Read Maltese Bible with DC – IL-BIBBJA IL-KOTBA MQADDSA ISAIJA 31 Bible Online

ISAIJA 31 - Maltese Bible with DC – IL-BIBBJA IL-KOTBA MQADDSA bible

ISAIJA 31

¹Ħażin għalihom dawk li jinżlu l-Eġittu għall-għajnuna, għal dawk li jittamaw fiż-żwiemel; il-fiduċja tagħhom fil-kotra tal-karrijiet, u l-qawwa u s-saħħa tar-rikkieba, imma ma jittamawx fil-Qaddis ta’ Iżrael, u l-Mulej ma jfittxuhx.

²Imma hu wkoll għaref u jaf iġib id-deni, u kliemu ma jreġġgħux lura. Hu jqum kontra dar il-ħżiena, u kontra min jgħin għemil il-ħażen.

³L-Eġizzjani bnedmin huma, mhumiex Alla, u ż-żwiemel tagħhom laħam, u mhux ruħ. Meta l-Mulej imidd idu, jogħtor min jgħin, u jaqa’ l-megħjun, u lkoll flimkien jintemmu.

⁴Għax dan qalli l-Mulej: “Bħalma jgħajjat fuq il-priża l-iljun u ferħ l-iljun, u tinġama’ kontrih il-qatgħa tar-rgħajja, imma hu ma jibżax mill-għajjat tagħhom, u anqas jintreħa quddiem il-kotra tagħhom, hekk jinżel il-Mulej tal-eżerċti, biex jitqabad fuq il-muntanja ta’ Sijon u l-għolja tagħha.

⁵Bħall-għasafar jittajru, hekk il-Mulej tal-eżerċti iħares ’il Ġerusalemm, ikenninha u jħarisha, jaħfrilha u jeħlisha.

⁶Erġgħu lura għal għand dak li minnu tbegħedtu sewwa, o wlied Iżrael!

⁷F’dak il-jum kulħadd jarmi l-allat tiegħu, l-allat tal-fidda u l-allat tad-deheb, l-allat li għamlu idejkom għad-dnub.

⁸“U taqa’ l-Assirja b’xabla mhux ta’ bniedem; u xabla mhux ta’ bniedem tikolha. Jekk taħrab minn quddiem ix-xabla, iż-żgħażagħ tagħha jispiċċaw ilsiera.

⁹Il-fortizza tagħha[106] ddub bil-biża’ u l-fizzjali tagħha mbeżżgħa jħallu l-istendardi.” Dan hu l-oraklu tal-Mulej, li għandu n-nar fuq Sijon, u l-forġa f’Ġerusalemm.