Read Maltese Bible with DC – IL-BIBBJA IL-KOTBA MQADDSA ISAIJA 27 Bible Online

ISAIJA 27 - Maltese Bible with DC – IL-BIBBJA IL-KOTBA MQADDSA bible

ISAIJA 27

¹F’dak il-jum jikkastiga l-Mulej bix-xabla qalila, kbira u qawwija tiegħu lil Levjatan[91], is-serp ħafif, lil Levjatan, is-serp jitkagħweġ; joqtol id-dragun li hemm fil-baħar.

²F’dak il-jum jgħidu: “Għannulha lill-ġnejna tad-dwieli, il-ġnejna fiha għaxqa!

³Jiena l-Mulej, l-għassies tagħha. Kull ħin u kull waqt insaqqiha. Biex ma tiġrilha ebda ħsara, lejl u nhar jien inħarisha.

⁴Ma għadnix imgħaddab. Li kien hemm ix-xewk u l-ħurrieq, kont nagħmlilhom gwerra, naħraqhom ilkoll f’salt wieħed,

⁵sakemm ma jfittxux il-kenn fija u ma jagħmlux paċi miegħi, u ma jagħmlux paċi miegħi.”

⁶U jfiġġ jum meta jxenxel għerq Ġakobb, meta jarmi u jiżhar Iżrael, u wiċċ id-dinja jimlewh bil-frott.

⁷Jaqaw darbu l-Mulej bħalma kien darab lil min darbu? Jaqaw qatlu bħalma kien qatel lil min qatlu?

⁸Ikkastigahom billi keċċiehom u bagħathom ’il barra; kaxkarhom bir-riħ qawwi tiegħu f’jum ix-Xlokk.

⁹B’dan tinħafer il-ħtija ta’ Ġakobb; dan ikun il-ħlas għat-tneħħija ta’ dnubu: li jagħmel il-ġebel tal-artal, bħal ġebel misħuq tal-ġir, li ma jwaqqafx ix-xbihat tal-Asera[92] u l-plieri tax-Xemx.

¹⁰Il-belt qawwija saret ħerba, post battal, mitluq bħad-deżert; fih jirgħa l-għoġol, hemm jimtedd, hemm ilaqqat il-friegħi.

¹¹Jinxfu u jitqarqċu l-friegħi tagħha, in-nisa jiġu u bihom iqabbdu n-nar, għax hu poplu bla moħħ; għalhekk ma jħennx għalihom dak li ħalaqhom, u min sawwarhom ma jagħdirhomx.

¹²U dakinhar jiġri li l-Mulej jidres il-qamħ mix-xmara tal-Ewfrat sal-Wied tal-Eġittu[93], u intom tinġabru wieħed wieħed, ulied Iżrael.

¹³Dakinhar tindaqq it-tromba l-kbira, u jiġu lura l-mitlufin f’art l-Assirja, u l-imxerrdin fl-art tal-Eġittu, u jqimu lill-Mulej, fuq il-muntanja mqaddsa f’Ġerusalemm.