Read Maltese Bible with DC – IL-BIBBJA IL-KOTBA MQADDSA ISAIJA 40 Bible Online

ISAIJA 40 - Maltese Bible with DC – IL-BIBBJA IL-KOTBA MQADDSA bible

ISAIJA 40

¹“Farrġu, farrġu l-poplu tiegħi,” jgħid Alla tagħkom.

²Kellmu lil qalb Ġerusalemm u għidulha li ntemm il-jasar tagħha[121], tħallset ħżunitha, ħadet mingħand il-Mulej darbtejn għal dnubietha kollha.

³Leħen jgħajjat: “Ħejju t-triq għall-Mulej fid-deżert, wittu għal Alla tagħna mogħdija fix-xagħri.

⁴Jintradam kull wied, u jitniżżlu l-muntanji u l-għoljiet; kull art imħabbta titwitta kull art imħarbta ssir maqgħad.

⁵U tfiġġ il-glorja tal-Mulej, u l-bnedmin jarawha lkoll f’daqqa, għax fomm il-Mulej tkellem.”

⁶U leħen qal: “Għajjat.” U jien weġibt: ‘X’ngħajjat?” Għid: “Kull bniedem ħaxix, u sbuħitu bħal ward ir-raba’;

⁷jinxef il-ħaxix, jidbiel il-ward, meta minn fuqhom jgħaddi nifs il-Mulej. - Bħal ħaxix il-poplu -

⁸Il-ħaxix jinxef, u l-ward jidbiel, iżda l-kelma tal-Mulej tibqa’ għal dejjem.”

⁹Itla’ fuq il-muntanja għolja, int li ġġib il-bxara t-tajba lil Sijon; għolli leħnek bil-qawwa kollha, int li tagħti l-aħbar it-tajba lil Ġerusalemm; għajjat, la tibżax. Għid lill-ibliet ta’ Ġuda: “Hawn hu Alla tagħkom!”

¹⁰Hawn hu Sidi l-Mulej, li ġej bil-qawwa, u jaħkem bil-qawwa ta’ driegħu. Hawn hu bi ħlasu miegħu, u r-rebħa tiegħu quddiemu.

¹¹Bħal ragħaj li jirgħa l-merħla tiegħu; bi driegħu jiġmagħha, u l-ħrief fi ħdanu jerfagħhom; u n-nagħaġ ireddgħu bil-mod imexxihom.

¹²Min kejjel il-baħar f’qiegħ idu, jew qies bix-xiber il-wisa’ tas-sema? Min ġabar it-trab tal-art ġo kejla, jew wiżen bi stasija l-muntanji, u b’miżien l-għoljiet?

¹³Min mexxa l-ispirtu tal-Mulej, x’kunsillier kellu biex jgħallmu?

¹⁴Lil min talab parir biex jiftaħlu għajnejh; jew min għallmu jġib ruħu bil-ġustizzja, biex jagħtih id-dawl u l-għerf, u jqabbdu t-triq tal-għaqal?

¹⁵Ara, il-ġnus bħal qatra waħda minn barmil ilma, bħal għabra trab f’miżien, hekk qishom! Ara, ix-xtut ma jiżnux aktar minn traba.

¹⁶Is-siġar tal-Libanu mhumiex biżżejjed biex bihom tqabbad in-nar; anqas il-bhejjem tiegħu mhuma biżżejjed biex toffri lil Alla sagrifiċċju tal-ħruq.

¹⁷Il-ġnus kollha qishom xejn quddiemu[122]: huma għalih ħwejjeġ fiergħa u battala.

¹⁸Ma’ min se jxebbhu lil Alla, u liema xbieha se tqabblu miegħu?

¹⁹L-idolu jdewbu bin is-sengħa, u jindurah ħaddiem id-deheb, u jsensillu ħjut tal-fidda.

²⁰Xi ħadd fqajjar li ma għandux x’joffri, jagħżel xi għuda li ma ssewwisx, ifittex xi ħaddiem jinqala’, biex jagħmillu xbieha ma titħarrikx.

²¹Ma tafux? Ma smajtux jaqaw? Ma tħabbrilkomx sa mill-bidu? Ma fhimtux? Min waqqaf l-art?

²²Hu jgħammar ’il fuq minn ħnejjet l-art, u min jgħammar fiha qishom ġradijiet. Hu jħoll is-smewwiet bħal xoqqa, u jifrixhom bħal għarix biex tgħammar fih.

²³Hu jġib fix-xejn is-setgħanin, u l-mexxejja tad-dinja jagħmilhom xejn.

²⁴Bilkemm jitħawlu, bilkemm jinżergħu, bilkemm jinbtu u jxenxlu l-għeruq, li ma jonfoħx fuqhom u jinxfu, li r-riefnu ma jġorrhomx bħall-karfa.

²⁵“Ma’ min ixxebbhuni jew tqabbluni?” jistaqsi l-Qaddis.

²⁶Erfgħu għajnejkom ’il fuq u araw: min ħalaqhom[123] dawn il-ħlejjaq kollha? Imexxi u jgħodd l-eżerċti tiegħu, u jsejħilhom b’isimhom wieħed wieħed. Bis-saħħa ta’ qawwietu, bil-qawwa ta’ setegħtu, ħadd minnhom ma jonqos.

²⁷Għaliex titkellem Ġakobb, u int, Iżrael, tgħid: “Triqti moħbija mill-Mulej, u mwarrab il-jedd tiegħi minn Alla?”

²⁸Jaqaw ma tafx, lanqas ma smajt: “Il-Mulej hu Alla ta’ dejjem, il-ħallieq ta’ truf l-art?” Ma jegħja qatt, u ma jinkeddx, l-għerf tiegħu ma ssibx tarfu.

²⁹Hu li jagħti l-qawwa lill-għajjien, u jkattar il-qawwa lil min hu bla saħħa.

³⁰Jintelqu ż-żgħażagħ u jegħjew, fl-aħjar tagħhom jogħtru l-irġiel.

³¹Imma dawk li jittamaw fil-Mulej jieħdu saħħithom, itellgħu l-ġwienaħ bħall-ajkli, jiġru bla ma jegħjew, jimxu bla ma jintelqu.