Read Maltese Bible with DC – IL-BIBBJA IL-KOTBA MQADDSA ISAIJA 44 Bible Online

ISAIJA 44 - Maltese Bible with DC – IL-BIBBJA IL-KOTBA MQADDSA bible

ISAIJA 44

¹U issa, isma’, Ġakobb il-qaddej tiegħi, Iżrael, il-maħtur tiegħi.

²Dan jgħid il-Mulej, li għamlek, dak li sawrek sa mill-ġuf, l-għajnuna tiegħek. La tibżax, Ġakobb, il-qaddej tiegħi; Ġesurun[133], li jien għażilt.

³Għax jiena nsawwab l-ilma fuq l-art għatxana, u xmajjar fuq in-niexef; hekk fuq nislek insawwab l-ispirtu tiegħi, u l-barka tiegħi fuq uliedek.

⁴Jinbtu bħal ħaxix f’nofs l-ilma, bħaż-żafżâf ħdejn l-ilma ġieri.

⁵Min jgħid: ‘jiena tal-Mulej,’ u l-ieħor jissejjaħ b’isem Ġakobb, u ieħor jikteb fuq idu: ‘Tal-Mulej[134],’ u jitlaqqam b’isem Iżrael.”

⁶Dan jgħid il-Mulej, is-Sultan ta’ Iżrael; u l-feddej tiegħek, il-Mulej tal-eżerċti: “Jien l-ewwel u Jiena l-aħħar, u ħliefi m’hemmx alla ieħor.

⁷Min hu bħali? Ħa jqum jitkellem, ħa jxandru u jippruvahuli! Min qatt mill-qedem ħabbar il-ġejjieni? Ħa jbassrilna kulma għad isir.

⁸La tibżgħux, la tinkwetawx: Ma ħabbartlekx u ma għarraftekx minn qabel? Intom ix-xhieda tiegħi! Hemm xi alla ieħor għajri, jew xi blata[135] oħra ħliefi? Jekk hemm, ma nafx.

⁹Dawk li jaħdmu l-idoli kollha bla moħħ, u x-xogħol għażiż għalihom ma jiswa xejn. Huma stess ix-xhieda: ma jarawx, ma jifhmux, imisshom jistħu.

¹⁰Min hu li jsawwar alla u jfassal xbieha tal-fondut li ma tiswa għal xejn?

¹¹Araw, sħabu kollha jkollhom jistħu, in-nies tas-sengħa huma bnedmin. Ħa jinġabru lkoll u jersqu ’l quddiem, jitriegħdu u jistħu lkoll flimkien.

¹²Il-ħaddied jixħet il-ħadid fil-forġa, jagħtih sura bil-martell, u jirfinah b’qawwiet driegħu. Jieħdu l-ġuħ, tonqsu s-saħħa; u jekk ma jixrobx ilma jħossu mifni.

¹³Il-mastrudaxxa jiġbed il-ħajt, u jħożżu bil-ġibs aħmar; jonqxu bl-iskalpell, u jkejlu bil-kumpass; jagħmel xbieha ta’ bniedem, bħal raġel sabiħ biex jgħammar f’dar.

¹⁴Imur jaqta’ l-injam taċ-ċedru, jieħu xi biċċa tal-ballut jew ruvlu, li jikber b’saħħtu fil-foresta, jew iħawwel l-arżnu li x-xita tkabbar.

¹⁵Dan kollu jservi l-bniedem għat-tkebbis tan-nar: biċċa minnu jieħdu għas-sħana, b’oħra jqabbad il-forn ħa jaħmi l-ħobż, u l-bqija biex jagħmel xi alla ħa jqimu; jagħmel xi xbieha u jmil quddiemha.

¹⁶Nofsu jaħarqu fin-nar, u fuq il-ġamar jixwi l-laħam, u jiekol ix-xiwi u jixba’, imbagħad jissaħħan u jgħid: “Issa sħant, qiegħed inħoss in-nar!”

¹⁷Mill-fdal imbagħad jagħmel xi alla, ix-xbieha mnaqqxa tiegħu. Imil quddiemu u jadurah, jitolbu u jgħidlu: “Eħlisni, int alla tiegħi.”

¹⁸Dawn in-nies ma jafux u ma jifhmux, għajnejhom għammdilhom li ma jarawx; qalbhom għalqilhom li ma tifhimx.

¹⁹Ħadd ma jdaħħal f’qalbu; u la jagħraf u lanqas jifhem, u jgħid: “B’nofs il-ħatab kebbist in-nar, fuq il-ġamar ħmejt il-ħobż; xwejt il-laħam u kilt minnu. Se nagħmel issa minn fdalu ħaġa mistkerrha, u ninżel jien inqim iz-zokk ta’ siġra?”

²⁰Bl-irmied jitpaxxa, qalbu mogħwija tellfitu t-triq; ma jistax jeħles u jgħid: “Jaqaw mhix gidba li għandi f’leminti?”

²¹Ftakar f’dan Ġakobb, int Iżrael, għax int il-qaddej tiegħi! Jien sawwartek, int il-qaddej tiegħi. Iżrael, jien ma ninsiek qatt.

²²Bħal sħaba neħħejtlek dnubietek, u bħal ċpar ħtijietek. Erġa’ lura għal għandi, għax jien fdejtek.

²³Għannu, smewwiet, għax il-Mulej għamel dan; għajtu bil-ferħ, qigħan l-art. Infexxu għannu, muntanji, u l-foresta b’kull siġra fiha. Għax il-Mulej feda lil Ġakobb, u jitfaħħar b’Iżrael.

²⁴Dan jgħid il-Mulej, il-feddej tiegħek, li sawwartek sa mill-ġuf: “Jiena hu l-Mulej li għamilt kollox, waħdi frixt is-smewwiet u meddejt l-art. U min kien miegħi?

²⁵Jiena hu li nxejjen is-sinjali tas-saħħara; u noħroġ ta’ boloh il-ħabbarin, li rraġġa’ lura lill-għorrief, u għerfhom nagħmlu bluha.

²⁶Jiena hu li nwettaq kliem il-qaddej tiegħi, u ntemm il-ħsieb li jxandru l-messaġġiera tiegħi. Jiena hu li ngħid lil Ġerusalemm: ‘Għad jerġgħu jgħammru fik’. U lill-ibliet ta’ Ġuda: ‘Terġgħu tinbnew’, u ntella’ mill-ġdid il-ħerbiet tagħha.

²⁷Jiena hu li ngħid lil qiegħ il-baħar: ‘Inxef! U nnixxef ix-xmajjar tiegħek.’

²⁸Jiena hu li ngħid lil Ċiru[136]: ‘Int tkun ir-ragħaj tiegħi, li jtemm ix-xewqat tiegħi.’ U jgħid għal Ġerusalemm: ‘Ħa tinbena,’ u għat-tempju: ‘Ħa jqiegħdu l-pedament.’”