Read Maltese Bible with DC – IL-BIBBJA IL-KOTBA MQADDSA ISAIJA 54 Bible Online

ISAIJA 54 - Maltese Bible with DC – IL-BIBBJA IL-KOTBA MQADDSA bible

ISAIJA 54

¹Ifraħ int, mara bla tfal[164] li ma wlidtx; infexx għanni u għajjat bil-ferħ, int li qatt ma ħassejt uġigħ il-ħlas! Għax ħafna aktar huma wlied il-mitluqa minn ulied il-miżzewġa, jgħid il-Mulej.

²Kabbar il-post tal-għarix tiegħek, wessa’ t-tined tal-għamajjar tiegħek, tibżax għalihom; tawwal il-ħbula tiegħek, waħħal tajjeb il-kunjardi.

³Għax lejn il-lemin għad tinfirex u lejn ix-xellug, u nislek jiret il-ġnus, u fl-ibliet mitluqa jgħammar.

⁴Tibżax, int ma jkollokx mniex tistħi! Tħammarx aktar wiċċek, għax għajb ma jkollokx aktar. Int għad tinsa l-għajb ta’ rmulitek, ma tiftakarx iżjed fil-mistħija tar-romol tiegħek.

⁵L-għarus tiegħek il-Ħallieq tiegħek, Jaħweh tal-eżerċti jismu; il-feddej tiegħek, il-Qaddis ta’ Iżrael, ‘Alla tal-art kollha’ jissejjaħ.

⁶Iva, bħal mara mitluqa u mdejqa f’qalbha sejjaħlek il-Mulej, ‘bħal mara mitluqa f’żgħożitha,’ jgħid il-Mulej Alla tiegħek.

⁷Għal ftit jien tlaqtek; imma bi mħabba bla qjies jien nerġa’ niġbrok.

⁸Fis-saħna tal-korla ħbejt wiċċi għal ftit minnek; bi mħabba ta’ dejjem inħenn għalik, jgħid il-Mulej, il-Feddej tiegħek.

⁹Dan għalija bħal fi żmien Noè, meta ħlift li l-ilma ma jerġax jgħarraq l-art. Hekk naħlef issa li ma nisħonx aktar għalik, u lanqas ma nċanfrek.

¹⁰Jistgħu jitħarrku l-muntanji, jitheżżu l-għoljiet, imma mħabbti minn miegħek ma titħarrikx, u s-sliem tal-patt tiegħi ma jitheżżiżx, jgħid il-Mulej li jħenn għalik.

¹¹“Magħkusa, imħabbta mill-irwiefen, mara bla faraġ! Jien inqiegħed il-ġebel tiegħek bl-ifjen tajn; u l-pedamenti tiegħek biż-żaffir.

¹²Nagħmel l-amberżuni ta’ swarek tar-rubini, u bwiebek tal-karbunkli, u d-dawra tas-swar tal-ħaġar prezzjuż.

¹³Uliedek ilkoll ikunu mgħallma mill-Mulej, kbir għad ikun ġid uliedek.

¹⁴Fuq sies il-ġustizzja titwaqqaf, ’il bogħod mit-tagħkis, għax ma għandekx imniex tibża’; u ’l bogħod mit-twerwir, għax ma jersaqx lejk.

¹⁵Jekk jaħbtu għalik, ma jkunx minni; min jaħbat għalik, jaqa’ quddiemek.

¹⁶Ara, jiena ħlaqt il-ħaddied li jonfoħ fuq in-nar tal-ġamar, u joħroġ l-għodda skont l-għan tagħha, u jiena ħlaqt il-qerried biex iħarbat.

¹⁷Ebda arma magħmula kontrik ma tiswa, u kull ilsien li jħaqqaq kontrik toħorġu b’ħati. Din hi x-xorti tal-qaddejja tal-Mulej; mingħandi jieħdu r-raġun,” oraklu tal-Mulej.