Read Maltese Bible with DC – IL-BIBBJA IL-KOTBA MQADDSA ISAIJA 49 Bible Online

ISAIJA 49 - Maltese Bible with DC – IL-BIBBJA IL-KOTBA MQADDSA bible

ISAIJA 49

¹Isimgħuni, gżejjer[145], agħtuni widen, popli mbiegħda! Il-Mulej mill-ġuf sejjaħli, mill-ġewwieni ta’ ommi ftakar f’ismi.

²Għamilli fommi xabla misnuna, taħt id-dell ta’ idu ħbieni. Għamel minni vleġġa maħtura, fil-barżakka tiegħu ħbieni.

³U qalli: “Iżrael[146], inti l-qaddej tiegħi, bik jiena nkun imfaħħar.”

⁴U jien għedt: “Għalxejn inkeddejt, u fix-xejn ħlejt saħħti.” Imma f’idejn il-Mulej il-kawża tiegħi, u l-ħlas tiegħi għand Alla tiegħi.

⁵Issa tkellem il-Mulej, li minn ġuf ommi għamilni qaddej tiegħu, biex għandu rraġġa’ lura ’l Ġakobb, u biex Iżrael jinġabar miegħu mill-ġdid, għax jien kont imfaħħar f’għajnejn il-Mulej, u Alla tiegħi kien il-qawwa tiegħi.

⁶Hu qalli: “Tkun ħaġa żgħira wisq għalik, li inti tkun il-qaddej tiegħi, biex tqajjem it-tribù ta’ Ġakobb, u traġġa’ lura l-fdal ta’ Iżrael. Jien nagħmel minnek dawl għall-ġnus[147], biex is-salvazzjoni tiegħi sa truf l-art tinfirex.”

⁷Dan jgħid il-Mulej, il-feddej ta’ Iżrael, il-Qaddis tiegħu, lil wieħed imkasbar min-nies, mistmerr mill-poplu, lill-qaddej tal-ħakkiema: “Is-slaten għad jaraw u jqimu, u l-prinċpijiet iqimu wiċċhom fl-art, minħabba l-Mulej li hu fidil, il-Qaddis ta’ Iżrael, Dak li ħatrek.”

⁸Dan jgħid il-Mulej: “Fiż-żmien it-tajjeb smajtek, u f’jum is-salvazzjoni għentek. Ħaristek u għamilt minnek patt mal-poplu, biex nerġa’ nqajjem l-art, u nqassam il-wirt imħarbat;

⁹biex ngħid lill-imjassrin: ‘Oħorġu!’ u lil dawk li huma fid-dlam: ‘Ejjew għad-dawl!” Huma jirgħu matul it-triq, u fuq kull għolja għerja jsibu l-mergħa tagħhom.

¹⁰Ma jeħodhomx il-ġuħ u anqas l-għatx, u ma tolqothomx is-sħana u lanqas ix-xemx. Għax min ħenn għalihom imexxihom, u jgħaddihom minn ħdejn għejun ta’ ilma.

¹¹Minn kull muntanja nagħmel triq, u ngħolli l-mogħdijiet tiegħi.

¹²Ara, dawn jiġu mill-bogħod; ara, dawn mit-Tramuntana u l-Punent, u dawn mill-art ta’ Sinim[148].

¹³Għannu, o smewwiet, aqbeż bil-ferħ, o art, infexxu fl-għana, o muntanji! Għax farraġ il-Mulej lill-poplu tiegħu; u ħenn għall-imsejknin tiegħu!

¹⁴U Sijon kienet tgħid: ‘Ħallieni l-Mulej,’ u: ‘Sidi nsieni.’

¹⁵Tista’ mara tinsa t-tarbija tagħha, u ma tħennx għal bin ġufha? Imqar jekk din tinsa, jien ma ninsiek qatt!

¹⁶Ara! Naqqaxtek fuq kefef idejja[149]; ħitanek dejjem quddiemi.

¹⁷Il-bennejja tiegħek ġejjin imgħaġġla; jitbiegħed minnek min ġarrfek u ħarbtek.

¹⁸Erfa’ għajnejk u ħares madwarek. Ilkoll inġabru, ġejjin lejk. Daqs kemm jien ħaj, jgħid il-Mulej, tilbishom kollha biex tiżżejjen, titħażżem bihom bħal għarusa.

¹⁹Għax il-ħrieb tiegħek, it-tħarbit tiegħek, u l-art imħarbta tiegħek, nerġa’ ntellagħhom. Issa int djieqt għal niesek, u tbiegħdu dawk li ħarbtuk.

²⁰L-ulied li inti wlidt fl-hemm għad jgħidulek f’widnejk: ‘Żgħir il-post għalija; agħmilli l-wisa’ fejn ngħammar.’

²¹Imbagħad int tgħid f’qalbek ‘Min welidli ’l dawn, meta jien bla tfal, ħawlija, kont ilsira u mitluqa? Min rabbihomli? Ara! Jien kont bqajt waħdi minn fejn ġew dawn?’

²²Dan jgħid Sidi l-Mulej: Arawni! Se nagħti sinjal lill-ġnus, u ngħolli l-istendard tiegħi għall-popli, u jġibu s-subien tiegħek fuq dirgħajhom, u l-bniet tiegħek iġorruhom fuq spallejhom.

²³U jkunu s-slaten li jrabbuk, u l-irġejjen tagħhom li jreddgħuk. Imilu b’wiċċhom fl-art quddiemek, u t-trab ta’ riġlejk jilagħqu. U int tkun taf li jien il-Mulej, li min jittama fija, ma jitħawwadx.

²⁴Tista’ tittieħed il-priża minn id il-qawwi? jew jinħelsu l-ilsiera minn id it-tirann?

²⁵Għax dan jgħid il-Mulej: “Iva! Jittieħdu l-ilsiera minn id il-qawwi; il-priża tat-tirann tinħeles. U jiena stess neħodha ma’ dawk li ħaduha miegħek, u jiena stess insalva lil uliedek.

²⁶U ’l dawk li ħaqruk inġagħalhom jieklu laħamhom stess, u jiskru b’demmhom bħal bl-inbid ġdid. U kull bniedem ikun jaf li jien il-Mulej, il-Ħellies tiegħek, il-Feddej tiegħek, il-Qawwi ta’ Ġakobb.”