Read Maltese Bible with DC – IL-BIBBJA IL-KOTBA MQADDSA ISAIJA 2 Bible Online

ISAIJA 2 - Maltese Bible with DC – IL-BIBBJA IL-KOTBA MQADDSA bible

ISAIJA 2

¹Il-kelma li ġiet f’dehra lil Isaija bin Amos, dwar Ġuda u Ġerusalemm.

²Għad jiġri fl-aħħar jiem[7] li l-għolja tad-dar tal-Mulej togħla ’l fuq mill-qċaċet tal-muntanji, u tintrefa ’l fuq mill-għoljiet, lejha għad jiġru l-ġnus kollha.

³Kotra ta’ popli għad jiġu u jgħidu: “Ħalli mmorru u nitilgħu fuq l-għolja tal-Mulej, lejn id-dar ta’ Alla ta’ Ġakobb, biex jgħallimna triqatu, u nimxu fil-mogħdijiet tiegħu. Għax minn Sijon joħroġ it-tagħlim, u l-kelma tal-Mulej minn Ġerusalemm.”

⁴Il-Mulej jagħmel il-ħaqq bejn il-ġnus, u jaqta’ s-sentenza bejn ħafna popli; u huma jibdlu x-xwabel tagħhom f’sikek tal-moħriet, u l-lanez tagħhom fi mnieġel. Ebda ġens ma jerfa’ x-xabla kontra ġens ieħor, u s-sengħa tal-gwerra ma jitgħallmuhiex iżjed.

⁵Ejja, dar Ġakobb, ħalli nimxu fid-dawl tal-Mulej!

⁶Iva! Int abbandunajt il-poplu tiegħek, id-dar ta’ Ġakobb, għax imtlew bis-saħħara u bil-bassara bħall-Filistin, u ħadu b’idejn il-barranin.

⁷U arthom imtliet bil-fidda u d-deheb, u t-teżori tagħhom bla qjies; pajjiżhom mimli biż-żwiemel, u l-karrijiet tagħhom bla qjies.

⁸U mtliet arthom bl-idoli; iqimu xogħol idejhom, u kulma ħadmu subgħajhom.

⁹U l-bniedem jiċċekken, u r-raġel jaqa’ fix-xejn, għalhekk la taħfrilhomx!

¹⁰Idħol fil-blat u nħeba fit-trab, minħabba t-twerwir tal-Mulej u d-dija tal-kobor tiegħu.

¹¹Titbaxxa l-ħarsa mkabbra tal-bniedem, u s-suppervja tal-bniedem tiġi fix-xejn, u dakinhar jitgħolla waħdu l-Mulej.

¹²Għax għad ikun hemm jum għall-Mulej tal-eżerċti, għal kull min hu kburi u supperv, għal kull min hu merfugħ u mkabbar;

¹³għaċ-ċedri[8] kollha tal-Libanu, imkabbra u għolja, għall-ballut kollu ta’ Basan;

¹⁴għall-muntanji kollha għolja, għall-għoljiet kollha merfugħa;

¹⁵għat-torrijiet kollha għolja; għal kull sur imsaħħaħ;

¹⁶għal kull ġifen ta’ Tarsis[9], għal kull xini kollu ġmiel.

¹⁷Tiġġarraf il-kburija tal-bniedem, u titniżżel is-suppervja tal-bniedem; u dakinhar, jitgħolla waħdu l-Mulej,

¹⁸U l-idoli jdubu għalkollox,

¹⁹u n-nies jidħlu fl-għerien tal-blat, u fil-ħofor tat-trab tal-art, minħabba t-twerwir tal-Mulej, u d-dija tal-glorja tiegħu, meta jqum biex iriegħed l-art.

²⁰Dakinhar il-bniedem jarmi xbihat allatu, tal-fidda u d-deheb li għamel biex iqimhom; jixħethom għall-ġrieden u għall-friefet il-lejl;

²¹biex jidħol fl-għerien tal-blat u fi xquq l-irdum, minħabba t-twerwir tal-Mulej u d-dija tal-glorja tiegħu, meta jqum biex iriegħed l-art.

²²Ħallikom minnu l-bniedem, għax nifs biss għandu fi mnifsejh, ma jiswa xejn!