Read Maltese Bible with DC – IL-BIBBJA IL-KOTBA MQADDSA ISAIJA 39 Bible Online

ISAIJA 39 - Maltese Bible with DC – IL-BIBBJA IL-KOTBA MQADDSA bible

ISAIJA 39

¹Dak iż-żmien Merodak-baladan[119] bin Baladan, sultan ta’ Babilonja, bagħat ittra u rigal lil Ħeżekija, għax kien sama’ li Ħeżekija kien marad u fieq.

²Ħeżekija feraħ bihom u wriehom id-dar tat-teżor, il-fidda u d-deheb, il-fwejjaħ u ż-żejt fin, l-armerija u kulma kien jinsab fl-imħażen tiegħu; ma kien hemm xejn f’daru u f’saltnatu, li Ħeżekija ma wrihomlhomx.

³U l-profeta Isaija ġie għand Ħeżekija u qallu: “X’qalulek dawk in-nies? Mnejn ġew għandek?” U Ħeżekija wieġbu: “Minn art imbiegħda, ġew għandi minn Babilonja.”

⁴U qallu: “X’raw fil-palazz tiegħek?” U Ħeżekija wieġbu: “Raw kulma jinsab fil-palazz tiegħi; ma kien hemm xejn fl-imħażen tiegħi li ma wrejthulhomx.”

⁵U Isaija wieġeb lil Ħeżekija: “Isma’ l-kelma tal-Mulej tal-eżerċti:

⁶‘Ara, għad jiġi żmien[120] li jinġarr f’Babilonja kulma jinsab f’darek u kulma ħażnu s’issa missirijietek! Ma jifdal xejn. Il-kelma tal-Mulej.

⁷U minn fost uliedek li għad joħorġu minnek, li int għad tnissel, jittieħdu u jkunu ewnuki fil-palazz tas-sultan ta’ Babilonja.”

⁸U Ħeżekija qal lil Isaija: “Sewwa l-kelma tal-Mulej, li għedt.” Għax ħaseb: “Għallinqas fi żmieni jkun hemm is-sliem u s-sigurtà.”