Read Maltese Bible with DC – IL-BIBBJA IL-KOTBA MQADDSA ISAIJA 11 Bible Online

ISAIJA 11 - Maltese Bible with DC – IL-BIBBJA IL-KOTBA MQADDSA bible

ISAIJA 11

¹Għad toħroġ fergħa miz-zokk ta’ Ġesse[41], għad tinbet rimja minn għeruqu:

²fuqu jistrieħ l-ispirtu tal-Mulej[42], l-ispirtu tal-għerf u d-dehen, l-ispirtu tal-għaqal u l-qawwa, l-ispirtu tal-għerf u l-biża’ tal-Mulej,

³u l-għaxqa tiegħu fil-biża’ tal-Mulej. Ma jiġġudikax skont ma jidher fl-għajnejn, u ma jagħtix sentenza skont ma jisma’,

⁴iżda jiġġudika l-imsejknin skont il-ġustizzja, u jagħti sentenza skont is-sewwa lill-fqajrin tal-art. Isawwat il-kiefra bix-xettru ta’ fommu, u b’nifs xufftejh joqtol lill-ħażin.

⁵Il-ħżiem ta’ ġenbejh tkun il-ġustizzja, u l-fedeltà l-ħżiem ta’ qaddu.

⁶Il-lupu jibda jgħix mal-ħaruf[43], il-leopard mal-gidi, u jirgħu flimkien l-għoġol u ferħ l-iljun, daqsxejn ta’ tfajjel isuqhom.

⁷Il-baqra u l-ors jirgħu flimkien, u l-frieħ tagħhom flimkien jistrieħu. L-iljun bħall-gendus jiekol it-tiben.

⁸It-tarbija tal-ħalib titliegħeb fil-ħofra tas-serp; u t-tifel miftum idaħħal idu fil-bejta tal-lifgħa.

⁹Ma jagħmlux aktar deni u anqas ħsara fuq il-muntanja qaddisa kollha tiegħi, għax mimlija hi l-art bl-għarfien tal-Mulej bħalma l-baħar hu miksi bl-ilmijiet.

¹⁰Imbagħad jiġri f’dak il-jum li l-għerq ta’ Ġesse jieqaf bħala sinjal għall-popli. Lilu jfittxu l-ġnus, u l-għamara tiegħu tkun imsebbħa.

¹¹U jiġri f’dak il-jum, il-Mulej jerġa’ jmidd idu, biex jikseb fdal il-poplu tiegħu, li jkun fadal, mill-Assirja u mill-Eġittu, minn Patros[44] u minn Kus, minn Għelam u minn Singħar, minn Ħamat u mill-gżejjer tal-baħar.

¹²U jgħolli sinjal lill-ġnus, u jiġbor il-mormijin ta’ Iżrael, u jiġbor l-imxerrdin ta’ Ġuda mill-erbat itruf tal-art.

¹³Tintemm l-għira ta’ Efrajm, u jinqerdu l-għedewwa ta’ Ġuda. Efrajm ma jgħirx aktar għal Ġuda, u Ġuda ma jobgħodx lil Efrajm.

¹⁴Itiru għal fuq għoljiet il-Filistin lejn il-Punent, u flimkien jaħtfu lin-nies tal-Lvant. Fuq Edom u Mowab imiddu idejhom, u jaħkmu lil ulied Għammon.

¹⁵U l-Mulej inixxef ilsien il-baħar tal-Eġittu, u jxejjer idu fuq ix-xmara bis-sħana tar-riħ tiegħu; u jofroqha f’seba’ widien, u jaqsmuha bil-qrieq.

¹⁶U jkun hemm mogħdija għal dawk li jifdal mill-poplu tiegħi, għal dawk li jifdal fl-Assirja, bħalma kien hemm għal Iżrael, dakinhar li telgħu mill-art tal-Eġittu.