Read Maltese Bible with DC – IL-BIBBJA IL-KOTBA MQADDSA ISAIJA 37 Bible Online

ISAIJA 37 - Maltese Bible with DC – IL-BIBBJA IL-KOTBA MQADDSA bible

ISAIJA 37

¹Malli s-sultan Ħeżekija sama’ b’dan, ċarrat ilbiesu u nkesa bi xkora, u mar fit-tempju tal-Mulej.

²U bagħat lil Eljakim, li kien jagħmel mill-palazz, u ’l Sebna s-segretarju, u x-xjuħ tal-qassisin liebsa x-xkejjer għand il-profeta Isaija bin Amos.

³U qalulu: “Dan jgħid Ħeżekija: ‘Jum ta’ diqa u kastig u għajb illum; l-ulied waslu għat-twelid, imma n-nisa bla saħħa.

⁴Għandu mnejn jisma’ l-Mulej Alla tiegħek il-kliem tal-gran kuppier, mibgħut minn sidu s-sultan tal-Assirja, biex iżeblaħ lil Alla l-ħaj, u jrażżnu għall-kliem li sama’ l-Mulej Alla tiegħek. Itlob bil-qawwa għall-bqija li għad fadal.”

⁵U l-qaddejja ta’ Ħeżekija marru għand Isaija.

⁶U Isaija qalilhom: “Dan għidu lil sidkom: ‘Dan jgħid il-Mulej: La tibżax mill-kliem li smajt, li bih il-qaddejja tas-sultan tal-Assirja żebilħuni.

⁷Arawni, se nqajjem spirtu fih, u malli jisma’ aħbar jerġa’ lura lejn artu, u hemm f’pajjiżu neqirdu bix-xabla.”

⁸Il-gran kuppier raġa’ lura u sab lis-sultan tal-Assirja jitqabad kontra Libna; għax kien sama’ li dan kien tbiegħed minn Lakis.

⁹U s-sultan sama’ b’Tirħaka, sultan ta’ Kus: “Ara, ħareġ jeħodha kontrik.” Għalhekk raġa’ bagħat xi messaġġiera għand Ħeżekija u qalilhom:

¹⁰“Dan għidulu lil Ħeżekija, sultan ta’ Ġuda; ‘Lil Alla tiegħek, li fih inti tqiegħed it-tama tiegħek, tħallihx iqarraq bik billi jgħidlek li Ġerusalemm ma tistax tingħata f’idejn is-sultan tal-Assirja!

¹¹Inti smajt x’għamlu s-slaten tal-Assirja lill-pajjiżi l-oħra kollha, kif qerduhom għalkollox. Int waħdek se teħles?

¹²Jaqaw il-ġnus li missirijieti qerdu - Gożan, Ħaran, Resef, u l-poplu ta’ Għeden, li kienu jgħammru f’Telaxxar - ħelsuhom l-allat tagħhom?

¹³Fejn hu s-sultan ta’ Ħamat, u s-sultan ta’ Arfad, u s-sultan tal-belt ta’ Sefarwajjin, ta’ Ħena u Għiwwa?”

¹⁴Ħeżekija ħa l-ittra minn id il-messaġġiera u qraha. Imbagħad tala’ fit-tempju tal-Mulej, u firixha quddiem il-Mulej.

¹⁵U Ħeżekija talab lill-Mulej b’dan il-kliem:

¹⁶“Mulej tal-eżerċti, Alla ta’ Iżrael, li qiegħed fuq il-kerubini, int waħdek Alla fuq is-saltniet kollha tal-art; int għamilt is-smewwiet u l-art.

¹⁷Agħti widen, Mulej, u isma’; iftaħ għajnejk, Mulej, u ara! Isma’ l-kliem ta’ Sanħerib, li bih bagħat iżeblaħ lil Alla l-ħaj.

¹⁸Kollu minnu, Mulej, li s-slaten tal-Assirja ħarbtu l-ġnus u artijiethom;

¹⁹u xeħtu l-allat, għax mhumiex ħlief ħatab u ġebel, xogħol ta’ id il-bniedem, u għalhekk setgħu jġibuhom fix-xejn.

²⁰Issa, Mulej Alla tagħna, salvana minn idu, u jkunu jafu s-saltniet kollha tal-art li inti waħdek Alla, Mulej.”

²¹Imbagħad Isaija bin Amos bagħat jgħid lil Ħeżekija: “Dan jgħid il-Mulej, Alla ta’ Iżrael: ‘Kulma tlabtni dwar is-sultan Sanħerib, sultan tal-Assirja, jiena smajtu.’

²²Dan jgħid il-Mulej kontrih: ‘Tistmerrek, tiddieħak bik, ix-xebba bint Sijon. Minn warajk tħarrek rasha, bint Ġerusalemm.

²³Lil min għajjart u lil min żeblaħt? Kontra min għollejt leħnek, u rfajt għajnejk fl-għoli? Kontra l-Qaddis ta’ Iżrael!

²⁴Bil-messaġġiera tiegħek għajjart lis-Sid, u għedt: ‘Bil-kotra tal-karrijiet tiegħi jien tlajt fl-għoli fuq il-muntanji, fuq il-qċaċet tal-Libanu. Qaċċatt l-ogħla ċedri tiegħu, l-isbaħ fost iċ-ċipress tiegħu. Dħalt fl-ibgħad irkejjen tiegħu, fil-foresti tiegħu qishom ġonna.

²⁵Jiena ħaffirt u xrobt l-ilma tal-barrani, jien nixxift b’qiegħ saqajja l-widien kollha tal-Eġittu.

²⁶Ma smajtx jaqaw li sa minn żmien ilu dan ħejjejtu jien? Minn żmien il-qedem jien kont sawwartu, u issa temmejtu. Int kellek tagħmel gozz ħerba bliet bis-swar.

²⁷U nieshom bla ħila, tħawdu u twerwru, saru bħal ħaxix tar-raba’, bħal inbiet tari, bħal ħażiż tal-bjut, u sbul maħruq mir-riħ tal-Lvant.

²⁸Kull meta inti toqgħod, jew toħroġ, jonkella tidħol, u meta tagħdab għalija, jiena nkun naf.

²⁹Ladarba żżarġant kontrija, u l-kburija tiegħek waslet f’widnejja, jiena ngħaddi ħolqti minn imnifsejk, u lġiemi minn xufftejk, u rreġġgħek lura fi triqtek li minnha ġejt.’

³⁰U dan ikun is-sinjal: Din is-sena tiekol milli jinbet waħdu, sena oħra dak li jinbet minn dan, u fit-tielet sena tiżirgħu u taħsdu, u tħawlu d-dwieli u tieklu mill-għelejjel tagħhom.

³¹U l-fdal li jkun ħeles mid-dar ta’ Ġuda jibqgħu u jxenxlu għeruqhom fil-fond u jagħmlu l-frott fil-wiċċ.

³²Għax minn Ġerusalemm joħroġ il-fdal u mill-muntanja ta’ Sijon il-meħlusin. Il-ħeġġa tal-Mulej tagħmel dan.

³³Għalhekk dan jgħid il-Mulej għas-sultan tal-Assirja: ‘F’din il-belt ma jidħolx; ebda vleġġa ma jwaddab fiha; ebda tarka ma jressaq quddiemha; ebda ħajt ma jtella’ madwarha.

³⁴Mit-triq li minnha ġie, minnha jerġa’ lura, u f’din il-belt ma jidħolx, oraklu tal-Mulej.

³⁵Jiena nħares din il-belt u nsalvaha minħabba fija nnifsi, u minħabba David, il-qaddej tiegħi.’ ”

³⁶U ħareġ l-anġlu tal-Mulej fil-kamp tal-Assiri u qered mija u ħamsa u tmenin elf ruħ. Xħin qamu l-oħrajn filgħodu, hemm isibuhom ilkoll iġsma mejta.

³⁷Imbagħad Sanħerib, sultan tal-Assirja, rafa’ l-kamp u telaq u raġa’ lura u baqa’ f’Ninwè.

³⁸U kif kien mixħut fl-art fit-tempju ta’ Nisrok, alla tiegħu, Adrammelek u Sareser, uliedu, darbuh bix-xabla u ħarbu lejn l-art ta’ Ararat. U saltan minfloku Asarħaddun, ibnu.