Read Maltese Bible with DC – IL-BIBBJA IL-KOTBA MQADDSA ISAIJA 25 Bible Online

ISAIJA 25 - Maltese Bible with DC – IL-BIBBJA IL-KOTBA MQADDSA bible

ISAIJA 25

¹Mulej, Alla tiegħi int; infaħħrek u nsebbaħ lil ismek, għaliex għamilt ħwejjeġ tal-għaġeb, kif ħsibt żmien ilu, u bis-sewwa, kif imiss.

²Għax il-belt għamiltha gozz ġebel, ħerba l-belt bis-swar imdawra. Il-fortizza tal-kburin ma għadhiex belt iżjed, ma tinbena qatt aktar.

³Għalhekk ifaħħrek poplu b’saħħtu, il-belt ta’ ġnus qawwija tibża’ minnek.

⁴Għax inti kenn għall-imsejken, kenn għall-fqir fid-dwejjaq tiegħu, kenn fl-irwiefen u dell fis-sħana. Għaliex l-infiħ tas-setgħanin bħax-xita tħabbat ma’ ħajt,

⁵bħas-sħana tax-xemx f’art niexfa. Id-dagħdigħa tal-kburin int trażżan. Bħalma d-dell ta’ sħaba jtaffi s-sħana, hekk tissikket l-għanja tas-setgħanin bla qalb.

⁶U jagħmel il-Mulej tal-eżerċti għall-popli kollha fuq din il-muntanja[88], mejda b’ikel fin, mejda bi nbejjed ħelwa, b’laħam imsemmen bil-mudullun, u nbejjed fini.

⁷U jċarrat minn fuq din il-muntanja il-velu li kien jgħatti wiċċ il-popli kollha, għata li kien jaħbi kollha kemm huma l-ġnus.

⁸Jeqred il-mewt għal dejjem, jixxotta Sidi l-Mulej id-dmugħ minn fuq kull wiċċ, u jħassar l-għajb tal-poplu tiegħu minn wiċċ l-art kollha: għax il-Mulej tkellem.

⁹U dakinhar jgħidu: “Dan hu Alla tagħna: fih ittamajna li jsalvana; dan hu l-Mulej li fih ittamajna: nifirħu u nithennew bis-salvazzjoni tiegħu.”

¹⁰Għax id l-Mulej tinżel fuq din il-muntanja. U Mowab[89] jisħquh fejn ikun, it-tiben fil-miżbla bħalma jisħquh.

¹¹U jmidd idejh ġo fiha, bħalma l-għawwiem imiddhom biex jgħum; imma jkollu jniżżel kburitu, minkejja t-taħbit ta’ jdejh.

¹²U jaqleb u jġarraf il-Mulej il-fortizzi għolja tas-swar tiegħu u jwaddabhom fit-trab tal-art.