Read Maltese Bible with DC – IL-BIBBJA IL-KOTBA MQADDSA BIN SIRAK 51 Bible Online

BIN SIRAK 51 - Maltese Bible with DC – IL-BIBBJA IL-KOTBA MQADDSA bible

BIN SIRAK 51

¹Innu ta’ radd il-ħajr Irroddlok ħajr, Mulej, sultan tiegħi, u nfaħħrek, Alla Salvatur tiegħi, irrodd ħajr lil ismek,

²għaliex int sirt kenn u għajnuna għalija, u fdejtli ’l ġismi mit-telfien, u min-nassa ta’ lsien giddieb u minn xufftejn qarrieqa. Quddiem dawk li daru għalija kont ta’ għajnuna għalija u fdejtni,

³skont il-kobor tal-ħniena u l-isem tiegħek, minn snien dawk li kienu lesti li jqattgħuni, minn idejn dawk li kienu jfittxu li joqtluni, mill-ħafna għawġ li ġarrabt,

⁴min-nar madwari li kien jifgani, u minn qalb ħuġġieġa li ma qabbadthiex jien,

⁵mill-fond tal-ġewwieni ta’ Art l-Imwiet, u minn ilsien iniggeż u kliem qarrieq -

⁶il-qlajja’ ta’ lsien ħażin quddiem is-sultan. Ruħi kienet qorbot lejn il-mewt, u ħajti kienet għoddha f’xifer il-qabar.

⁷Dawruni minn kull naħa, u ma kienx hemm min jgħinni; ħarist biex xi ħadd jagħtini l-għajnuna, imma ma kienx hemm min.

⁸Imma ftakart fil-ħniena tiegħek, Mulej, fl-għemejjel tiegħek fiż-żmien ta’ dari, għax int teħles lil dawk li stennewk u ssalvahom minn idejn l-għedewwa.

⁹Imbagħad għollejt mill-art it-talba tiegħi, u tlabtek teħlisni mill-mewt.

¹⁰U sejjaħt lill-Mulej: “Mulej, int missieri, titlaqnix f’jiem l-għawġ, meta jiena bla għajnuna kontra l-kburin. Infaħħar ismek il-ħin kollu, u ngħannilek b’radd il-ħajr.”

¹¹U int smajt it-talba tiegħi, għax salvajtni mit-telfien, u ħlistni minn żmien ikrah.

¹²Għalhekk irroddlok ħajr u nfaħħrek, u nbierek l-isem tal-Mulej. Poeżija fuq it-tiftix għall-għerf

¹³Meta kont għadni żagħżugħ, qabel ma bdejt nivvjaġġa, fittixt l-għerf bid-dieher fit-talb tiegħi.

¹⁴Quddiem it-tempju kont nitlob għalih, u nibqa’ nfittxu sal-aħħar.

¹⁵Xħin tiżhar id-dielja sa ma ssajjar l-għeneb, qalbi kienet tithenna bl-għerf. Meddejt riġli f’mogħdija dritta, minn żgħożiti kont insus warajh.

¹⁶Tajtu ftit widen u ngħatali, imma sibt għalija ħafna tagħlim.

¹⁷Bih imxejt ’il quddiem; lil Min tani l-għerf glorja nagħtih.

¹⁸Għax għandi f’moħħi li nġib ruħi bl-għerf, u sirt ħerqan għat-tajjeb u ma jkollix għax nistħi.

¹⁹Tħabatt ħafna biex nikseb l-għerf, u ħarist il-Liġi bir-reqqa. Erfajt idejja ’l fuq u bkejt għax ma kontx nagħrfu.

²⁰Mexxejt lili nnifsi lejn l-għerf imma sibtu fis-safa. Miegħu kont mill-ewwel għal qalbi, u għalhekk ma nibqax waħdi.

²¹Kont imħeġġeġ ġo fija biex infittxu, u għalhekk ksibt ħaġa tajba.

²²Il-Mulej tani lsieni bi ħlas tiegħi, u bih jien infaħħru.

²³Ersqu lejja intom li m’għandkomx tagħlim, u ħudu postkom fl-iskola tiegħi.

²⁴Għaliex tgħidu li intom lura f’dawn il-ħwejjeġ, u li rwieħkom huma bl-għatx għall-aħħar?

²⁵Ftaħt fommi u tkellimt, “Iksbu għalikom l-għerf bla ma tħallsu l-flus.

²⁶Middu għonqkom għall-madmad tiegħu, u qisu li ruħkom tilqa’ t-tagħlim. Hu qrib biex issibuh.

²⁷Araw b’għajnejkom kemm tħabatt ftit, imma sibt għalija ħafna mistrieħ.

²⁸Ixtru t-tagħlim b’somma kbira tal-fidda, u tiksbu bih ħafna deheb.

²⁹Jalla rwieħkom jifirħu fil-ħniena tal-Mulej u ma tistħux fit-tifħir tiegħu.

³⁰Aqdu dmirkom qabel jasal iż-żmien, u l-Mulej iħallaskom fi żmienu.” L-Għerf ta’ bin Sirak.