Read Maltese Bible with DC – IL-BIBBJA IL-KOTBA MQADDSA ISAIJA 62 Bible Online

ISAIJA 62 - Maltese Bible with DC – IL-BIBBJA IL-KOTBA MQADDSA bible

ISAIJA 62

¹Minħabba f’Sijon ma nehdiex, minħabba f’Ġerusalemm ma niskotx, sa ma tfeġġ bħal dija l-ġustizzja tagħha, tħeġġeġ bħal torċa s-salvazzjoni tagħha.

²Il-ġustizzja tiegħek għad jarawha l-ġnus, u s-sebħ tiegħek jarawh is-slaten kollha. B’isem ġdid għad isejħulek, isem li għad jagħżlu fomm il-Mulej.

³Għad tkun kuruna ta’ ġmiel f’id il-Mulej, u dijadema ta’ sultan f’id Alla tiegħek.

⁴Ma jgħidulekx aktar: ‘L-Abbandunata’, lanqas lil artek: ‘L-Imħarbta’. Lilek għad isejħulek: ‘Għaxqti fiha’, u lil artek għad jgħidulha: ‘Għarusa’; għax l-għaxqa tal-Mulej fik, u artek għad titgħarras.

⁵Bħalma għarus jitgħarras xebba, hekk jitgħarrsek il-Bennej tiegħek; u bħalma l-għarus jitgħaxxaq b’għarustu, hekk jitgħaxxaq bik Alla tiegħek.

⁶Fuq swarek, Ġerusalemm, qegħedt l-għassiesa: lejl u nhar qatt ma jisktu. Intom li tfakkru l-Mulej, ma hemmx mistrieħ għalikom;

⁷u lilu sserrħuhx sa ma jerġa’ jwaqqaf lil Ġerusalemm, u jagħmilha l-foħrija tal-art.

⁸Ħalef il-Mulej b’lemintu u bid-driegħ qawwi tiegħu: “Il-qamħ tiegħek ma nagħtihx aktar b’ikel lill-għedewwa tiegħek, u l-barranin ma jixorbux l-inbid tiegħek, li int tħabatt għalih;

⁹imma l-qamħ jikluh dawk li jaħsduh u jfaħħru l-Mulej, u dawk li jiġbru l-għeneb jixorbu l-inbid fil-btieħi tat-tempju tiegħi.”

¹⁰Għaddu, għaddu mill-bibien, wittu t-triq għall-poplu! Rawmu, rawmu t-triq, naddfuha miż-żrar! Għollu sinjal għall-popli!

¹¹Araw, il-Mulej isamma’ leħnu sa truf l-art: “Għidu lil bint Sijon: Arah, ġej is-salvatur tiegħek! Arah bil-prezz f’idu u l-ħlas quddiemu.”

¹²U jibdew isejħulhom: ‘Poplu qaddis, il-Mifdijin tal-Mulej’, U lilek isejħulek: ‘L-Imfittxija’, ‘Il-Belt qatt abbandunata’.