Read Maltese Bible with DC – IL-BIBBJA IL-KOTBA MQADDSA ISAIJA 35 Bible Online

ISAIJA 35 - Maltese Bible with DC – IL-BIBBJA IL-KOTBA MQADDSA bible

ISAIJA 35

¹Ħa jifirħu d-deżert u l-art maħruqa; ħa jifraħ ix-xagħri u jwarrad, ħa jwarrad bħar-ranġis.

²Ħa tifraħ fuq li tifraħ, taqbeż u tgħanni. Sebħ il-Libanu jingħata lilha, il-ġmiel tal-Karmel u ta’ Saron. Għad jaraw is-sebħ tal-Mulej, il-ġmiel ta’ Alla tagħna.

³Qawwu l-idejn mitruħa; saħħu l-irkupptejn imriegħda.

⁴Għidu lil dawk b’qalbhom imbeżżgħa: “Agħmlu l-ħila, la tibżgħux! Araw, Alla tagħkom ġej jitħallas; il-ħlas ta’ Alla wasal; Hu stess ġej biex isalvakom.

⁵Imbagħad jinfetħu għajnejn l-għomja, jinfetħu widnejn it-torox.

⁶Imbagħad iz-zopp jaqbeż bħal għażżiela u lsien l-imbikkma jinħall bil-ferħ. Iva, igelgel l-ilma fid-deżert, u l-widien fix-xagħri.

⁷L-art maħruqa tinbidel f’għadira, u l-art niexfa f’għejun ta’ ilma ġieri. Fejn qabel kienu jimteddu x-xakalli, issa hemm il-ħmiemel tal-qasab u l-ġummar.

⁸Hemm ikun hemm triq, isejħulha: ‘It-Triq il-Qaddisa’. Ħadd imniġġes ma jgħaddi minnha, u l-boloh ma jiġġerrewx fiha.

⁹Ma jkunx hemm l-iljun, u ebda bhima feroċi ma titla’ minnha[114]: minnha jgħaddu l-mifdijin.

¹⁰Jerġgħu lura l-mifdijin tal-Mulej, u jidħlu f’Sijon jgħajtu bil-ferħ, b’ferħ ta’ dejjem fuq rashom. Il-ferħ u l-hena jiksbu, u jgħibu swied il-qalb u l-krib.