Read Maltese Bible with DC – IL-BIBBJA IL-KOTBA MQADDSA ISAIJA 21 Bible Online

ISAIJA 21 - Maltese Bible with DC – IL-BIBBJA IL-KOTBA MQADDSA bible

ISAIJA 21

¹Oraklu fuq id-deżert tal-baħar[69]: Bħalma r-rwiefen jgħaddu maħruba min-Negeb, hekk hu ġej mid-deżert, minn art tal-biża’!

²Viżjoni kiefra kienet murija lili. Il-ħalliel jisraq; il-qerried jeqred! Itla’ Għelam[70], assedja Medja! Hawn jien biex insikket il-krib.

³Għalhekk inħossni mkexkex f’ġenbejja; nitkagħweġ bħal mara fil-ħlas. Inħossni mħawwad wisq biex nisma’, imbellah wisq biex nara!

⁴Moħħi storda, qabadni t-tkexkix, kont nixtieq li jaqa’ l-lejl, u issa sirt nibża’ minnu!

⁵Ħejjew il-mejda, firxu l-ħasira, jieklu u jixorbu. Qumu, prinċpijiet, idilku t-tarki!

⁶Dan qalli l-Mulej: “Mur qiegħed għassies, ħa jħabbar dak li jara.

⁷U jekk jara rikkieb fuq karru b’żewġt iżwiemel; rikkieb fuq ħmar, rikkieb fuq ġemel, ħa jgħarrex sewwa, b’reqqa l-aktar kbira.’

⁸U mbagħad l-għassies jgħajjat: ‘Fuq torri tal-għassa, sidi, jien qiegħed binhar dejjem, u wieqaf dejjem f’posti l-iljieli kollha.

⁹U ara, ġej wieħed riekeb, fuq karru b’żewġt iżwiemel; li beda jgħajjat u jgħid: ‘Waqgħet waqgħet Babilonja, u magħha xbihat allatha mfarrka fl-art.’

¹⁰Poplu midrus tiegħi, bin l-andar tiegħi, dak li smajt mingħand il-Mulej tal-eżerċti, Alla ta’ Iżrael, lilkom ħabbartu.”

¹¹Oraklu fuq Edom: Sejjaħli xi ħadd minn Xegħir: “Għassies, fiex inhu l-lejl[71]? Għassies, fiex inhu l-lejl?”

¹²U l-għassies wieġeb: “Għad jasal is-sebħ u l-lejl ukoll. Jekk tridu tistħarrġu, stħarrġu. Erġgħu ejjew?”

¹³“Oraklu fuq l-Għarabja: Fil-masġar, fid-deżert għaddu l-lejl, intom karwani tad-Dedanin[72]!

¹⁴Ilqgħu lill-għatxanin, ġibulhom l-ilma, intom li tgħammru f’art Tema, ilqgħu bil-ħobż il-maħrubin.

¹⁵Għax minn quddiem ix-xabla ħarbu, minn quddiem xabla misluta, minn quddiem il-qaws miġbud, minn quddiem il-qilla tal-battalja.

¹⁶Għax dan qalli Sidi: “Fi żmien sena, kif jgħoddu s-snin ta’ ħaddiem mikri[73], ikun għab is-sebħ kollu ta’ Kedar.

¹⁷U ftit li xejn jifdal mill-arċieri qalbiena ta’ Kedar.’ Għax tkellem il-Mulej, Alla ta’ Iżrael.”