Read Maltese Bible with DC – IL-BIBBJA IL-KOTBA MQADDSA ISAIJA 26 Bible Online

ISAIJA 26 - Maltese Bible with DC – IL-BIBBJA IL-KOTBA MQADDSA bible

ISAIJA 26

¹Dakinhar jitkanta dan l-innu fl-art ta’ Ġuda: “Għandna belt qawwija; bnielna swar u ħitan għall-ħelsien tagħna.

²Iftħu l-bibien, biex jidħol il-poplu ġust li jżomm is-sewwa.

³Il-fehma tiegħu sħiħa fik; inti ssaħħaħlu s-sliem, għax fik ittama.

⁴Ittamaw fil-Mulej, għal dejjem, għax il-Mulej hu l-blata ta’ dejjem.

⁵Lil min kien fl-għoli niżżlu, il-belt imkabbra niżżilha, waqqagħha għal isfel, fit-trab xeħitha;

⁶taħt is-saqajn tirtifes, saqajn il-fqir, ir-rifs tal-imsejknin.”

⁷Wietja hi triq il-ġust, mogħdija dritta tħejji għall-ġust.

⁸Iva, fi triq il-ġudizzji tiegħek nittamaw, Mulej; għal ismek u tifkirtek tixxennaq ruħna.

⁹Billejl tixtieqek ruħi; mas-sebħ tfittxek ġo fija qalbi. Għaliex meta jiddu l-ġudizzji tiegħek fuq l-art, in-nies tad-dinja jitgħallmu l-ġustizzja.

¹⁰Iħennu għall-ħażin, imma dan is-sewwa ma jitgħallimx; f’art id-dritt jimxi bl-imgħawweġ, u l-kobor tal-Mulej ma jqisux.

¹¹Mulej, għollejt idek, u huma ma rawhiex. Ħa jaraw il-ħeġġa tiegħek għall-poplu u jistħu; ħa jkollhom in-nar lest għall-għedewwa tiegħek.

¹²Mulej, int tagħtina s-sliem, għemilna kollu għamiltu int għalina.

¹³Mulej, Alla tagħna, ħakmuna sidien oħra, imma aħna lilek u lil ismek biss infaħħru.

¹⁴Huma mejta, ma jgħixux, erwieħ li ma jqumux. Hekk int ikkastigajthom u qridthom, u ħassart kull tifkira tagħhom.

¹⁵Imma int kattart il-ġens, Mulej, kattart il-poplu u ssebbaħt, wessajt it-truf kollha tal-pajjiż.

¹⁶Mulej fid-dwejjaq fittixniek, sejjaħnielek int u tikkastigana.

¹⁷Bħal mara tqila fil-ħlas titkagħweġ u tgħajjat bl-uġigħ, hekk konna aħna quddiemek Mulej.

¹⁸Tqâlna u tkagħwiġna u wlidna r-riħ; is-salvazzjoni fuq l-art ma ksibnihiex, u ma tweldux nies biex jgħammru fl-art.

¹⁹Għax jgħixu mill-ġdid il-mejtin tiegħek, il-katavri jqumu lkoll[90]. Jistenbħu u jgħannu dawk li jgħammru fit-trab. In-nida tiegħek hi nida ta’ dawl, u l-art trodd il-mejtin.

²⁰Mur, poplu tiegħi, idħol fil-kmamar tiegħek, u sakkar il-bibien warajk! Inħeba għal ftit sa ma tgħaddi l-korla.

²¹Għax, araw, il-Mulej ħiereġ minn għamartu, biex jitħallas tal-ħażen tan-nies tal-art; l-art tikxef id-demm li xorbot, u ma tgħattix aktar il-maqtulin tagħha.