Read Maltese Bible with DC – IL-BIBBJA IL-KOTBA MQADDSA ISAIJA 48 Bible Online

ISAIJA 48 - Maltese Bible with DC – IL-BIBBJA IL-KOTBA MQADDSA bible

ISAIJA 48

¹Isimgħu dan, dar Ġakobb, intom li ġġibu isem Iżrael, intom li ħriġtu mill-ġewwieni ta’ Ġuda, intom li taħilfu b’isem il-Mulej, u tfaħħru l-isem ta’ Alla ta’ Iżrael, imma mhux bis-sinċerità u lanqas bis-sewwa.

²Mill-belt qaddisa jissemmew, u fuq Alla ta’ Iżrael iserrħu, Jaħweh tal-eżerċti jismu.

³“Minn żmien il-qedem ħabbart il-ġrajjiet, ħarġu minn fommi, u jien semmajthom, u jien għamilthom minnufih, u seħħew ilkoll.

⁴Għax kont naf li int rasek iebsa, għonqok għerq tal-ħadid, u ġbinek bronż.

⁵Sa mill-qedem ħabbarthomlok, qabel ma seħħew semmajthomlok li ma tmurx tgħid: ‘L-idolu tiegħi għamilhom, ix-xbieha minquxa u mdewba ordnathom.’

⁶Int smajt u rajt dan kollu, u issa ma tridx ixxandru? Minn issa ’l quddiem insemmgħek ħwejjeġ ġodda, ħwejjeġ mistura li int ma tafhomx.

⁷Inħolqu issa, u mhux żmien ilu; u qabel żmienhom int ma smajtx bihom, li ma tmurx tgħid: ‘Arani, jien kont naf bihom.’

⁸Int qatt ma smajt, int qatt m’għaraft; lanqas qatt ma ftaħt widnejk. Kont naf li int qarrieq, u sa mill-ġuf sejħulek: ‘Xewwiex.’

⁹Minħabba f’ismi ma nżommx għadbi, u minħabba ġieħi nitrażżan għalik, biex ma neqirdekx.

¹⁰Arani, jien saffejtek mhux bħall-fidda; ippruvajtek fil-forn tan-niket.

¹¹Minħabba fija, minħabba fija nagħmel dan. Għax għandu jitkasbar ismi? Is-sebħ tiegħi lil ħaddieħor ma nagħtihx.”

¹²“Ġakobb, ismagħni, u int Iżrael, li jien sejjaħt. Jiena hu, Jiena l-ewwel, u Jiena l-aħħar.

¹³Idejja sejsu l-art, u leminti firxet is-smewwiet. Jiena nsejħilhom, u huma jfeġġu lkoll flimkien.

¹⁴Inġabru lkoll u isimgħu! Min minnhom ħabbar dan? Il-Mulej iħobbu u hu[144] jagħmel ir-rieda tiegħu fuq Babilonja u nisel il-Kaldin.

¹⁵Jiena, jiena tkellimt u sejjaħtlu wkoll, jiena ġibtu u nġiblu r-riżq fi triqtu.

¹⁶Ersqu lejja u isimgħu dan: Sa mill-bidu ma tkellimtx bil-moħbi, u meta seħħew il-ġrajja jien kont hemm.” U issa Sidi l-Mulej bagħat lili u l-ispirtu tiegħu.

¹⁷Dan jgħid il-Mulej, il-feddej tiegħek, il-Qaddis ta’ Iżrael; “Jien hu l-Mulej, Alla tiegħek; jien ngħallmek għall-ġid tiegħek, u nqabbdek it-triq fejn għandek timxi.

¹⁸Li kieku tajt widen għall-kmandamenti tiegħi, kien ikun bħal xmara sliemek, u sedqek bħal mewġ tal-baħar;

¹⁹In-nisel tiegħek bħar-ramel, l-għelejjel ta’ ġewwenik bħat-trab, u ismek la jitħassar u la jinqered minn quddiemi.”

²⁰Oħorġu minn Babilonja, aħarbu mill-Kaldin. B’leħen l-għana ħabbruha, u xandruha; xandruha sa truf l-art u għidu: “Feda l-Mulej lil Ġakobb, il-qaddej tiegħu.”

²¹Għaddiehom mid-deżert u ma ħadhomx l-għatx; ilma mill-blat nixxielhom, xaqqilhom il-blat u gelglilhom l-ilma.

²²Għall-ħżiena, m’hemmx sliem, jgħid il-Mulej.