Read Maltese Bible with DC – IL-BIBBJA IL-KOTBA MQADDSA ISAIJA 30 Bible Online

ISAIJA 30 - Maltese Bible with DC – IL-BIBBJA IL-KOTBA MQADDSA bible

ISAIJA 30

¹“Ħażin għalikom, ulied xewwiexa, oraklu tal-Mulej. Jippruvaw, iżda mingħajri, jintrabtu u jiftiehmu, iżda mhux skont l-ispirtu tiegħi, biex iżidu dnub fuq dnub.

²Telqu u niżlu l-Eġittu, bla ma stħarrġu x’ngħid jien. Marru jistagħnew bil-qawwa tal-Fargħun, ifittxu l-kenn taħt dell l-Eġittu.

³Imma l-qawwa tal-Fargħun tkun għajb għalikom, u l-kenn taħt dell l-Eġittu l-mistħija tagħkom.

⁴Meta jaslu l-prinċpijiet tiegħu f’Sogħan, u l-messaġġiera tiegħu jilħqu Ħanes,

⁵kulħadd jistħi minn poplu bla fejda, għax mhux ta’ għajnuna, anqas ta’ siwi, imma ta’ għajb u diżunur.

⁶Oraklu għall-bhejjem tan-Negeb: F’art ta’ hemm u dwejjaq, fejn hemm l-iljun u l-iljuna jgħajtu, il-lifgħa u s-serp itir[104], iġorru ġidhom fuq dahar il-ħmir, u t-teżori tagħhom fuq ħotbiet l-iġmla għal għand poplu li ma jiswiex.

⁷L-għajnuna tal-Eġittu hi fiergħa u vojta; għalhekk jien sejjaħtlu: “Raħab l-għażżiena”.

⁸Issa, ejja iktibhielhom fuq tavlozz, u naqqaxha quddiemhom fuq il-bronż, biex tkun għaż-żmien li ġej xhieda għal dejjem.

⁹Għax dan il-poplu xewwiex, ulied giddieba; ulied li ma jridux jisimgħu il-liġi tal-Mulej.

¹⁰Jgħidu lill-veġġenti: ‘La tarawx,’ u lill-profeti: ‘La tħabbrulniex is-sewwa. Għidulna li jogħġobna; ħabbrulna l-ħolm.

¹¹Oħorġu mit-triq, warrbu mill-mogħdija, neħħulna minn quddiemna l-Qaddis ta’ Iżrael.’

¹²Għalhekk dan jgħid il-Qaddis ta’ Iżrael: “Talli intom tistmerru dan il-kliem, u tittamaw fil-qerq u l-għawġ, u fuqhom tistrieħu,

¹³għalhekk dan id-dnub ikun għalikom, bħal biċċa ħajt imżakkra se taqa’ mill-għoli, waslet fi tmiemha sakemm tiġġarraf ħabta u sabta;

¹⁴titfarrak bħalma titfarrak ġarra tal-fuħħar, titkisser bla ħniena, u ma tibqax xaqqufa mill-frak tagħha biex tiġbor biha ġamra mill-kenur, jew timla qatra ilma minn ġol-ġiebja.

¹⁵Għax dan jgħid Sidi l-Mulej, il-Qaddis ta’ Iżrael: “Fil-konverżjoni u l-kalma ssibu s-salvazzjoni tagħkom; fil-kwiet u l-fiduċja qiegħda l-qawwa tagħkom.” Imma intom ma ridtux, iżda għedtu:

¹⁶“Fuq żwiemel naħarbu,” għalhekk tassew għad taħarbu. “Fuq żwiemel ħfief nirkbu,” u ħfief ikunu dawk li għad jiġru warajkom.

¹⁷Mit-theddida ta’ wieħed jitbeżżgħu elf, quddiem it-theddida ta’ ħamsa taħarbu, sakemm tibqgħu bħal arblu fuq quċċata ta’ muntanja, bħal lasta fuq għolja.

¹⁸Madankollu mxennaq il-Mulej biex jagħdirkom, u għalhekk iqum biex iħenn għalikom. Għax Alla ġust hu l-Mulej; henjin dawk li jafdaw fih.

¹⁹Iva, poplu ta’ Sijon, int li tgħammar f’Ġerusalemm, ma tibkix aktar. Il-Mulej iħenn għalik mal-ħoss tal-għajta tiegħek, malli jisimgħek jagħtik widen.

²⁰Tassew li l-Mulej jagħtik ħobż l-imrar, u l-ilma tan-niket, iżda ma jinħebiex iżjed minnek l-Imgħallem tiegħek; għajnejk jaraw l-Imgħallem tiegħek.

²¹Minn warajk jisimgħu widnejk kliem li jwissik u jgħidlek: “Din hi t-triq; għaddi minnha, sew jekk tikser lejn il-lemin, sew lejn ix-xellug.”

²²Imbagħad int tniġġes ix-xbihat imnaqqxa bil-fidda miksija, ix-xbihat imdewba u mdiehba tiegħek; int tarmihom bħal ħwejjeġ maħmuġa, u tgħidilhom: “Morru ’l barra!”

²³U hu jibgħat ix-xita fuq il-miżrugħ tiegħek, u l-qamħ, frott l-art, ikun bnin u mimli. Dakinhar l-imrieħel tiegħek jirgħu f’wesgħat kbar;

²⁴fir-raba’ l-gniedes u l-ħmir tax-xogħol jieklu għalf immellaħ, imderri bil-midra u mgħoddi mill-għarbiel.

²⁵U fuq kull muntanja kbira, fuq kull għolja wieqfa, ikun hemm xmajjar ta’ ilma f’jum il-ħerba l-kbira, f’jum it-tiġrif tal-fortizzi.

²⁶Id-dawl tal-qamar ikun jiddi bħad-dawl tax-xemx, u d-dawl tax-xemx jitqawwa seba’ darbiet, daqs id-dawl ta’ sebat ijiem; dakinhar il-Mulej idewwi l-ġrieħi tal-poplu tiegħu u jfejjaq it-tbenġil tas-swat tiegħu.

²⁷Araw, isem il-Mulej ġej mill-bogħod, mixgħul bil-korla u b’duħħan tiela’ madwaru, xufftejh mimlija qilla, u lsienu jibla’ bħan-nar.

²⁸U nifsu bħal xmara mfawra tilħaq sal-għonq, ġej biex jgħarbel il-ġnus b’għarbiel il-qerda, u jxedd f’xedaq il-popli lġiem, li joħroġhom barra t-triq.

²⁹U jkunilkom l-għana bħal meta billejl tiċċelebraw xi festa, u ferħ ta’ qalb bħal min jimxi bid-daqq tal-flawt, u jmur fuq l-għolja tal-Mulej lejn il-Blata ta’ Iżrael.

³⁰U l-Mulej isamma’ l-leħen solenni tiegħu, u juri d-daqqa ta’ driegħu, bil-qilla ta’ għadbu u lsien ta’ nar wikkiel, b’xita qawwija, tempesta u silġ kbir.

³¹Għax għal leħen il-Mulej titwerwer l-Assirja, meta jidrobha bil-virga tiegħu.

³²Ma’ kull daqqa ta’ ħatar il-kastig li jniżżel il-Mulej idoqqu t-tnabar u l-arpi flimkien maż-żfin; ixejjer l-armi u jissielet bihom.

³³Ilu mħejji t-Tofet għall-ħruq[105], lest għas-sultan, fond u wiesa’, b’gozz kbir ħatab għan-nar; nifs il-Mulej, bħal wied kubrit, jagħtih in-nar.