Read Maltese Bible with DC – IL-BIBBJA IL-KOTBA MQADDSA ISAIJA 34 Bible Online

ISAIJA 34 - Maltese Bible with DC – IL-BIBBJA IL-KOTBA MQADDSA bible

ISAIJA 34

¹Ersqu, ġnus, ħa tisimgħu, u intom, popli, agħtu widen! Ħa tisma’ l-art u kulma fiha, id-dinja u kulma trodd.

²Għax il-Mulej mgħaddab għall-ġnus kollha, u s-saħna tiegħu fuq l-eżerċti kollha tagħhom. Qatagħha li lkoll jeqridhom, u jerħihom għall-qatla.

³Il-maqtula tagħhom jintremew, u titla’ l-intiena minn ġisimhom. Iċarċru b’demmhom il-muntanji.

⁴Il-qtajjiet tas-smewwiet jinħallu, u s-smewwiet bħal ktieb jitkebbu. Il-qtajjiet tagħhom jaqgħu, bħalma jaqa’ l-weraq midbiel mid-dielja u l-frott misjur mit-tina.

⁵Għax fis-smewwiet sikret ix-xabla tiegħi, u għad tinżel fuq Edom, fuq poplu mitluq għall-qerda, biex minnu tagħmel ħaqq.

⁶Ix-xabla tal-Mulej tħammar bid-demm, tqattar bix-xaħam, bid-demm tal-ħrief u l-bdabad, bix-xaħam tal-kliewi tal-imtaten. Għax ikollu l-Mulej sagrifiċċju f’Bosra, qatla kbira f’Edom.

⁷Jaqgħu l-bufli mal-għoġiela smien, il-gniedes mal-barrin. Arthom tisker bid-demm, u trabhom bix-xaħam isir tajn.

⁸Għax hu jum il-vendetta tal-Mulej, is-sena tal-ħlas għall-għadu ta’ Sijon.

⁹Il-widien tiegħu jinbidlu f’qatran. U trabu f’kubrit. U artu ssir qatran

¹⁰iħeġġeġ lejl u nhar. Qatt ma tintefa, id-dħaħen minnha dejjem telgħin. Tkun ħerba għal dejjem minn żmien għal żmien; qatt iżjed ma jgħaddu minnha.

¹¹Jirtuha l-pellikan u l-qanfud, fiha jgħammru l-kokka u ċ-ċawlun. Il-Mulej jifrex fuqha l-ħabel tal-vojt, u ċ-ċomb tal-baħħ.

¹²In-nobbli tagħha ma jkunux aktar, u slaten aktar ma jipproklamawx, u prinċpijiet jiġu fix-xejn.

¹³Fil-palazzi tagħha jinbet ix-xewk; għollieq u ħurrieq fil-fortizzi tagħha. Issir kenn għax-xakalli, u bitħa għan-ngħam.

¹⁴Jiltaqgħu hemm il-jena u l-klieb tax-xagħri; u l-mogħoż selvaġġi jsejħu lil xulxin; hemm ukoll toqgħod il-kokka tad-deżert, u ssib il-mistrieħ tagħha.

¹⁵Hemm ibejjet is-serp u jbid, isaħħan u jfaqqas il-bajd. Hemm ukoll jiltaqgħu l-isqra, is-sieħeb mas-sieħba tiegħu.

¹⁶Fittxu fil-ktieb tal-Mulej[113] u aqraw: “Ma tonqos ebda waħda minnhom l-ebda waħda ma titlef lil seħibha. Għax fommi kkmanda dan.” L-ispirtu tiegħu li ġabarhom;

¹⁷hu li xeħet xortihom, u idu qassmitilhom l-art bil-ħabel. Tkun wirthom għal dejjem, minn ġenerazzjoni għal oħra jgħammru fiha.