Read Maltese Bible with DC – IL-BIBBJA IL-KOTBA MQADDSA ISAIJA 19 Bible Online

ISAIJA 19 - Maltese Bible with DC – IL-BIBBJA IL-KOTBA MQADDSA bible

ISAIJA 19

¹Oraklu fuq l-Eġittu: “Arawh il-Mulej riekeb fuq sħaba ħafifa u dieħel l-Eġittu; jitriegħdu l-allat tal-Eġittu quddiemu, u qalb l-Eġittu tinħall ġo fih.

²U nkeskes l-Eġizzjani kontra l-Eġizzjani, jitqabdu wieħed kontra ħuh, u ieħor kontra sieħbu; belt kontra belt, u saltna kontra saltna.

³Toħroġ ruħ l-Eġittu minn ġo fih, u jien inħawwadlu ħsiebu; u jmorru jistħarrġu l-allat u s-saħħara, l-erwieħ u l-bassara.

⁴Jien nerħi l-Eġittu f’idejn sid kiefer[64], u sultan bla qalb għad jaħkem fuqu, oraklu ta’ Sidi l-Mulej tal-eżerċti.

⁵U jinxtorob l-ilma tal-baħar, u x-xmara tinxef u tixxotta għalkollox;

⁶u s-swieqi jintnu u l-widien tal-Eġittu joforgħu u jinxfu; il-qasab u l-ħaxix jidbielu.

⁷Il-ġummar fi xtut in-Nil jintelaq, u l-miżirgħa kollha fuq xtut in-Nil tinxef, tittajjar, tgħib.

⁸Jokorbu s-sajjieda u jitniehdu; kull min jixħet fin-Nil is-sunnara, jew jifrex ix-xbiek fuq wiċċ l-ilma, isewwed qalbu.

⁹Jitħawdu l-ħaddiema tal-kittien, u l-maxxata u n-nissieġa jisfaru.

¹⁰L-għażżiela tal-qoton jintelqu, u l-ħaddiema mikrija b’diqa f’qalbhom.

¹¹Tassew boloh il-prinċpijiet ta’ Sogħan! L-aqwa għorrief tal-Fargħun parir iblah tawh. Kif tistgħu tgħidu lill-Fargħun: ‘Bin l-għorrief jien, bin is-slaten tal-qedem’?

¹²Fejnhom issa l-għorrief tiegħek? Ħa jgħidulek u jgħarrfuk x’għandu f’moħħu għall-Eġittu il-Mulej tal-eżerċti.

¹³Bliehu l-prinċpijiet ta’ Sogħan[65], tqarrqu l-prinċpijiet ta’ Nof. Il-kapijiet tat-tribù tiegħu lill-Eġittu ħarġuh ’il barra mit-triq.

¹⁴Xeħet ġo nofshom il-Mulej spirtu ta’ tagħwiġ, u ħawdu lill-Eġittu f’kulma għamel. F’kulma għamel ħarġu lill-Eġittu ’l barra mit-triq, bħalma jitlef triqtu l-bniedem fis-sakra hu u jitqalla’.

¹⁵Xejn ma jsir fl-Eġittu, la mir-ras u lanqas mid-denb[66], la mill-palma u lanqas mill-qasba.

¹⁶Dakinhar l-Eġittu jkun bħan-nisa, imriegħed u mwerwer, hu u jmidd idu għal fuqhom il-Mulej tal-eżerċti.

¹⁷U art Ġuda tkun ta’ biża’ għall-Eġittu; kull meta xi ħadd isemmihielu jitwerwer minħabba l-ħsieb li fassal għalih il-Mulej tal-eżerċti.

¹⁸Dakinhar ikun hemm ħamest ibliet[67] fl-art tal-Eġittu jitkellmu lsien Kangħan u jaħilfu b’isem il-Mulej tal-eżerċti; waħda minnhom tissejjaħ Belt ix-Xemx.

¹⁹Dakinhar ikun hemm artal għall-Mulej f’nofs l-art tal-Eġittu u plier f’ġieħ il-Mulej f’tarf l-art.

²⁰U jkun ta’ sinjal u xhieda għall-Mulej tal-eżerċti fl-art tal-Eġittu. Meta jsejħu lill-Mulej minħabba dawk li jaħqruhom, hu jibagħtilhom salvatur, li jaqbeż għalihom u jeħlishom.

²¹U jgħarraf il-Mulej lilu nnifsu lill-Eġizzjani; u l-Eġizzjani jagħrfu dakinhar lill-Mulej, iservuh bil-vittmi u l-offerti, u jagħmlu l-wegħdi lill-Mulej u jrodduhom.

²²U l-Mulej isawwat lill-Eġittu, isawtu u jfejqu. Huma jerġgħu lura għal għand il-Mulej, u hu jikkalma u jfejjaqhom.

²³Dakinhar ikun hemm triq mill-Eġittu għall-Assirja, u l-Assirja tiġi l-Eġittu u l-Eġittu jmur l-Assirja, u l-Eġizzjani jservu lill-Mulej flimkien mal-Assiri.

²⁴Dakinhar Iżrael ikun it-tielet mal-Eġittu u l-Assirja, barka f’nofs l-art.

²⁵Iberikhom il-Mulej tal-eżerċti u jgħid: “Imbierek l-Eġittu l-poplu tiegħi, l-Assirja xogħol idejja, u Iżrael il-wirt tiegħi.”