Read Maltese Bible with DC – IL-BIBBJA IL-KOTBA MQADDSA ISAIJA 33 Bible Online

ISAIJA 33 - Maltese Bible with DC – IL-BIBBJA IL-KOTBA MQADDSA bible

ISAIJA 33

¹Ħażin għalik, int li tħarbat u għadhom ma ħarbtukx; int li tqarraq, u għadhom ma qarrqux bik. Meta ma tħarbatx aktar, iħarbtuk; meta ma tqarraqx aktar, iqarrqu bik.

²Mulej ħenn għalina, fik nittamaw. Kun driegħ għalina kull filgħodu, u s-salvazzjoni tagħna fi żmien it-taħbit.

³Għall-ħsejjes tal-għagħa ħarbu l-ġnus; mal-qawmien tiegħek xterdu l-popli.

⁴Inġabret il-priża, bħalma jinġabru l-ġradijiet; jinxteħtu fuqha bħalma jinxteħet il-ġrad.

⁵Tgħolla l-Mulej, għax jgħammar fl-għoli; lil Sijon imlieha bil-ġustizzja u s-sewwa.

⁶U l-qawwa tiegħek fil-liġi tiegħu; u s-salvazzjoni tiegħek fl-għerf u s-sapjenza; il-biża’ ta’ Alla t-teżor tiegħu.

⁷Ara, in-nies ta’ Arjel[109] jgħajtu minn barra, il-messaġġiera ta’ Salem jibku bl-imrar.

⁸It-toroq baħħ, ħadd ma hemm li jgħaddi l-mogħdijiet. Kiser il-patt, ix-xhieda stmerrhom, ma ta kas ta’ ħadd.

⁹Bil-vistu mifni l-pajjiż, il-Libanu mħawwad u midbiel, Saron[110] sar bħad-deżert u bla weraq Basan u Karmel.

¹⁰“Issa nqum!” jgħid il-Mulej, “Issa nqum fuq qaddi; issa nogħla ’l fuq.”

¹¹Intom ħbiltu l-ħuxlief, u issa tildu t-tiben; nifsi bħan-nar jikolkom.

¹²U l-ġnus jinħarqu bħal kalkara tal-ġir, bħal xwiek maqtugħa u mogħtija n-nar.

¹³Intom li fil-bogħod tinsabu, isimgħu jien x’għamilt! Intom li qegħdin fil-qrib, kunu afu bis-setgħa tiegħi!

¹⁴Il-ħatja f’Sijon twerwru, fuq il-ħżiena waqa’ l-biża’. Min minna se joqgħod ma’ nar qerriedi? Min minna se joqgħod ma’ nirien dejjem iħeġġu?

¹⁵Min jimxi fis-sewwa u jgħid id-dritt, min jistmerr il-qligħ miksub bil-qerq, min iwarrab idejh biex ma jixxaħħamx, min isodd widnejh biex b’tixrid id-dmija ma jismax, min jagħlaq għajnejh biex ħażen ma jarax:

¹⁶dan jgħammar fl-għoli: fortizza taż-żonqor il-kenn tiegħu, il-ħobż tiegħu jsibu, u l-ilma qatt ma jonqsu.

¹⁷Jaraw għajnejk sultan[111] fi ġmielu, jaraw art mifruxa ’l bogħod.

¹⁸Ħsiebek imur fuq it-twerwir li għadda: “Fejn hu dak li jgħodd? Fejn hu dak li jiżen? Fejn hu min jgħodd il-fortizzi?”

¹⁹Ma tarax iżjed poplu qalil, poplu bi lsien tqil li ma tifhmux, b’ilsien itemtem li ma tfissrux.

²⁰Ħares lejn Sijon, il-belt tal-festi tagħna! Jaraw għajnejk ’il Ġerusalemm, dar is-sliem, għarix ma jħarrku ħadd; il-kunjardi tagħha ma jaqlagħhom ħadd; il-ħbula tagħha ma jinqatgħu b’xejn.

²¹Għax hemm għalina jkun il-kobor tal-Mulej, hemmhekk ix-xmajjar u l-widien wesgħin, mnejn ebda ġifen bl-imqadef ma jgħaddi, u lanqas ma jaqsmu xwieni kbar[112].

²²Għax il-Mulej hu l-imħallef tagħna; il-Mulej il-leġislatur tagħna. Il-Mulej is-sultan tagħna, hu li jsalvana.

²³Irħew il-ħbula tiegħek, ma jżommux aktar l-arblu f’postu, ma jifirxux aktar il-qlugħ. Imbagħad l-għomja jaqsmu priża kbira, u z-zopop ikollhom sehem fil-ħatfa.

²⁴U ħadd minn min jgħammar hemm ma jgħid: “Jien marid.” Il-poplu li hemm fiha tinħafirlu ħżunitu.