Read Maltese Bible with DC – IL-BIBBJA IL-KOTBA MQADDSA ISAIJA 43 Bible Online

ISAIJA 43 - Maltese Bible with DC – IL-BIBBJA IL-KOTBA MQADDSA bible

ISAIJA 43

¹Imma issa dan jgħid il-Mulej, dak li ħalqek, Ġakobb, dak li sawrek, Iżrael: “La tibżax, għax jien fdejtek: jien sejjaħtlek b’ismek; inti tiegħi.

²Anki jekk tgħaddi mill-ilma, jiena miegħek; jekk taqsam ix-xmajjar, ma jgħerrqukx. Anki jekk tgħaddi min-nar, ma tinħaraqx, u l-fjamma ma tibelgħekx.

³Għax jiena l-Mulej, Alla tiegħek, il-Qaddis ta’ Iżrael, is-Salvatur tiegħek. Irħejt l-Eġittu b’riskatt għalik, ’il Kus u ’l Seba minflokok.

⁴Għax int kont għażiż f’għajnejja, kollok ġieħ u jien ħabbejtek. Jien irħejt bnedmin minn flokok, u popli sħaħ partatt ma’ ħajtek.

⁵La tibżax għax jien miegħek; mil-Lvant inġib lil uliedek, mill-Punent jien niġemgħek.

⁶Ngħid lit-Tramuntana: Agħtihomli, u lin-Nofsinhar: La żżommhomlix! Ġibli s-subien mill-bogħod, ’il bnieti minn tarf l-art,

⁷lil kull min jissejjaħ b’ismi, lil min ħlaqt għall-glorja tiegħi, lil min sawwart u għamilt.”

⁸Oħroġ il-poplu agħma, għalkemm għandu għajnejh, u trux, għalkemm għandu widnejh.

⁹Ħa jinġemgħu l-ġnus ilkoll flimkien, ħa jiltaqgħu l-popli. Min minnhom jista’ jħabbar dan[130], u jsemmgħalna l-ġrajja tal-imgħoddi? Ħa jġibu x-xhieda u jippruvaw u n-nies jisimgħuhom u jgħidu: Hekk hu!

¹⁰“Intom ix-xhieda tiegħi, oraklu tal-Mulej, u l-qaddej tiegħi li jiena ħtart, biex tagħrfuni u temmnuni u tifhmu li jiena hu. Qabli qatt ma ssawwar xi alla, u lanqas warajja qatt ma jkun hemm.

¹¹Jiena, jiena l-Mulej, u ħliefi m’hemmx salvatur.

¹²Jiena ħabbart u jien salvajt. Jien semmajt, u fostkom alla barrani ma kienx hemm. Intom ix-xhieda tiegħi,” oraklu tal-Mulej. “Jiena Alla,

¹³sa minn dejjem jien hu. M’hemm ħadd li jeħles minn taħt idejja; min jista’ jraġġa’ lura li nagħmel jien?”

¹⁴Dan jgħid il-Mulej, il-feddej tiegħek, il-Qaddis ta’ Iżrael: “Minħabba fikom nibgħat f’Babilonja u nniżżel l-iżbarri kollha, u l-Kaldin jixhru fuq l-iġfien.

¹⁵Jiena, il-Mulej, il-Qaddis tagħkom, il-ħallieq ta’ Iżrael, is-sultan tagħkom.”

¹⁶Dan jgħid il-Mulej, li fetaħ triq fil-baħar, mogħdija fl-ilmijiet qawwija;

¹⁷dak li ħareġ karrijiet u żwiemel, eżerċti u rġiel qalbiena f’daqqa; inxteħtu fl-art, biex aktar ma qamux; inħlew bħal ftila, u ntfew:

¹⁸“La tiftakrux iżjed fi ġrajjiet l-imgħoddi; la taħsbux fuq dak li ġara qabel.

¹⁹Arawni, sejjer nagħmel ħaġa ġdida: feġġet issa; għadkom ma ttendejtux? Se niftaħ triq fix-xagħri, xmajjar fid-deżert.

²⁰Ifaħħruni l-bhejjem selvaġġi, ix-xakalli u wlied in-ngħam, għax noħroġ l-ilma fix-xagħri, xmajjar fid-deżert, biex nisqi l-poplu tiegħi, il-maħtur tiegħi,

²¹il-poplu li sawwart għalija, biex ixandar it-tifħir tiegħi.

²²B’danakollu, int, Ġakobb, ma sejjaħtlix, għax int xbajt minni, o Iżrael!

²³Ma ġibtlix in-nagħaġ tiegħek għas-sagrifiċċju tal-ħruq, u ma weġġaħtnix bis-sagrifiċċji tiegħek. Jien ma għabbejtekx bl-offerti, lanqas fnejtek bl-inċens.

²⁴Ma xtrajtlix bi flusek qasab bil-fwieħa, lanqas xebbajtni bix-xaħam tal-vittmi. Imma għabbejtni bi dnubietek, fnejtni bi ħżunitek.

²⁵Jien, jien hu, li nħassar dnubietek[131] minħabba fija, u li ħtijietek iżjed ma niftakarhomx.

²⁶Fakkarni, ħa nitħaddtuha; tkellem int u uri s-sewwa tiegħek.

²⁷L-ewwel ma dineb missierek[132]; u l-medjaturi tiegħek ixxewxu għalija.

²⁸Għalhekk jien kasbart il-prinċpijiet tas-santwarju, u rħejt għall-qerda lil Ġakobb, lil Iżrael għat-tagħjir.”