Read Maltese Bible with DC – IL-BIBBJA IL-KOTBA MQADDSA ISAIJA 61 Bible Online

ISAIJA 61 - Maltese Bible with DC – IL-BIBBJA IL-KOTBA MQADDSA bible

ISAIJA 61

¹L-ispirtu ta’ Sidi l-Mulej fuqi, għax il-Mulej ikkonsagrani, biex inwassal il-bxara t-tajba lill-fqajrin, bagħatni ndewwi l-qalb miksura; biex inħabbar il-ħelsien lill-imjassrin, u lill-ħabsin il-ftuħ tal-ħabs;

²biex inniedi s-sena tal-grazzja tal-Mulej, u jum il-vendetta ta’ Alla tagħna; biex infarraġ lill-imnikktin;

³biex inferraħ lil dawk li jibku f’Sijon, nagħtihom kuruna flok irmied, żejt tal-ferħ flok l-ilbies tal-vistu, l-għana tal-foħrija flok ruħ mitluqa. Isejħulhom ballut tas-sewwa, imħawla mill-Mulej għal foħritu.”

⁴Mill-ġdid għad jibnu l-ħerbiet tal-qedem, itellgħu t-tiġrif tal-imgħoddi, iġeddu l-bliet imġarrfa, meqruda minn żmien twil.

⁵Ikun hemm il-barranin li jirgħu l-imrieħel tagħkom, ulied il-frustiera jaħdmulkom ir-raba’, u jeħdulkom ħsieb id-dwieli.

⁶Lilkom isejħulkom: ‘Il-Qassisin tal-Mulej’, ‘Qaddejja ta’ Alla tagħna’ isemmukom. Tieklu l-ġid tal-ġnus, tissebbħu bil-glorja tagħhom.

⁷Għaliex id-doppju kien l-għajb tagħhom; mistħija u żebliħ kien sehemhom. Għalhekk id-doppju jirtu f’arthom, u jkollhom hena bla tmiem.

⁸Jien hu l-Mulej, li nħobb id-dritt, u nobgħod il-ħell u l-qerq. U jien bis-sewwa nħallashom, u nagħmel magħhom patt għal dejjem.

⁹Nisilhom ikun magħruf fost il-ġnus, u wliedhom qalb il-popli. Kull min jarahom jagħrafhom li huma nisel imbierek mill-Mulej.

¹⁰Nifraħ fuq li nifraħ bil-Mulej, taqbeż bil-ferħ ruħi b’Alla tiegħi. Għax hu libbisni bi lbies is-salvazzjoni, bil-mantar tal-ġustizzja għattieni, bħal għarus imżejjen b’kuruna, bħal għarusa tlellex bil-ġawhar tagħha.

¹¹Bħalma l-art tnibbet, bħalma l-ġnien inibbet il-miżrugħ fih, hekk il-Mulej inibbet il-ġustizzja u l-foħrija, quddiem kollha kemm huma l-ġnus.