Read Maltese Bible with DC – IL-BIBBJA IL-KOTBA MQADDSA BIN SIRAK 9 Bible Online

BIN SIRAK 9 - Maltese Bible with DC – IL-BIBBJA IL-KOTBA MQADDSA bible

BIN SIRAK 9

¹L-imġiba man-nisa Tkunx għajjur għall-mara ta’ qalbek[11], biex ma tgħallimhiex il-ħażen kontrik.

²Tagħtix ruħek lill-mara, hekk li din titla’ fuq rasek.

³Tmurx ma’ mara żienja, li ma tmurx taqa’ fix-xbiek tagħha.

⁴Tagħmilhiex ma’ waħda tgħanni, li ma tmurx tinqabad mill-mossi tagħha.

⁵Xebba toqgħodx tifliha[12], li ma taħbatx titfixkel u jkun ħaqqek il-kastig magħha.

⁶Tagħtix ruħek lin-nisa tat-triq, biex ma tberbaqx il-wirt li għandek.

⁷Toqgħodx tgħarrex fi triqat il-belt, u toqgħodx tiġġerra fl-inħawi mwarrba tagħha.

⁸Dawwar ħarstek minn fuq mara sabiħa, u tiċċassax lejn ġmiel mart ħaddieħor. Minħabba sbuħit mara ħafna tilfu triqthom, u hekk tħeġġet fihom bħan-nar il-passjoni.

⁹Toqgħodx fuq il-mejda ma’ waħda miżżewġa, u tixxalax bl-inbid magħha, li ma tmurx qalbek tinġideb lejha, u fis-saħna tiżloq u tintilef. L-imġiba mal-irġiel

¹⁰Ħabib antik titilqux, għax wieħed ġdid ma tħalltux miegħu; ħabib ġdid hu bħal inbid ġdid: tixorbu bil-qalb meta jeqdiem.

¹¹Tgħirx għal ġieħ mogħti lill-midneb, għax ma tafx x’hemm lest għalih.

¹²Tifraħx b’dak li jferraħ lill-ħżiena, ftakar li sa ma jmutu ma jibqgħux bla ħlas.

¹³Tbiegħed minn bniedem li jista’ joqtol, li ma jkollokx għalfejn titħasseb għax tibża’ li tmut; imma jekk tersaq lejh, ara li ma tiżbaljax, li ma jmurx ineħħilek ħajtek. Kun af li qalb nases huma l-passi tiegħek, u qed timxi fuq swar il-belt.

¹⁴Agħmel ħiltek u fittex il-ġirien tiegħek, u ħu parir mingħand l-għorrief.

¹⁵Tħaddet ma’ nies bil-għaqal, u kulma tgħid għandu jkun fuq il-Liġi tal-Għoli.

¹⁶Dawk li jieklu miegħek għandhom ikunu rġiel sewwa, u l-ftaħir tiegħek ħa jkun fil-biża’ ta’ Alla.

¹⁷Tifħir jaqla’ xogħol ta’ id is-sengħa, u mexxej ta’ poplu juri għerfu f’kelmtu.

¹⁸Lablâb ta’ min jibża’ minnu f’beltu, u jinbagħad min jitkellem bl-addoċċ.