jagħmlu ħoss kbir li jinstama’ minn kullimkien, b’tifkira quddiem Alla l-Għoli;

¹⁷imbagħad il-poplu kollu f’daqqa fil-pront jinżel wiċċu mal-art biex jagħti qima lill-Mulej tiegħu, lil dak li jista’ kollox, Alla l-Għoli;

¹⁸u l-għannejja kienu jgħannu għanjiet ta’ tifħir, b’leħenhom jidwi f’melodija,

¹⁹u l-poplu kien jagħmel talb lill-Mulej, lill-Għoli, kien jitlob quddiem Dak li hu ħanin, sa ma jasal fi tmiemu l-ordni taċ-ċelebrazzjoni, u kienu jtemmu r-rit tal-liturġija;

²⁰imbagħad hu u nieżel Xmun kien jgħolli jdejh fuq il-ġemgħa kollha ta’ wlied Iżrael biex minn fommu jagħtihom il-barka tal-Mulej, imkabbar b’isem il-Mulej;

²¹u n-nies kienet tinżel tagħti qima għat-tieni darba biex tilqa’ l-barka mingħand l-Għoli. Twissija

²²U issa bierku lil Alla tal-ħolqien kollu, li ħwejjeġ tal-għaġeb jagħmel ma’ kullimkien, li minn ġuf ommna jgħollilna jiemna, u li jimxi magħna skont ħnientu.

²³Jalla jagħtina hena tal-qalb, u li jkollna s-sliem fi żmienna, f’Iżrael, bħalma kellna fl-imgħoddi.

²⁴Ħa juri magħna l-ħniena u l-fedeltà tiegħu, u jifdina fi żmienna. Qawl numeriku

²⁵B’żewġt iġnus hi mxabba’ ruħi, u t-tielet wieħed mhu ġens xejn:

²⁶dawk li joqogħdu fuq l-għolja ta’ Xegħir[56] u l-Filistin, u l-poplu iblah li joqgħod f’Sikem. Għeluq

²⁷Tagħlim ta’ dehen u għerf jien ktibt f’dan il-ktieb, Ġożwè bin Sirak[57], bin Elgħażar, ta’ Ġerusalemm, li sawwab għerfu minn qalbu.

²⁸Hieni min jedha b’dawn il-ħwejjeġ, u għaref hu min idaħħalhom f’qalbu!

²⁹Jekk jagħmilhom, ikun jiflaħ għal kollox, għax dawl il-Mulej ikun il-mogħdija tiegħu.