Read Maltese Bible with DC – IL-BIBBJA IL-KOTBA MQADDSA ISAIJA 42 Bible Online

ISAIJA 42 - Maltese Bible with DC – IL-BIBBJA IL-KOTBA MQADDSA bible

ISAIJA 42

¹Araw il-qaddej tiegħi[128], li jiena nwieżen, il-maħtur tiegħi li fih qalbi strieħet! Qegħedt l-ispirtu tiegħi fuqu, biex iġib il-ġustizzja lill-ġnus.

²Ma jgħajjatx, ma jgħollix leħnu; ma jsemmax leħnu fil-pjazez,

³qasba mġelġla ma jiksirhiex, musbieħ inemnem ma jitfihx. Iġib il-ġustizzja fis-sewwa.

⁴Ma jegħjiex, ma jitfarrakx, sakemm ma jwaqqafx il-ġustizzja fuq l-art; u l-gżejjer imbiegħda jistennew il-liġi tiegħu.

⁵Dan jgħid Alla, il-Mulej, li ħalaq u firex is-smewwiet, u l-medda tal-art bil-frott u l-ħdura tagħha, li jagħti l-ħajja lill-poplu li hemm fiha, u r-ruħ lil dawk li jgħixu fiha:

⁶“Jien, il-Mulej, sejjaħtlek fis-sewwa, qbadtek minn idek u ħaristek, u għamilt minnek patt tal-poplu, dawl għall-ġnus,

⁷biex int tiftaħ għajnejn l-għomja, toħroġ lill-ilsiera mill-ħabs, u ’l dawk li hemm fid-dlam minn dar l-għeluq.

⁸Jiena l-Mulej, dan hu ismi; ma nċedi lil ħadd il-glorja tiegħi; lanqas lill-idoli t-tifħir tiegħi.

⁹Il-ġrajjiet li tħabbru qabel, ara, veru seħħew. U jiena nħabbar ħwejjeġ ġodda, u nsemmagħhomlkom qabel ma jinbtu.”

¹⁰Għannu lill-Mulej għanja ġdida; ħa jitla’ minn truf l-art it-tifħir tiegħu! Ħa jsebbħuh il-baħar u kulma fih, il-gżejjer u min jgħammar fihom.

¹¹Jerfa’ leħnu d-deżert u l-ibliet tiegħu, l-irħula fejn jgħammru wlied Kedar; jgħannulu ferħana dawk li jgħammru f’Sela, jgħajtu bil-ferħ fuq qċaċet il-muntanji.

¹²Ħa jagħtu glorja lill-Mulej u jxandru t-tifħir tiegħu fil-gżejjer.

¹³Joħroġ il-Mulej bħal wieħed qawwi, u jqanqal bħal gwerrier il-ħeġġa tiegħu; jgħajjat l-għajta tal-gwerra, ħa juri kontra l-għedewwa l-qawwa tiegħu.

¹⁴Ili ħafna żmien inżomm is-skiet, qgħadt bi kwieti u trażżant. Bħal mara fl-uġigħ tal-ħlas se ngħajjat, nonfoħ u nilheġ f’nifs wieħed.

¹⁵Il-muntanji u l-għoljiet nagħmilhom ħerba, innixxfilhom ħdurithom kollha. Inbiddel ix-xmajjar f’xagħri, u nnixxef l-ilma qiegħed.

¹⁶Inmexxi lill-għomja fi triq li ma jafuhiex; mogħdijiet li ma jafuhomx inqabbadhom. Id-dlam inbiddlu f’dawl quddiemhom, it-triqat mgħawġa niddrittahom. Dan kollu nagħmlu għalihom, u qatt iżjed ma nabbandunahom.

¹⁷Iduru lura kollhom mistħija, dawk kollha li jittamaw fl-idoli, dawk li jgħidu lix-xbihat: “Intom allatna.”

¹⁸Intom torox, isimgħu! Intom għomja, ħarsu u araw!

¹⁹Min hu agħma ħlief il-qaddej tiegħi? Min hu trux bħall-messaġġier li bgħatt? Min hu agħma bħall-maħbub tiegħi? U trux bħall-qaddej tal-Mulej?

²⁰Jara ħafna ħwejjeġ, u ma jagħtix kas; widnejh miftuħa, iżda ma jismax.

²¹Għad li għoġob lill-Mulej bil-ġustizzja tiegħu li jkabbar u jsebbaħ il-liġi tiegħu,

²²hu poplu misruq u mneżża’[129]; maqbudin ilkoll fil-ħofor, magħluqin fil-ħabsijiet. Ħatfuhom u ħadd ma ħelishom; neżżgħuhom u ħadd ma jgħajjat: Rodd!

²³Min minnkom jagħti widen għal dan, u jaħseb fih u jisma’ għal li ġej?

²⁴Min kien li telaq lil Ġakobb biex jisirquh? Min telaq lil Iżrael għall-priża? Mhux il-Mulej, għax kontrih dinbu? Ma ridux jimxu fi triqatu, u l-liġi tiegħu ma obdewhiex.

²⁵Għalhekk sawwab fuqu n-nar tal-korla tiegħu, u l-qilla tal-gwerra, qabdet ħuġġieġa madwaru u ma ndunax; ikkunsmatu, u ma daħħalx f’rasu.