Read Maltese Bible with DC – IL-BIBBJA IL-KOTBA MQADDSA ISAIJA 45 Bible Online

ISAIJA 45 - Maltese Bible with DC – IL-BIBBJA IL-KOTBA MQADDSA bible

ISAIJA 45

¹Dan jgħid il-Mulej lill-midluk tiegħu[137], lil Ċiru li qbadt minn idu l-leminija biex irrażżan il-ġnus quddiemu u nħoll il-ħżiem ta’ ġenbejn is-slaten; niftaħ il-bibien quddiemu u ebda bieb ma jibqa’ magħluq:

²“Quddiemek nimxi jien, u l-mogħdijiet imħattba tiegħek inwittilek; inċarrat il-bibien tal-bronż, u l-istaneg tal-ħadid inqatta’.

³Nagħtik it-teżori fid-dlam moħbija, il-ħażniet fil-moħbiet mistura, biex tkun taf li jien il-Mulej, Alla ta’ Iżrael, li sejjaħtlek b’ismek.

⁴Minħabba Ġakobb, il-qaddej tiegħi, u Iżrael, il-maħtur tiegħi, jien sejjaħtlek b’ismek. Tajtek isem ta’ ġieħ għad li lanqas tafni.

⁵Jien il-Mulej, m’hemmx ieħor ħliefi, m’hemmx Alla ieħor għajri. Jien ħażżimtek għad li lanqas tafni,

⁶biex mnejn titla’ x-xemx safejn tinżel, il-bnedmin jagħrfu li m’hemm ħadd ħliefi. Jiena l-Mulej, m’hemmx ieħor ħliefi.

⁷Jien sawwart id-dawl u ħlaqt id-dlam; jien nagħmel ir-risq u noħloq id-deni[138]; jiena l-Mulej, li nagħmel dan kollu.”

⁸“Qattru, smewwiet, mill-għoli, u jraxxax is-sħab il-ġustizzja; tinfetaħ l-art u tinbet is-salvazzjoni, u tinbet magħha l-ġustizzja. Jiena l-Mulej, jien ħlaqtha.

⁹Ħażin għal min jitlewwem ma’ Min għamlu; bħal xaqqufa ma’ min jaħdem it-tajn! Jaqaw jgħid it-tafal lill-fuħħari: “X’inti tagħmel?” Jew inkella “xogħlok bla fejda?”

¹⁰Ħażin għalih min jgħid lill-missier: “X’inti tnissel?” jew lil xi mara: “X’inti tiled?”

¹¹Dan jgħid il-Mulej, il-Qaddis ta’ Iżrael u Dak li sawru: “Jaqaw tridu tistaqsuni x’ġej fuq uliedi; jew tordnawli fuq xogħol idejja?

¹²Jiena għamilt l-art, u ħlaqt il-bniedem fuqha. Jiena, idejja firxu s-smewwiet, u l-qtajja’ kollha tagħhom nikkmanda.

¹³Jiena qajjimt ’il Ċiru biex jagħmel il-ġustizzja, u wittejtlu triqatu kollha. Hu jibni belti, u jeħles lill-ilsiera tiegħi, bla ħlas u bla għotjiet,” jgħid il-Mulej tal-eżerċti.

¹⁴Dan jgħid il-Mulej: “Il-ġid tal-Eġittu u l-qligħ ta’ Kus[139], u tas-Sabajin, nies twal, jgħaddu għal għandek u jsiru tiegħek. Jimxu warajk u jgħaddu mxekkla, u quddiemek jinxteħtu fl-art, u jitolbuk u jgħidulek: ‘Għandek biss hemm Alla, u m’hemmx ieħor għajru, m’hemmx Alla ħliefu.’ ”

¹⁵Tassew int Alla moħbi, Alla ta’ Iżrael, salvatur.

¹⁶Ilkoll imtlew bil-mistħija u l-għajb, telqu lkoll flimkien imriegħxa dawk li jsawru l-idoli.

¹⁷Iżrael salva bis-saħħa tal-Mulej, b’salvazzjoni għal dejjem; qatt ma jkollkom imniex tistħu u tiregħxu, għal dejjem ta’ dejjem.

¹⁸Għax dan jgħid il-Mulej li ħalaq is-smewwiet; Hu li hu tassew Alla, li sawwar l-art, għamilha u wettaqha, ma ħalaqhiex għall-baħħ, sawwarha biex jgħammru fiha: “Jien hu l-Mulej, u m’hemm ħadd ħliefi!

¹⁹Ma tkellimtx bil-moħbi f’xi mkien mudlam tal-art. Ma għedtx lil nisel Ġakobb: ‘Fittixni fil-baħħ.’ Jiena hu l-Mulej li ngħid is-sewwa, u d-dritt inxandar.”

²⁰“Inġemgħu, ejjew, ersqu flimkien, intom il-maħrubin mill-ġnus! M’għandhomx għaqal dawk li jġorru l-idoli tagħhom tal-għuda, dawk li jitolbu lil Alla li ma jsalvax.

²¹Xandru u ressqu l-kawża tagħkom; ħa jieħdu l-parir ta’ xulxin. Min qalu dan żmien ilu? Min xandru fi żmien il-qedem? Mhux jien il-Mulej? U ma hemm ebda Alla ħliefi; Alla ġust u salvatur, ma hemm ħadd għajri.

²²Duru lejja mill-ġdid, truf kollha tal-art, u intom tkunu salvi! għax jien hu Alla, u ma hemm ħadd ħliefi!

²³Bija nnifsi ħlift, minn fommi ħarġet il-ġustizzja, u l-kelma ma terġax lura: għax quddiemi tiltewa kull irkoppa, bija jaħlef kull ilsien;

²⁴għalija għad jgħidu; ‘Fil-Mulej waħdu hemm il-ħaqq u l-qawwa; għandu għad jiġu, kollhom mistħija, dawk kollha li inkurlaw għalih.

²⁵Fil-Mulej isib il-ġustizzja u jitfaħħar in-nisel kollu ta’ Iżrael.’