Read Maltese Bible with DC – IL-BIBBJA IL-KOTBA MQADDSA ISAIJA 10 Bible Online

ISAIJA 10 - Maltese Bible with DC – IL-BIBBJA IL-KOTBA MQADDSA bible

ISAIJA 10

¹Gwaj għal dawk li jagħmlu l-ħaqq ħażin, u għall-kittieba ħfief biex jiktbu d-dnewwa;

²li jwarrbu mill-ġustizzja l-imsejknin, u jisirqu jedd il-fqar tal-poplu tiegħi; jagħmlu priża mir-romol, u jaħtfu ġid l-iltiema.

³X’se tagħmlu f’jum il-kastig? Fil-ħerba li ġejja mill-bogħod? Lejn min sa dduru għall-għajnuna? U ġidkom fejn se tħalluh?

⁴Ma jibqgħalkomx ħlief titrekknu qalb l-ilsiera, jew taqgħu fost il-mejtin. Madankollu għadbu ma reġax lura u idu għadha merfugħa.

⁵Gwaj għall-Assirja, il-ħatar ta’ għadbi u l-għasluġ fil-qilla tiegħi.

⁶Għall-poplu midgħi jien nibagħtu, u kontra l-ġens tad-dagħdigħa tiegħi jien nordnalu, li jħarbtu bla ħniena, jaħtaflu l-priża, u jgħaffeġ fuqu bħat-tajn tal-art.

⁷Imma hu ma jifhimhiex hekk, u f’qalbu ma jidhirlux hekk: għax f’qalbu għandu li jħarbat, u jeqred ġnus fuq ġnus.

⁸Għax jgħid: “Jaqaw il-prinċpijiet tiegħi mhumiex kollha slaten?

⁹Mhijiex Kalnu bħal Karkemis? Mhijiex Ħamat bħal Arfad? Mhijiex Samarija bħal Damasku?

¹⁰Bħalma idejja laħqu dawn is-saltniet tal-allat, fejn kellhom idoli aktar minn Ġerusalemm u Samarija;

¹¹bħalma għamilt lil Samarija u lil allatha, ma nagħmilx lil Ġerusalemm u lil allatha?”

¹²U meta Sidi jtemm li għandu jagħmel fuq l-għolja ta’ Sijon u Ġerusalemm, hu jikkastiga l-frott tal-kburija ta’ qalb is-sultan tal-Assirja u l-ħarsa mżarġna tar-refgħa ta’ għajnejh.

¹³Għax hu qal: “Bis-saħħa ta’ jdejja għamilt dan; u bl-għaqal tiegħi, għax moħħi jilħaqli, neħħejt il-fruntieri tal-popli, u ħtaftilhom ġidhom, u bħall-ġorf niżżilt lis-slaten.

¹⁴U idi, bħallikieku sabet bejta, ħatfet ġid il-popli. Bħalma jiġbru l-bajd mitluq, jien ġbart l-art kollha, bla ma ħadd ħarrek ġwenħajh, jew fetaħ munqaru u pespes.”

¹⁵Forsi qatt ftaħret il-mannara kontra min iqaċċat biha? Forsi l-munxar qatt qam għal min jaħdem bih? Bħallikieku l-ħatar jista’ jħarrek lil min jerfgħu, jew l-għasluġ lil dak li mhux xi biċċa għuda?

¹⁶Għalhekk għad jibgħat is-Sid, il-Mulej tal-eżerċti, l-għelubija f’simnitu, u f’ġewwenih iqabbadlu l-ħruq, il-ħruq tan-nar.

¹⁷U x-xrara ta’ Iżrael issir nar, il-Qaddis ta’ Iżrael nar iħeġġeġ, jaħraq u jikkonsma f’jum wieħed il-ħurrieq u x-xewk.

¹⁸U l-ġmiel tal-masġar u tal-ġnien tiegħu itemmu għalkollox, bħal bniedem mifni u mitluq.

¹⁹U jingħadd il-fdal tas-siġar tal-masġar tiegħu; biżżejjed tfajjel biex jgħoddhom.

²⁰U jiġri dakinhar li l-fdal ta’ Iżrael u l-bqija ta’ dar Ġakobb ma jibqgħux iżjed jistrieħu fuq min sawwathom, imma jitwieżnu bis-sewwa fuq il-Mulej, il-Qaddis ta’ Iżrael.

²¹Fdal[37] jerġa’ lura, il-fdal ta’ Ġakobb, lejn Alla, il-Qawwi tagħhom.

²²Għax, imqar jekk il-poplu tiegħek Iżrael, ikun bħar-ramel tal-baħar, fdal biss minnu għad jerġa’ lura: għax il-qerda tagħhom hi deċiża, deċiżjoni tfawwar bil-ġustizzja.

²³Iva, deċiża l-qerda li se jagħmel Sidi, il-Mulej tal-eżerċti, fl-art kollha.

²⁴Għalhekk dan jgħid Sidi, il-Mulej tal-eżerċti: “La tibżax, poplu tiegħi, int li tgħammar f’Sijon, mill-Assirja li sawtitek, refgħet fuqek il-bastun tagħha, bħalma għamlulek fl-Eġittu.

²⁵F’qasir żmien għad tibred is-saħna tiegħi, u l-korla tiegħi ddur għall-qerda tagħhom.

²⁶Imbagħad il-Mulej tal-eżerċti ixejjer sawt għal fuqu, bħalma darba ħabat għal Midjan ħdejn il-blata ta’ Għoreb; u l-bastun jerfa’ għal fuq il-baħar[38], bħalma refgħu għall-Eġittu.

²⁷U jiġri dakinhar li titneħħa minn fuq spalltek it-tagħbija, u l-madmad tiegħu jitkisser minn fuq għonqok. U l-qerried tala’ minn Rimmon[39],

²⁸wasal Għajjat, qasam minn Migron, f’Mikmas ħalla t-tagħmir tiegħu;

²⁹qasmu l-mogħdija, f’Geba waqqfu l-kamp, Rama titriegħed, Gibgħa ta’ Sawl ħarbet.

³⁰Għolli leħnek, Bat-gallim. Agħti widen, Lajsa; wieġeb, Għanatot.

³¹Madmena maħruba, in-nies ta’ Gebim ifittxu l-kenn.

³²Illum stess ikun f’Nob, u jxejjer idu lejn l-għolja ta’ bint Sijon, il-muntanja ta’ Ġerusalemm.

³³Arawh is-Sid[40], il-Mulej tal-eżerċti, iqaċċat il-friegħi bil-mannara, jitqaċċtu l-ogħla, u jiġġarrfu l-għoljin.

³⁴Jaħsad il-qalba tal-masġar bil-ħadid, u jiġġarraf il-Libanu bi ġmielu.