Read Maltese Bible with DC – IL-BIBBJA IL-KOTBA MQADDSA ISAIJA 13 Bible Online

ISAIJA 13 - Maltese Bible with DC – IL-BIBBJA IL-KOTBA MQADDSA bible

ISAIJA 13

¹Oraklu fuq Babilonja. Viżjoni li kellu Isaija bin Amos:

²Fuq għolja xagħrija tellgħu stendard; għollu leħinkom lejhom[45], xejrulhom idkom, ħalli jidħlu minn bwieb il-kbarat.

³Jien tajt l-ordni lill-qaddisin tiegħi[46], sejjaħt lill-gwerriera qalbiena tiegħi, kollhom ħeġġa għall-glorja tiegħi, biex jagħmlu li jrid għadbi.

⁴Isimgħu l-għagħa fuq il-muntanji, għagħa ta’ poplu sħiħ. Isimgħu t-tgeġwiġ ta’ saltniet u ġnus miġmugħa; il-Mulej tal-eżerċti għaddej minn nofs eżerċtu lest għall-gwerra.

⁵Ġejjin minn art imbiegħda, minn truf is-smewwiet, il-Mulej u t-tagħmir ta’ għadbu, biex jagħmel ħerba mid-dinja kollha.

⁶Ixhru, għax qorob Jum il-Mulej[47], bħal qerda mingħand is-Setgħan.

⁷Għalhekk idejn kulħadd jintelqu, u qalb kull bniedem tinħall, u lkoll jitwerwru.

⁸Uġigħ u brim jaqbadhom, bħal mara fil-ħlas jitkagħwġu; miblugħin iħarsu lejn xulxin, wiċċhom wiċċ in-nar.

⁹Araw, Jum il-Mulej għad jasal, kiefer, imgħaddab, ħuġġieġa nar bil-korla, biex jagħmel mill-art ħerba, u jeqred minnha l-midinbin.

¹⁰Il-kwiekeb tas-smewwiet u l-ġemgħat tagħhom ma jarmux aktar id-dija tad-dawl tagħhom. Hi u tielgħa, ix-xemx tiddallam, u l-qamar ma jroxx dawlu.

¹¹Jien nitħallas mid-dinja għal ħżunitha, u mill-ħżiena għal ħtijiethom. Inġib fix-xejn il-kburija tas-suppervi, u n-nies vjolenti mmidd mal-art.

¹²Nagħmel in-nies aktar rari mid-deheb fin, u l-bnedmin jonqsu aktar mid-deheb ta’ Ofir[48].

¹³Is-smewwiet jitqallbu ta’ taħt fuq, u minn sisienha titheżżeż l-art, bis-saħna tal-Mulej tal-eżerċti, f’jum in-nar tal-korla tiegħu.

¹⁴Imbagħad bħal għażżiela jiġru warajha, bħal merħla m’hemm ħadd jiġborha, idur kull wieħed lejn il-poplu tiegħu, u kull bniedem lejn artu jaħrab.

¹⁵Kull min jinsab, jinfduh; kull min jinqabad, jgħadduh mix-xabla.

¹⁶Itertqulhom it-trabi quddiem għajnejhom; Jisirqulhom ’il djarhom u san-nisa jkasbrulhom.

¹⁷Arawni, jien inqajjem għalihom il-Medi, li l-fidda ma jaħsbux fiha, u anqas għad-deheb ma jagħmlu.

¹⁸Qwieshom itertqu ż-żgħażagħ, bla ħniena għal frott il-ġuf, bla ħasra għall-ulied.

¹⁹Issir Babilonja, il-ġawhra tal-imperi, iż-żina u l-foħrija tal-Kaldin, bħal Sodoma u Gomorra, meta ġġarrfu b’idejn Alla.

²⁰Qatt aktar ma titgħammar, minn żmien għal żmien ħadd aktar ma joqgħod fiha. L-Għarbi ma jtellax l-għarix fiha, u r-rgħajja ma jserrħux l-imrieħel tagħhom.

²¹Imma hemm jistrieħu l-bhejjem tax-xagħri; fi djarhom tbejjet il-kokka, u jgħammru n-ngħam. Hemm jaqbżu l-mogħoż selvaġġi[49];

²²tnewwaħ il-jena fil-kastelli tagħhom, u x-xakalli fi djarhom tal-pjaċir. Is-siegħa tagħha waslet, u jiemha iżjed ma jtulux.