Read Maltese Bible with DC – IL-BIBBJA IL-KOTBA MQADDSA ISAIJA 6 Bible Online

ISAIJA 6 - Maltese Bible with DC – IL-BIBBJA IL-KOTBA MQADDSA bible

ISAIJA 6

¹Fis-sena li fiha miet is-sultan Għużżija[18], jien rajt lil Sidi bilqiegħda fuq tron għoli merfugħ ’il fuq; djul il-libsa tiegħu kienu jimlew it-tempju.

²’Il fuq minnu kien hemm serafini, kull wieħed b’sitt ġwienaħ: bi tnejn kienu jgħattu wiċċhom, bi tnejn kienu jgħattu riġlejhom, u bi tnejn jittajru.

³U kienu jgħajtu u jwieġbu lil xulxin: “Qaddis, qaddis, qaddis hu l-Mulej tal-eżerċti. L-art kollha mimlija bil-glorja tiegħu.”

⁴Bl-għajjat tagħhom is-sisien tal-għetiebi theżżu, u t-tempju mtela bid-duħħan[19].

⁵Imbagħad jiena għedt: “Jaħasra għalija! Mitluf jien[20]! Bniedem b’xufftejh imniġġsa jien! U f’nofs poplu b’xufftejh imniġġsa ngħammar; madankollu rajt b’għajnejja lis-Sultan, Il-Mulej tal-eżerċti.”

⁶Wieħed mis-serafini ttajjar lejja, b’ġamra nar f’idu, li hu kien qabad bi mqass minn fuq l-artal,

⁷u messli fommi[21] biha u qalli: “Ara, din messitlek xufftejk: ħżunitek għebet, u dnubek inħafer.”

⁸Imbagħad smajt leħen Sidi jgħid: “Lil min se nibgħat? Min se jmurilna?” U jien weġibt: “Hawn jien: ibgħat lili!”

⁹U hu wieġeb: “Mur u għid lil dan il-poplu: Tisimgħu[22], iva, imma ma tifhmux, taraw, iva, imma la tagħrfux.

¹⁰Semmen qalb dan il-poplu, soddlu widnejh, agħmilu għajnejh, li ma jmurx jara b’għajnejh, u jisma’ b’widnejh, u f’qalbu jifhem, u jdur u jfiq.”

¹¹U jien għedt: “Sakemm Sidi?” U hu wieġeb: “Sakemm jitħarbtu l-bliet, u ħadd ma jgħammar fihom, u d-djar jibqgħu bla nies, u r-raba’ jinbidel f’xagħri.

¹²U l-Mulej ibiegħed lin-nies u bosta jkunu l-imkejjen fil-pajjiż mitluqa.

¹³U tibqa’ l-waħda fl-għaxra, imma wkoll din terġa’ tilħaq il-ħerba. Bħalma l-balluta u t-terebint meta jqaċċtuhom, minnhom jibqa’ biss iz-zokk.” Żerriegħa qaddisa jkun iz-zokk tagħha.