Read Maltese Bible with DC – IL-BIBBJA IL-KOTBA MQADDSA ISAIJA 41 Bible Online

ISAIJA 41 - Maltese Bible with DC – IL-BIBBJA IL-KOTBA MQADDSA bible

ISAIJA 41

¹Isktu quddiemi, intom xtut; u ħalli l-popli jitqawwew mill-ġdid! Ħa jersqu l-ewwel, imbagħad jitkellmu: u nersqu għall-ħaqq flimkien!

²Min qajjem mil-Lvant lil dak[124], li r-rebħ jiġri wara riġlejh? Irħielu l-ġnus f’idejh, biex irażżan is-slaten? Li b’sejf jagħmilhom trab, u b’qawsu karfa ttir mar-riħ?

³Jiġri warajhom, u jibqa’ għaddej fis-sliem, lanqas biss b’riġlejh ma jmiss it-triq.

⁴Min għamlu u temmu dan? Min sejjaħ il-ġenerazzjonijiet mill-bidu? Jiena, il-Mulej, Jiena l-ewwel, u ma’ tal-aħħar, jiena hu!

⁵Jaraw ix-xtut u jibżgħu, truf l-art jitriegħdu. Huma resqu u ġew.

⁶Jgħinu ’l xulxin[125] sieħeb lil ieħor, u l-aħwa jgħidu lil xulxin: “Agħmel il-ħila!”

⁷Il-ħaddied jagħmel il-ħila lil tad-deheb; min jaħfi bil-martell lil min iħabbat fuq l-inkwina, u jgħidu: “Tajba s-saldatura.” U mbagħad jissudah bl-imsiemer, biex ma jitħarrikx.

⁸Imma int Iżrael, il-qaddej tiegħi, Ġakobb, jien ħtartek, nisel Abraham, ħabibi.

⁹Lilek jien qbadtek minn truf l-art, u sejjaħtlek minn l-ibgħad inħawi tagħha, u għedtlek: “Int il-qaddej tiegħi, jiena ħtartek, u ma rmejtikx.”

¹⁰La tibżax, għax miegħek jien! La titħassibx, għax Alla tiegħek jien! Jiena nwettqek, jiena ngħinek; inwieżnek bil-leminija rebbieħa tiegħi!

¹¹Ara, għad jistħu u jitriegħxu, dawk kollha li nkurlaw għalik; jiġu fix-xejn u jintemmu n-nies li jħaqquha miegħek.

¹²Tfittixhom u ma ssibhomx, in-nies li jeħduha miegħek; jiġu fix-xejn u jintemmu n-nies li jitqabdu miegħek.

¹³Jiena l-Mulej, Alla tiegħek, inwieżnek minn idek il-leminija, u ngħidlek: “La tibżax, jiena l-għajnuna tiegħek.”

¹⁴Tibżax, Ġakobb, daqsxejn ta’ dudu fl-art, intom, bnedmin ta’ Iżrael! Jiena l-għajnuna tiegħek, oraklu tal-Mulej, il-feddej[126] tiegħek, il-Qaddis ta’ Iżrael!

¹⁵Arani! Jien nagħmel minnek romblu tad-dris ġdid, jaqta’ u kollu snien. Int tidres il-muntanji u tfarrakhom, u l-għoljiet tagħmilhom tlief;

¹⁶int idderrihom u r-riħ iġorrhom, u r-riefnu jxerridhom. Imbagħad int tifraħ fil-Mulej, u tiftaħar bil-Qaddis ta’ Iżrael.

¹⁷Il-foqra u l-imsejknin ifittxu l-ilma u ma jsibux! Ilsienhom niexef bil-għatx. Jiena, il-Mulej, nismagħhom, Jiena, Alla ta’ Iżrael, ma ninsihomx.

¹⁸Xmajjar ta’ ilma nfawwar fuq l-għoljiet għerja, u għejun f’nofs il-widien. Nibdel id-deżert f’għadira ilma, u l-art niexfa f’għejun ta’ ilma.

¹⁹Inxettel iċ-ċedri fid-deżert, il-gazzi, u r-riħan, u s-siġar taż-żebbuġ; intella’ ċ-ċipress fix-xagħri, u magħhom id-dolf u l-bux;

²⁰biex hekk jaraw u jagħrfu, jaħsbu u jifhmu wkoll, li id il-Mulej għamlet dan, u l-Qaddis ta’ Iżrael ħalqu.

²¹“Ressqu l-kawża tagħkom,” jgħid il-Mulej, “Ġibu l-provi tagħkom,” jgħid is-sultan ta’ Ġakobb.

²²Ħa jersqu u jgħarrfuna x’se jiġri; jgħidulna l-imgħoddi x’kien, biex aħna naħsbu fuqu. Jew semmgħuna l-ġejjieni sabiex nagħrfu t-tmiem.

²³Għidulna x’se jiġri fl-aħħar, u nkunu nafu jekk intomx allat. Agħmlu xi ħaġa, tajba jew ħażina, u aħna nistagħġbu u nibżgħu fl-istess waqt.

²⁴M’intom xejn u xogħolkom ħrafa; mistmerr hu min jaħtarkom.

²⁵Jien qajjimt bniedem mit-Tramuntana[127] u hu ġej; sejjaħtlu b’ismu minn tlugħ ix-xemx: u jgħaffeġ il-ħakkiema bħalma jgħaffġu t-tajn, bħalma l-fuħħari jgħaffeġ it-tafal taħt saqajh.

²⁶Min qatt ħabbar sa mill-bidu, biex aħna nkunu nafu? Sa minn qabel, biex ngħidu: ‘Veru’? Qatt ħadd ma qalu; qatt ħadd ma semmgħu; qatt ħadd ma sama’ kliemkom.

²⁷Dan l-ewwel għarraftu lil Sijon; u ’l Ġerusalemm tajtha ħabbar.

²⁸Jien ħarist, ma kien hemm ħadd; ħadd minnhom biex jagħti parir, biex nistaqsihom u jwieġbu kelma.

²⁹Ilkoll kemm huma mhuma xejn, xogħolhom frugħa, riħ u baħħ xbihat allathom.