Read Maltese Bible with DC – IL-BIBBJA IL-KOTBA MQADDSA ISAIJA 57 Bible Online

ISAIJA 57 - Maltese Bible with DC – IL-BIBBJA IL-KOTBA MQADDSA bible

ISAIJA 57

¹Il-ġust jinqered, imma ħadd ma jħoss għalih. In-nies twajba jinġabru, iżda ħadd ma jagħti kas. Iva, il-ġust jinġabar minħabba l-ħażen;

²jidħol fis-sliem, jistrieħu fuq friexu kull min jimxi dritt.

³“Imma intom, ulied is-saħħara, ersqu ’l hawn, nisel l-adultera u l-prostituta.

⁴B’min qegħdin tiddieħku? Kontra min qegħdin tfettħu ħalqkom, u toħorġu lsienkom? Jaqaw m’intomx ulied id-dnub, ulied il-qerq?

⁵Intom tmorru b’demmkom ibaqbaq[169] taħt il-ballut; taħt kull siġra tħaddar; toqtlu t-trabi fil-widien, fi xquq l-irdumijiet.

⁶Fil-ġebel lixx tal-wied sehmek; dan, dan xortik. Lilhom sawwabt il-libazzjonijiet, ġibt l-offerta tas-sagrifiċċju. Nista’ jien noqgħod bi kwieti b’dan?

⁷Fuq muntanja għolja u wieqfa, int poġġejt friexek, u hemm fuq tlajt toffri s-sagrifiċċju.

⁸U wara l-bieb u l-koxox tiegħu, l-arma tiegħek dendilt. U mbiegħda minni xaqlibt il-friex u tlajt; wassajt soddtok u ftehemt magħhom, ma’ dawk li ħabbejt friexhom, u lejn għerithom ħarist ċassa.

⁹Ersaqt lejn alla Molek[170] biż-żejt midluka, u żidt il-fwejjaħ tiegħek. Bgħatt ’il bogħod il-messaġġiera tiegħek, sa tbaxxejt sal-Art l-Imwiet.

¹⁰Minkejja li nkeddejt bl-imġiba tiegħek, qatt ma għedt: “Qtajt qalbi!” Sibt il-qawwa għal ħajtek, għalhekk qatt ma nfnejt.

¹¹Minn min twerwirt u bżajt, biex tħassart daqshekk, biex anqas fija biss ma ftakart, u anqas biss ma ħsibt? Mhux għax jiena bqajt sieket u għalaqt għajnejja li inti bżajt minni?”

¹²Jien għad inxandar is-sewwa tiegħek u għemilek, imma dawn xejn ma jiswewlek.

¹³Ħa jsalvawk l-idoli miġmugħa tiegħek, meta ssejħilhom. Ir-riħ għad itajjarhom u ż-żiffa ġġorrhom. Imma min jitma fija jiret l-art, u jiret il-muntanja mqaddsa tiegħi.

¹⁴U għad jgħid: “Iftħu, iftħu t-triq, wittuha! Neħħu t-tfixkil minn triq il-poplu tiegħi!”

¹⁵Għax dan jgħid min qiegħed merfugħ fl-għoli, li jgħix għal dejjem u qaddis ismu: “Jien ngħammar fl-għoli u f’post qaddis, imma l-istess jien qiegħed mal-bniedem b’qalb maqsuma u umiljat f’ruħu; biex naħji r-ruħ umiljata, inqawwi l-qalb miksura.

¹⁶Għax ma nitlewwimx għal dejjem, u lanqas ma ninkorla għalkollox; għax kieku tinfena r-ruħ quddiemi, u nifs il-ħajja li jiena ħlaqt.

¹⁷Minħabba ħżunitu għal ftit[171] għadabt, u sawwattu u nħbejt inkurlat, imma xorta waħda baqa’ miexi għal rajh fit-triq ta’ qalbu.

¹⁸Jiena rajt triqatu, u rrid infejqu, immexxih u nroddlu l-faraġ, u lil dawk li jibkuh, noħolqilhom kelma frott ix-xufftejn:

¹⁹Sliem, sliem, lil kulħadd, fil-bogħod u fil-qrib, jgħid il-Mulej, infejjaqhom ilkoll.

²⁰Imma l-ħżiena bħal baħar imqanqal, li ma jista’ jsib kwiet b’xejn, u ilmijietu jqanqlu ħama u tajn.

²¹M’hemmx sliem għall-ħżiena,” jgħid Alla tiegħi.