Read Maltese Bible with DC – IL-BIBBJA IL-KOTBA MQADDSA BIN SIRAK 7 Bible Online

BIN SIRAK 7 - Maltese Bible with DC – IL-BIBBJA IL-KOTBA MQADDSA bible

BIN SIRAK 7

¹Pariri diversi Tagħmilx il-ħażin, u l-ħażen ma jiġix fuqek;

²tbiegħed mill-inġustizzja, u hi twarrab minnek.

³Ibni, tiżrax fejn ħartet l-inġustizzja, li ma taħsadhiex seba’ darbiet aktar.

⁴Titlobx lill-Mulej għall-ogħla post, lanqas lis-sultan għal post ta’ ġieħ.

⁵Tilgħabhiex tal-ġust quddiem il-Mulej, u quddiem is-sultan toqgħodx turi kemm taf.

⁶Tixtieqx li ssir imħallef, li ma tmurx tkun bla ħila biex tneħħi l-inġustizzja, li ma tmurx ixxaqleb lejn min jiflaħ, u tagħmel ħsara lis-sewwa tiegħek.

⁷Toffendix lil kotra nies fil-belt, u tbaxxix ruħek quddiem ġemgħa nies.

⁸Tagħmilx dnub għal darba tnejn, għax lanqas fl-ewwel wieħed m’int ħieles mill-kastig.

⁹Tgħidx, “Hu jħares lejn il-kotra tal-offerti tiegħi, u jilqagħhom meta noffrihom lil Alla l-Għoli.”

¹⁰La taqtax qalbek fit-talb tiegħek, u tonqosx li tagħmel il-karità.

¹¹Tidħakx bi bniedem qalbu sewda, għax hemm min ibaxxi u jgħolli.

¹²Tiżrax gideb fuq ħuk, u tagħmilx hekk lanqas ma’ ħabibek.

¹³Titħajjar qatt li tgħid xi gidba, għax min iħobb jigdeb ma jieħu xejn.

¹⁴Tlablabx fit-tul fil-laqgħa tax-xjuħ, u ttennix kliemek fit-talb tiegħek.

¹⁵Tobgħodx ix-xogħol ta’ tbatija, jew xogħol ir-raba’ li nħalaq mill-Għoli.

¹⁶Tkunx magħdud mal-ġemgħa tal-midinbin; ftakar li l-Mulej ma jdumx ma jagħdab.

¹⁷Umilja ruħek ħafna, għax ħlas il-ħżiena nar u dud.

¹⁸Tibdilx ħabib mal-flus, jew lil ħuk l-għażiż mad-deheb ta’ Ofir[7].

¹⁹Mara għaqlija u twajba titlifhiex, issaħħrek għal warajha aktar mid-deheb.

²⁰Taħqarx l-ilsir fidil fix-xogħol tiegħu, jew lill-qaddej mikri li jaqdik tajjeb.

²¹Ilsir għaqli ħobbu, u tiċħadlux il-ħelsien tiegħu[8]. It-tfal

²²Għandek imrieħel? Ħu ħsiebhom, u jekk jiswewlek, ħa jibqgħu għandek.

²³Għandek it-tfal? Rabbihom sewwa, u ġagħalhom minn ċkunithom ibaxxu rashom.

²⁴Għandek ulied bniet? Ħu ħsieb ġieħhom, imma tkunx wisq ħelu magħhom.

²⁵Żewweġ ’il bintek, u tkun għamilt biċċa xogħol kbira, imma agħtiha lil raġel għaqli.

²⁶Martek hi għal qalbek? Titfagħhiex ’il barra, imma tafdax f’waħda li ma ġġibhiex. Il-ġenituri

²⁷Weġġaħ lil missierek b’qalbek kollha, u tinsiex uġigħ il-ħlas ta’ ommok.

²⁸Ftakar li kienu huma li ġibuk fid-dinja; biex se tħallashom għal dak li tawk? Il-qassisin

²⁹Agħti qima lill-Mulej b’qalbek kollha, u agħti ġieħ lill-qassisin tiegħu.

³⁰Ħobb lil Min ħalqek b’ħiltek kollha, u titlaqx lil dawk li jaqduh.

³¹Ibża’ mill-Mulej u weġġaħ lill-qassis, u agħtih sehmu bħalma ġejt ikkmandat: il-frott tal-bikri, il-vittma tar-riparazzjoni, l-offerta tal-ispalel, il-vittma tal-konsagrazzjoni u l-ewwel fost il-ħwejjeġ ikkonsagrati. Il-fqar u l-magħkusin

³²Midd idek għall-fqir ukoll, u sħiħa tkun il-barka tiegħek.

³³L-għotja tiegħek issaħħar il-ħajjin kollha, u l-mejtin tiċħdilhomx il-ħniena tiegħek[9].

³⁴Tonqosx lejn ta’ qalbhom maqsuma, imma ibki ma’ min hu mbikki.

³⁵Tħallix li żżur bniedem marid, għax b’hekk issir maħbub.

³⁶F’kulma tagħmel ftakar fi tmiemek, u ma għandek tidneb qatt.