Read Maltese Bible with DC – IL-BIBBJA IL-KOTBA MQADDSA ISAIJA 47 Bible Online

ISAIJA 47 - Maltese Bible with DC – IL-BIBBJA IL-KOTBA MQADDSA bible

ISAIJA 47

¹Inżel minn hemm, oqgħod fit-trab, xbejba, bint Babilonja[142]. Oqgħod bilqiegħda fl-art, bla tron! Bint il-Kaldin! Ħadd ma jsejjaħlek iżjed ‘Il-Ħelwa’ u ‘l-Għaxqana’,

²Aqbad il-mitħna u itħan id-dqiq; neħħi l-istar minn fuqek; erfa’ l-kurkar; ikxef riġlejk, aqsam ix-xmajjar.

³Jikxfulek għertek u jarawlek għajbek! “Jien għad nitħallas u ma neħlisha lil ħadd.”

⁴Jgħid il-feddej tagħna, Jaħweh tal-eżerċti ismu, il-Qaddis ta’ Iżrael.

⁵Oqgħod fi kwietek u idħol fid-dlam, bint il-Kaldin. Ma jsejħulekx aktar: “Sidt is-saltniet.”

⁶Kont mgħaddab għall-poplu tiegħi; niġġist ’il wirti u rħejthom f’idejk, imma int ma wrejthomx ħniena; taqqalt il-madmad fuq ix-xjuħ kemm flaħt.

⁷U int għedt: “Jien inkun sultan għal dejjem.” Ma daħħaltx f’rasek dawn il-ħwejjeġ; ma ftakartx fit-tmiem.

⁸U issa isma’ dan, ja mxaħxħa fil-pjaċir, int li tgħix b’moħħok mistrieħ; int li tgħid f’qalbek: “Jiena, u ħadd ħliefi, ma normol qatt; ma nkunx bla wlied.”

⁹Imma dawn it-tnejn f’jum wieħed f’daqqa għad jilħquk: telfa ta’ wlied u rmulija. Għad jilħquk fil-milja tagħhom, minkejja l-kotra ta’ sħarijietek[143], minkejja s-saħħa ta’ magħmulek.

¹⁰Int ittamajt fi ħżunijietek; int għedt: “Ħadd ma jarani!” Qarrquk għerfek u għaqlek, u int għedt f’qalbek: “Jiena, u ħadd ħliefi.”

¹¹Imma għad tilħqek ħsara kbira, li ma tagħrafx tegħlibha bi sħarijietek, taqa’ fuqek qerda li ma jkollokx ħila tbiegħed, tilħqek ħesrem ħerba li qatt ma tkun bsart.

¹²Żomm sħiħ, mela, fil-magħmul tiegħek, fil-kotra ta’ sħarijietek, li fihom stinkajt sa minn żgħożitek. Għandhom mnejn jiswewlek; għandek mnejn tbażża’ n-nies bihom.

¹³Fnietek il-kotra tal-kunsillieri tiegħek! Ħa jqumu issa u jgħinuk, l-għarriexa tas-smewwiet, li jħarsu lejn il-kwiekeb, u ta’ kull xahar jgħidulek x’se jkun li ġej għalik.

¹⁴Ara, bħat-tiben jaħraqhom in-nar; ma jeħilsuhiex mis-setgħa tan-nirien. Ma jkunx ġamar għas-sħana, ma jkunx nar li toqgħod ħdejh.

¹⁵Hekk ikunu għalik dawk li fnewk, is-saħħara li kellek sa minn żgħożitek; kulħadd jitlaq għal rasu, ħadd ma jibqa’ hemm biex jgħinek.