Read Maltese Bible with DC – IL-BIBBJA IL-KOTBA MQADDSA ISAIJA 17 Bible Online

ISAIJA 17 - Maltese Bible with DC – IL-BIBBJA IL-KOTBA MQADDSA bible

ISAIJA 17

¹Oraklu fuq Damasku: “Araw, Damasku ma tibqax aktar belt, imma ssir ħerba!

²Blietha għad jitilquhom għal dejjem, u jibqgħu għall-imrieħel, hemm jimteddu u ħadd ma jgerrixhom.

³Il-fortizza tispiċċa minn idejn Efrajm[58], u s-saltna minn Damasku. U jiġrilu fdal Aram kif se jiġri lil sebħ ulied Iżrael, oraklu tal-Mulej tal-eżerċti.

⁴U jiġri f’dak il-jum li s-sebħ ta’ Ġakobb jidbiel, u s-simna ta’ laħmu togħlob.

⁵Jiġrilu bħal meta l-ħassad jaqbad iż-żara’ u driegħu jaħsad is-sbul; u jiġrilu bħal wieħed li jiġbor is-sbul fil-wied ta’ Refajm[59].

⁶Jifdallu biss x’erba’ żebbuġiet, - bħal meta jfarfru ż-żebbuġa - tnejn jew tliet żibġiet f’ras il-fergħa, erbgħa jew ħamsa fi truf il-friegħi tas-siġra, oraklu tal-Mulej Alla ta’ Iżrael.

⁷Dakinhar il-bniedem idur lejn min għamlu; idawwar għajnejh lejn il-Qaddis ta’ Iżrael.

⁸Ma jħarisx iżjed lejn l-artali li għamlu jdejh, ma jħarisx aktar fuq li għamlu subgħajh: ix-xbihat tal-Asera[60] u l-plieri tax-Xemx.

⁹Dakinhar blietek jiġrilhom bħalma ġralhom l-ibliet abbandunati mill-Ħiwwin u l-Amurrin, meta dawn telquhom minħabba wlied Iżrael, u saru ħerba.

¹⁰Għax int insejt lil Alla, is-Salvatur tiegħek; ma ftakartx fil-Blata, il-Qawwa tiegħek. Int tħawwel il-ġonna ta’ Adon[61]; tħawwel iż-żraġen għal alla barrani;

¹¹iddawwarhom b’ħajt meta tħawwilhom; u l-għada filgħodu tnibbet iż-żerriegħa tiegħek; imma l-frott jgħib f’jum il-mard u l-uġigħ bla fejqan.

¹²“Ah! It-tgargir ta’ kotra ġnus, bħat-tgargir tal-baħar qawwi. It-tqanqil ta’ ġnus setgħana,

¹³bħat-tqanqil ta’ ħalel kbar. Imma l-Mulej jheddidhom u jaħarbu ’l bogħod misjuqa bħal tibna fuq l-għoljiet mir-riħ, u bħal tromba trab quddiem ir-riefnu.

¹⁴Filgħaxija kien hemm il-biża’ tagħhom, sa minn qabel is-sebħ għabu lkoll. Din hi x-xorti ta’ dawk li jisirquna, dan hu s-sehem ta’ dawk li jaħtfulna ġidna.”