Read Maltese Bible with DC – IL-BIBBJA IL-KOTBA MQADDSA ISAIJA 23 Bible Online

ISAIJA 23 - Maltese Bible with DC – IL-BIBBJA IL-KOTBA MQADDSA bible

ISAIJA 23

¹Oraklu fuq Tir: “Ixhru, ġfien ta’ Tarsis, għax il-port tagħkom qerduh! M’hemmx dħul! Minn art il-Kittin[80] waslet l-aħbar!

²Tbikkmu, intom li tgħammru x-xatt, merkanti ta’ Sidon!

³L-aġenti tiegħek kienu jaqsmu l-ibħra kbar. Ġidha kien il-qamħ ta’ Siħor[81] u l-ħsad tan-Nil, u hi kienet is-suq tal-ġnus.

⁴Għajb għalik, Sidon, il-fortizza tal-baħar, għax il-baħar jgħid: ‘Jien ma kellix uġigħ il-ħlas[82], u lanqas ma wlidt. Jien żgħażagħ ma rabbejtx, lanqas xbejbiet ma rawwimt.’

⁵Meta tasal l-aħbar l-Eġittu, dawn iħossu l-uġigħ għal li ġralha Tir.

⁶Għaddu għal Tarsis, ixhru intom li tgħammru fix-xtut!

⁷Hi din il-belt ferrieħa tagħkom, mnissla minn żmien il-qedem, li riġlejha kienu jeħduha tgħammar fil-bogħod?

⁸Min iddeċieda dan għal Tir, il-belt inkurunata, li l-merkanti tagħha kienu prinċpijiet, u n-neguzjanti tagħha stmati mad-dinja kollha?

⁹Il-Mulej tal-eżerċti ddeċieda dan, biex iwaqqa’ fl-għajb kull ġmiel, u jniżżel in-nies stmati mad-dinja kollha.

¹⁰Aħdem artek, bint Tarsis, għax il-port m’għadux hemm.

¹¹Il-Mulej medd idu fuq il-baħar, u riegħed is-saltniet. Il-Mulej ordna lil Kangħan, li tħott il-fortizzi tagħha.

¹²U qal: ‘La tifraħx iżjed, xbejba mkasbra, bint Sidon! Qum, mur imqar għand il-Kittin, lanqas hemm ma ssib mistrieħ.’

¹³Ara, art il-Kaldin[83]. Dan il-poplu ma kienx hemm, l-Assirja rħietu għall-bhejjem selvaġġi. Dawret it-torrijiet tagħha madwaru, ġarrfet il-palazzi tiegħu, għamlet ħerba minnu.

¹⁴Ixhru ġfien ta’ Tarsis, għax il-fortizza tagħkom saret ħerba.

¹⁵Għad jiġri li Tir tintesa għal sebgħin sena, daqs żmien sultan wieħed, u fi tmiem is-sebgħin sena Tir tkun bħall-għanja tal-prostituta:

¹⁶‘Aqbad l-arpa, dur mal-belt, ja mara żienja, insewk! Doqq bis-sengħa, kattar l-għana; għandhom mnejn jiftakru fik.’

¹⁷Malli jgħaddu s-sebgħin sena l-Mulej iżur lil Tir, u terġa’ tinkera bħal qabel u tiżni mas-saltniet kollha fuq wiċċ l-art.

¹⁸U l-qligħ u l-ħlas tal-kiri tagħha jkunu ddedikati lill-Mulej; ma jerfgħuhomx u lanqas jaħżnuhom, għax il-ħlas tagħha jmur għal dawk li jgħammru quddiem il-Mulej, biex jieklu bix-xaba’ u jilbsu lbies mill-isbaħ.”