Read Maltese Bible with DC – IL-BIBBJA IL-KOTBA MQADDSA ISAIJA 55 Bible Online

ISAIJA 55 - Maltese Bible with DC – IL-BIBBJA IL-KOTBA MQADDSA bible

ISAIJA 55

¹“Intom li bikom l-għatx, ejjew għall-ilma; intom ukoll li m’għandkomx flus. Ejjew, ixtru u kulu b’xejn, inbid u ħalib bla ħlas.

²Għaliex taħlu fluskom f’dak li mhuwiex ħobż, u ġidkom f’dak li ma jxebbax? Isimgħu minni, u tieklu tajjeb, u ruħkom titpaxxa b’ikel bnin.

³Agħtuni widen u ersqu lejja, isimgħu u tieħdu r-ruħ. Nagħmel patt magħkom għal dejjem, biex iseħħu l-favuri mwiegħda lil David[165].

⁴Ara, jien qegħedtu xhud fost il-ġnus, prinċep u leġiżlatur fuq il-popli.

⁵Int ġens li ma tafx bih issejjaħ; ġnus li ma jafukx jiġru lejk, minħabba fil-Mulej, Alla tiegħek, il-Qaddis ta’ Iżrael, għax lilek żejjen bil-ġieħ.

⁶Fittxu l-Mulej sakemm tistgħu ssibuh, sejħulu sakemm hu fil-qrib!

⁷Ħa jħalli triqtu l-midneb, u l-bniedem il-ħażin fehmietu; ħa jerġa’ lura għand il-Mulej u jħenn għalih, għand Alla tagħna għax hu jaħfer ħafna.

⁸“Il-fehmiet tiegħi mhumiex fehmietkom, u t-triqat tiegħi mhumiex triqatkom, oraklu tal-Mulej.

⁹Għax daqs kemm huma ogħla s-smewwiet mill-art, daqshekk ieħor huma triqati ’l fuq minn triqatkom, u l-fehmiet tiegħi mill-fehmiet tagħkom.

¹⁰Bħalma x-xita u s-silġ jinżlu mis-smewwiet, u ma jerġgħux lura mnejn ġew bla ma jsaqqu l-art, imma jġegħluha tnissel u tnibbet, u tagħti ż-żerriegħa ’l min jiżra’ u l-ħobż ’il min jiekol,

¹¹hekk jiġri minn kelmti: hija toħroġ minn fommi, u ma terġax lura vojta, imma tagħmel dak li jogħġob lili, u ttemm dak li nkun bgħattha tagħmel.

¹²Iva, bil-ferħ għad toħorġu, u bis-sliem titwasslu. Quddiemkom f’għajjat ta’ ferħ jinfexxu l-muntanji u l-għoljiet, u ċċapċap idejha kull siġra tar-raba’.

¹³Minflok ix-xewk jitla’ ċ-ċipress, minflok l-għollieq ir-riħan. Dan ikun għall-glorja tal-Mulej, sinjal għal dejjem li ma jitħassar qatt.”