Read Maltese Bible with DC – IL-BIBBJA IL-KOTBA MQADDSA ISAIJA 56 Bible Online

ISAIJA 56 - Maltese Bible with DC – IL-BIBBJA IL-KOTBA MQADDSA bible

ISAIJA 56

¹Dan jgħid il-Mulej: “Żommu s-sewwa u agħmlu l-ġustizzja, għax is-salvazzjoni tiegħi għoddha waslet, u l-ġustizzja tiegħi dalwaqt tfeġġ.”

²Hieni r-raġel li jagħmel dan, u l-bniedem li jżomm sħiħ fih, iħares is-Sibt u ma jiksrux, u jżomm idu ’l bogħod mill-għemil ħażin.”

³U ma jgħidx il-frustier li jintrabat mal-Mulej: “Se jifridni l-Mulej mill-poplu tiegħu.” Ma jgħidx l-ewnuku[166]: “Arawni, jiena siġra niexfa!”

⁴Għax dan jgħid il-Mulej: “Għall-ewnuki li jħarsu Sibtijieti, u jagħżlu dak li jogħġob lili, u jżomm sħiħ fil-patt tiegħi,

⁵jiena nagħtihom f’dari u swari, nagħtihom monument u isem[167], xi ħaġa aħjar minn subien u bniet; nagħtihom isem għal dejjem, li ma jitħassar qatt.

⁶Ulied il-frustier li ntrabtu mal-Mulej biex jaqduh, u biex iħobbu isem il-Mulej, u jkunu qaddejja tiegħu, kull min iħares is-Sibt u ma jiksrux u jżomm sħiħ fil-patt tiegħi,

⁷lil dawn inwassalhom sal-muntanja mqaddsa tiegħi, u nferraħhom f’dar it-talb tiegħi; il-vittmi maħruqa u s-sagrifiċċji tagħhom ikunu jogħġbuni telgħin minn fuq l-artal tiegħi, għax dari ‘dar it-talb’ tissejjaħ għall-popli kollha.

⁸Oraklu ta’ Sidi l-Mulej, li jiġbor l-imxerrdin ta’ Iżrael; “Nissokta niġbor l-itturufnati tiegħu flimkien ma’ dawk li diġà ġbart.”

⁹Intom bhejjem tar-raba’[168], ejjew kulu, intom bhejjem tal-foresta.

¹⁰L-għassiesa tal-poplu tiegħi, ilkoll għomja, ma jintebħu b’xejn; ilkoll klieb muti, ma jistgħux jinbħu. Jimteddu u joħolmu, ħsiebhom biex jorqdu.

¹¹Huma klieb rgħiba, ma jixbgħu qatt. Dawn huma r-rgħajja, li ma jafux jaħsbu. Qabdu triqthom ilkoll, kulħadd jaħseb għal rasu.

¹²Ejjew ħa nġibu l-inbid, u niskru bix-xorb qawwi. Għada jkun bħal-lum, anzi aħjar, u ħafna aħjar.”