Read Maltese Bible with DC – IL-BIBBJA IL-KOTBA MQADDSA ISAIJA 32 Bible Online

ISAIJA 32 - Maltese Bible with DC – IL-BIBBJA IL-KOTBA MQADDSA bible

ISAIJA 32

¹Araw, sultan għad isaltan bil-ġustizzja, u prinċpijiet jaħkmu bis-sewwa.

²U kull wieħed ikun bħal ilqugħ għar-riħ, u kenn fit-tempesta, bħal swieqi tal-ilma f’art niexfa, bħal dell ta’ blata kbira fuq art imħeddla.

³Ma jitgħammxux għajnejn dawk li jaraw, u jinfetħu widnejn dawk li jisimgħu.

⁴L-imħuħ imħawda jfittxu l-għerf u lsien it-temtiema jinħall u jeħfief.

⁵Lill-bniedem iblah ma jsejħulux aktar nobbli, u l-imbruljun anqas ma jgħidulu galantom.

⁶Għax l-iblah il-bluha jitkellem, u moħħu jfassal il-ħsara, biex jagħmel il-ħażen; u jitkellem mgħawweġ kontra l-Mulej, biex imbagħad iħalli għar-riq griżmejn l-imġewwaħ, u lill-għatxan jiċħadlu x-xorb.

⁷Għodod l-imbruljun kollha ħżiena; jinseġ il-qerq, biex jeqred iż-żgħar bi kliem giddieb imqar meta l-kawża tal-fqir tkun ġusta.

⁸Imma min hu nobbli jaħseb ħwejjeġ nobbli; u jindaħal dejjem għal ħwejjeġ kbar.

⁹O nisa bla ħsieb, qumu u isimgħu leħni! O xbejbiet moħħkom mistrieħ, agħtu widen għal kliemi!

¹⁰Fi ftit jiem aktar minn sena għad titkexkxu, intom li moħħkom mistrieħ iżżejjed, għax jonqos l-għasir, il-ġabra tal-ħsad ma tasal qatt.

¹¹Triegħdu, intom nisa bla ħsieb, tkexkxu intom b’moħħkom mistrieħ. Inżgħu u nkixfu, ħażżmu xkora ma’ qaddkom,

¹²ħabbtu fuq sidirkom, għar-raba’ sabiħ, għad-dielja għammiela,

¹³għal art il-poplu tiegħi mimlija xewk u għollieq, għad-djar kollha tal-pjaċir, għall-belt ferrieħa.

¹⁴Iva, il-palazz[107] għad jitilquh, l-għagħa tal-belt jintemm, l-għolja ta’ Ofel u t-torri ta’ Baħan[108] jisfgħu għerien għal dejjem, l-għaxqa tal-ħmir selvaġġi, mergħa għall-imrieħel.

¹⁵Imbagħad jissawwab fuqna spirtu mill-għoli, u d-deżert jinbidel f’art għammiela, u l-art għammiela ssir foresta.

¹⁶U tistrieħ il-ġustizzja fid-deżert, u s-sewwa jgħammar f’art għammiela.

¹⁷Is-sliem ikun frott il-ġustizzja, u l-ħidma tal-ġustizzja tkun serħan u tama għal dejjem.

¹⁸U l-poplu tiegħi f’post tas-sliem, jgħammar bla biża’, mistrieħ fil-kwiet.

¹⁹U l-foresta taqa’ u tiġġarraf, u l-belt titniżżel sa isfel nett.

²⁰Henjin intom, li tiżirgħu ħdejn kull ilma, u tħollu riġlejn il-gendus u l-ħmar.