Read Maltese Bible with DC – IL-BIBBJA IL-KOTBA MQADDSA BIN SIRAK 6 Bible Online

BIN SIRAK 6 - Maltese Bible with DC – IL-BIBBJA IL-KOTBA MQADDSA bible

BIN SIRAK 6

¹għax isem ħażin iġib miegħu għajb u twiddib; hekk jiġrilu min jgħid issa ħaġa u issa oħra.

²Titkabbarx għax moħħok jgħidlek hekk, li ma tmurx daqs barri ttertaq ruħek.

³Taħli l-weraq tiegħek u teqred il-frott tiegħek, u tispiċċa qisek zokk niexef.

⁴Karattru ħażin jeqred il-bniedem, u jwaqqgħu għal żufjett l-għedewwa tiegħu. Il-ħbiberija vera

⁵Fomm li jagħti gost ikattar il-ħbieb, u lsien jitkellem tajjeb ikollu ħafna min jirrispettah.

⁶Ħa jkunu ħafna dawk li jsellmulek, imma wieħed f’elf dawk li jagħtuk parir.

⁷Meta tikseb ħabib, iksbu wara li tkun ġarrabtu, u tkunx mgħaġġel biex tafda fih.

⁸Għax hemm min hu ħabib meta jaqbillu, u ma jiqafx miegħek dakinhar tal-għawġ tiegħek;

⁹u hemm il-ħabib li jinbidel f’għadu, u b’għajb tiegħek jikxef li għandu tilwima miegħek;

¹⁰u hemm il-ħabib li joqgħod miegħek mal-mejda, imma ma jiqafx miegħek dakinhar tal-għawġ;

¹¹fit-tajjeb tiegħek ikun qisu int, u b’wiċċu minn quddiem jikkmanda lill-qaddejja tiegħek;

¹²imma jekk tkun magħkus, idur kontrik u jinħeba minn quddiem wiċċek.

¹³Inqata’ mill-għedewwa tiegħek, u oqgħod b’seba’ għajnejn fuq ħbiebek.

¹⁴Kenn sod il-ħabib ta’ min jafda fih, u min isib wieħed ikun sab teżor.

¹⁵Ma tibdlu ma’ xejn ħabib tafdah, u m’għandekx kejl biex tkun taf xi jsarraf.

¹⁶Duwa tal-ħajja ħabib tafdah, u jsibu minn jibża’ mill-Mulej.

¹⁷Min jibża’ mill-Mulej imexxi tajjeb il-ħbiberija tiegħu, u kif ikun hu, ikun ħabibu. It-taħriġ fl-għerf

¹⁸Ibni, minn ċkunitek agħżel li titgħallem, u sa ma jibjad xagħrek issib l-għerf.

¹⁹Idħol għalih bħal wieħed jaħrat u jiżra’, u stenna l-frott bnin tiegħu; għax meta taħdem għalih tegħja ftit, imma ma ddumx ma tiekol mill-frott li jagħmel.

²⁰Hu aħrax ħafna ma’ min hu bla tagħlim, u min hu bla moħħ ma joqgħodx miegħu:

²¹għax l-għerf jagħfas fuqu bħal blata tqila, u ma jitlifx żmien biex jeħles minnha.

²²Għax l-għerf ismu miegħu, lil ħafna ma jidhrilhomx.

²³Agħti widen, ibni, u ilqa’ fehemti, u tiċħadx il-parir li nagħtik.

²⁴Qiegħed riġlejk fil-ktajjen tal-għerf, u għonqok fl-irbit tiegħu;

²⁵agħti spalltek ħa ġġorr il-piż tiegħu, u tiddejjaqx mill-ilġiem tiegħu.

²⁶Ejja għandu b’ruħek kollha, u b’ħiltek kollha żomm fi triqatu.

²⁷Stħarreġ għalih u fittxu, u ssir tafu, u meta jiġi taħt idejk, titilqux;

²⁸għax fl-aħħar issib il-mistrieħ li jagħti, u jinbidel f’ferħ għalik;

²⁹u jkunu għalik il-ktajjen bħal kenn sod, u l-irbit tiegħu bħal lbies ta’ glorja.

³⁰Il-madmad tiegħu tiżjin tad-deheb, u lġiemu ħabel tal-porpra.

³¹Tilbsu daqskieku lbies ta’ glorja, u tqiegħdu fuqek daqskieku kuruna ta’ ferħ.

³²Jekk tixtieq, ibni, tista’ titgħallem, u jekk tagħti saħħtek għalih, tkun moħħok jilħaqlek.

³³Jekk tħobb tisma’, titgħallem; u jekk tagħti widen, issir għaref.

³⁴Oqgħod fejn jiltaqgħu x-xjuħ; u fejn hemm xi għaref oqgħod ħdejh.

³⁵Agħti widen għal kull kelma ta’ Alla, u qwiel ta’ għaqal m’għandhomx jaħarbulek.

³⁶Jekk issib xi bniedem li jifhem, bakkar biex tmur għandu; u saqajk jaħfu l-għatba ta’ biebu.

³⁷Ikun moħħok fil-kmandamenti tal-Mulej, u aħseb dejjem fil-preċetti tiegħu; hu jqawwilek qalbek, u tinqatagħlek ix-xewqa li tkun għaref.